數碼人文學

研究者喺度用隻電腦軟件分析長篇小說《傲慢與偏見》入面啲字。

數碼人文學（粵拼：sou3 maa5 jan4 man4 hok6 | 英文：digital humanities）係一門跨學科嘅領域，主旨係想將 ITaai1 ti1 應用喺人文學度。數碼人文學會用電腦方法儲住啲資訊，仲會用到 AI 等嘅電腦技術分析手上嘅數據，想從而搵出對人文學嚟講有用嘅知識；除此之外，數碼人文學有陣時又會對 IT 上嘅研究有所啟示。

舉個例說明，响廿一世紀打前，對文學作品嘅分析係文學嘅一環（人文學想研究嘅嘢），研究者會靠人手做嘅分析研究文學作品，例如自己同啲研究員睇完一拃作品之後，講吓「我哋發覺，呢啲作品入面用字有噉噉噉嘅傾向」等嘅發現；到咗廿一世紀初，IT 經已有自然語言處理（NLP）嘅技術做到教電腦處理語言同文字，可以要電腦計每份文學作品入面啲字嘅統計關係（攞 IT 上嘅技術嚟用），即係計（簡化講）「如果前面隻字係動詞，後面隻字係名詞」噉嘅機率。詳情可以睇吓 n-gram 等嘅技術。

到咗 2020 年代，數碼人文學已經取得咗一定嘅成功，由文學、音樂以至視覺藝術上嘅研究都有採用數碼人文學嘅研究方法，而且結合人文同 IT 仲帶起咗運算創意（嘗試教 AI 好似人噉展示創意）等嘅新諗頭。

定位

睇埋：人文學同資訊科技

數碼人文學定義上就屬於人文學，而 2022 年嘅不列顛百科全書就係噉定義「人文學」嘅：

「

原版英文："humanities, those branches of knowledge that concern themselves with human beings and their culture..." 粵文翻譯：人文學，（係）知識嘅一啲分枝，關注人類同埋佢哋嘅文化...

」

人文學包括咗文學、視覺藝術、表演藝術同埋法律呀噉，呢啲領域都係研究緊某啲文化嘅－當中「文化」係指人類社會當中嘅社會行為，亦包括（例如）畫或者樂曲等展現人類創意嘅事物。數碼人文學可以當係一套搞人文學研究嘅方法，會用各種嘅 IT 技術做人文學研究。

方法

睇埋：人工智能同自然語言處理

睇埋

• 資訊系統