自然實驗

自然實驗（英文：natural experiment）係實驗做法嘅一種，常見於社科研究。指個實驗操作係由研究者以外嘅力量所施加嘅，例如係一個經濟學實驗，研究自然災難造成嘅經濟影響。

概論

睇埋：實驗

正常嚟講，一場實驗嘅操作係由研究者施加嘅，不過想像家陣有位經濟學家想研究「天災對經濟增長有咩影響」，佢冇得話「搵成幾百萬人入實驗室，再施加一場天災，睇吓啲人嘅生產能力會點變化」，於是佢就改變用自然實驗嘅做法，即係搵兩個經濟體返嚟：

• 經濟體 A 啱啱受咗場天災；
• 經濟體 B 咩天災都冇，而且喺各方面（人口同實驗前嘅 GDP 呀噉）同經濟體 A 相約；

然後研究者就觀察 A 同 B 跟住落嚟啲經濟指標變化嘅規律有咩差異；喺呢場實驗入面，天災係一個 IV，而啲經濟指標就係 DV，假設兩個經濟體真係喺各方面都相約，經濟體 A 跟住落嚟同經濟體 B 嘅差異應該主要係源自個 IV 嘅；不過同一般嘅實驗室實驗唔同嘅係，呢件 IV 操作係「自然」發生（唔係由研究者施加）嘅。自然實驗常見於一啲專研究大規模現象嘅領域－好似係經濟學、社會學、地理學、考古學、地質學同生態學呀噉，噉係因為好似好多社會現象又或者係地殼變動呢啲咁大規模嘅現象，通常都好難喺實驗室裏面模擬。

2017 年德州一場水災嘅情境；想像有位生態學家想研究噉嘅天災會點影響當地嘅生態系統，佢有冇得話「喺實驗至入面模擬一場成座城市咁大嘅天災」呢？ 2017 年德州一場水災嘅情境；想像有位生態學家想研究噉嘅天災會點影響當地嘅生態系統，佢有冇得話「喺實驗至入面模擬一場成座城市咁大嘅天災」呢？  如果一定要喺實驗室裏面做嘅話，生態學家可以搵個水族缸裝住啲生物嚟研究，但個水族缸能唔能夠充分噉模擬到實驗室外嘅生態系統呢？ 如果一定要喺實驗室裏面做嘅話，生態學家可以搵個水族缸裝住啲生物嚟研究，但個水族缸能唔能夠充分噉模擬到實驗室外嘅生態系統呢？

爭議

睇埋：科學對照

喺廿一世紀初嘅科學上，自然實驗仲係有一定嘅爭議性：一方面，自然實驗唔係喺（高度受控嘅）實驗室入面做嘅，所以冇咁受控，成日會引起「呢場自然實驗嘅結果係咪俾啲唔受控制嘅因素干擾咗」噉嘅問題；不過另一方面，對於好多研究者嚟講，自然實驗係唯一行得通嘅實驗做法，例如想像一位生態學家想研究水災對一笪（閒閒哋成座城市咁大嘅）地方嘅生態系統有咩影響，佢可以試吓喺實驗室入面攞個水族缸裝住啲生物，睇吓「突然間有大量嘅水湧入個缸裏面」會點影響個缸入面啲生物，不過噉就會引起個疑問：

「

個水族缸係咪真係代表到實驗室外嘅生態系？已知同水族缸比起嚟，實驗室外嘅生態系大好多複雜好多。

」

於是就引起

「

齋靠水族缸攞到嘅研究結果係咪能夠普遍化，係咪可以準確噉描述實驗室外嘅生態系？

」

噉嘅問題；第啲領域入面都會有「實驗室入面嘅現象，喺規模上細過想研究嗰樣現象咁多，噉由實驗室得出嘅結果，係咪真係適用喺現實情況度？」噉嘅疑問。因為噉，對好多經濟學家同社會學家（仲有係第啲領域當中研究大規模現象嘅研究者）嚟講，實驗室實驗完全冇說服力，自然實驗係研究佢哋想研究嘅現象嘅唯一方法。

睇埋

• 實驗
• 實驗設計