玉冰燒

玉冰燒（粵拼：Juk6 bing1 siu1），廣東十大名酒之一，係佛山地區產嘅酒，喺《熙寧酒課》度有記載。

秘訣

據講玉冰燒嘅獨家秘訣之一在於釀酒嘅特殊工序—喺最後一個環節。釀玉冰燒嘅人將蒸出嘅米酒導入去佛山產嘅大甕度，然後浸入重 100 公斤左右嘅肥豬肉，經過大缸陳藏，精心勾兌，令到酒體玉潔冰清，滋味特別醇和，先至成為好出名嘅玉冰燒。因為肥豬肉嘅豬油似玉，摸落有啲涼浸浸咁（又有話係因為廣東話「肉玉不分」），所以用肥豬肉泡過嘅酒都叫「玉冰燒」。每一舊豬肉一般有得用好多年。

歷史

佛山古代嗰陣係屬於廣州，釀酒嘅歷史好耐。《熙寧酒課》就話佛山嗰頭喺大宋時期（10 至 13 世紀）已經有釀酒。民間有釀同飲時令酒嘅風俗，例如係「五月朔日飲菖蒲酒，初五日飲雄黃酒，社日醉芋酒」。酒品幾多人讚譽，好似係吳奎光就寫詩話：「酒樓酒樓汝知有，人間不死之丹丘。」嶺南三家嘅梁佩蘭嘅詩又話：「酒香滿盞不惜醉，月色上衣從著身。」 佛山嘅蒸酒業喺大清（16 世紀至廿世紀早期）好旺。《佛山忠義鄉志》就咁講：「本鄉出產素稱佳品。道咸、同年間以陳總聚（陳太吉）為最有名。近則推三元市之人和悅號。說者謂水質佳良，米料充足，酒缸陳舊，三者兼備斯，其味獨醇。」當時嘅蒸酒者「家數三四十甑數」。1830 年嗰陣啲粵人起咗「陳太吉酒莊」嚟承襲啲傳統工藝，釀「醇舊太吉酒」，成為地方名酒。豉香型白酒以佛山太吉酒廠嘅豉味玉冰燒為典型代表。