研究

出自維基百科,自由嘅百科全書
有個人為咗做研究而係噉摷料睇料。

研究jin4 gau3英文research)係用主動同有系統嘅方式去增進知識嘅過程,可以係為咗搵事實、確認前人研究、解決問題、驗證定理、發展理論等等。

話研究「有系統」意思係指佢有一套內在嘅邏輯,例子有科學研究用嘅科學方法(scientific method)噉[1][2]

主要步驟[編輯]

內文:文獻綜述
睇埋:科學方法同埋學術寫作

一份研究大致上會跟以下噉嘅流程[3][4]

  • 文獻綜述:正路嚟講,研究人員喺郁手做新嘅研究之前,都實會摷吓同讀吓自己研究緊嗰範嗰啲近期文獻;噉做嘅用意係想睇吓嗰範嗰啲研究者近排做咗啲乜同埋有冇乜嘢新發現或者理論-噉樣做一嚟係要攞靈感,二嚟係要費事自己嘥時間走去做一啲人哋已經做咗嘅嘢;而喺做科學性質嘅討論嗰陣,研究者通常首先會大致上噉概括吓嗰個研究課題,講吓個課題有啲乜嘢主要理論同諗頭,跟住就會講吓呢啲理論同諗頭有冇啲乜嘢甩漏(所以先至需要做份新嘅研究嚟補救呢啲甩漏)-做新研究嘅常見理由包括「現有嗰啲理論解釋唔到某啲現象」,又或者係個研究者嫌打前嗰啲研究用嘅量度方法唔掂... 呀噉[5]
  • 諗法理據:講完現有嗰啲文獻之後,位研究者就要提出自己嘅諗法同埋有啲理據嚟支撐自己提出嘅諗法;响實證嘅科學上,「支撐自己提出嘅諗法」通常都係實際噉去做實驗或者觀察嚟攞數據,並且對呢啲數據作出分析(詳情可以睇吓統計分析方面嘅嘢[6])同埋呢啲分析得出嘅結果係點。
  • 總結:提出咗諗法,又搵到證據撐自己個諗法之後,研究者正路會大致上噉總結吓自己搵到嘅結果,並且講吓呢啲結果對現有嘅知識體有咩啟示-例如「對於我而家呢個實驗,手上呢兩個理論會作出唔同嘅假說,我做呢個實驗嘗試驗證邊個理論作嘅假說先至係真確,實驗結果撐理論 A 多過撐理論 B,而我認為理論 B 要作出噉噉噉嘅修改先至可以令佢有說服力」噉嘅推論。

如是者,科學作為一嚿知識體就一路係噉有進展-後人基於前人做嘅研究嚟諗新橋,係噉累積數據同埋知識[7]

研究方法[編輯]

內文:方法學

... 等等。

Info:實驗組同對照組

實驗其中一種最簡單嘅做法係將樣本(sample;泛指攞嚟做研究嘅個體)分做實驗組同對照組兩組:想像家陣有位醫學研究者,佢想同隻新臨床試驗,即係試吓隻藥掂唔掂(醫唔醫到佢想醫嗰隻病),於是佢就搵 咁多位有嗰隻病嘅人返嚟,再將啲病人隨機噉分做兩組,兩組人數一樣-

  • 實驗組嘅受試者食隻新藥;
  • 對照組嘅受試者食隻安慰劑(一隻已知冇效嘅藥),而且隻安慰劑特登整到外形上同隻新藥一樣;

喺呢場實驗裏面,IV 係「有冇食隻藥」,而過咗一段時間之後,位研究者再同班受試者做檢查,睇吓佢哋病情點(DV:病情);如果研究者發覺過咗段時間之後,實驗組嘅病情明顯好過對照組,佢就有理由主張話隻新藥真係有效[8][9]

數學化啲噉睇,實驗組同對照組個諗頭可以用獨立樣本 t 測試(independent sample t-test)嘅方法想像:以下嗰兩幅圖嘅 X 軸表示個 DV 嘅數值,而 Y 軸就表示每個 DV 可能值出現得幾密,藍線表示實驗組嘅分佈,紅線就表示對照組嘅分佈,

  • 上圖係表示「兩組冇乜太大差異」嘅情況-實驗組出現得最密嗰個值(設做 ;條線最高嗰點)係就係低過對照組嘅(),但 數值唔係咁大;
  • 下圖係表示「兩組有比較明顯嘅差異」嘅情況- 之間嘅差異明顯大過上圖嘅;

統計學上,研究者仲有得用條式計返個 值出嚟,個 值簡單講就係反映咗兩組之間嘅差異「有幾明顯」, 數值愈大就表示兩組差異愈明顯,噉位研究者愈有理由相信兩組之間真係有差異嘅-用返頭先試新藥嘅例子,假設實驗組病情好過對照組,而且兩組「有明顯差異」,佢就有強嘅理由話隻藥真係掂嘅。上述呢個情況淨係考慮將受試者分兩組嘅情況(組嘅數量: 2),但當組嘅數量係 3 或者以上嗰陣,呢種思路一樣會行得通,例如想像研究者想同時試兩隻新藥,比較兩隻新藥嘅效果(受試者分三組-對照組、實驗組 1 同實驗組 2)[8][9]

有關呢啲統計分析嘅細節,可以睇吓 T 測試ANOVA 相關嘅內容。

實驗組同對照組喺個變數上各有個分佈(藍色線同紅色線);上圖顯示兩組差異細-組之間嘅差異(由 反映)同組內部差異比起嚟好細,而下圖顯示兩組差異大。組嘅數量 = 3 或者以上(ANOVA)嗰陣可以用同樣方法想像。

睇埋[編輯]

睇埋:圖書館學

[編輯]

  1. Stanovich, Keith E. (2007). How to Think Straight About Psychology. Boston: Pearson Education. p. 123
  2. Crawford S, Stucki L (1990), "Peer review and the changing research record", J Am Soc Info Science, vol. 41, pp. 223-28
  3. These are the 20 most popular academic papers of 2016.
  4. What are the Qualities of a Good Research Paper. Sahifa.
  5. Ziman, J.M. (1980). "The proliferation of scientific literature: a natural process". Science. 208 (4442): 369–71.
  6. Dixon, W. J., & Massey Jr, F. J. (1951). Introduction to statistical analysis.
  7. Shatz, David (2004). Peer Review: A Critical Inquiry. Rowman & Littlefield.
  8. 8.0 8.1 Derrick, B; Toher, D; White, P (2017). "How to compare the means of two samples that include paired observations and independent observations: A companion to Derrick, Russ, Toher and White (2017)". The Quantitative Methods for Psychology. 13 (2): 120-126.
  9. 9.0 9.1 O'Mahony, M. (1986). Sensory Evaluation of Food: Statistical Methods and Procedures. CRC Press. p. 487.

[編輯]