流行病學

流行病學（英文：epidemiology ），又叫疫學，屬於醫療下嘅學科，結合統計學，集中研究喺特定人群入便，各種健康問題嘅分佈，當中健康問題可以係疾病同埋唔理想嘅健康行為等。呢啲研究對公共衛生工作嚟講好有用。

領域定位

重要技術

空間分析

流行病學周不時會用到空間分析，用嚟剖析疾病嘅分佈，尤其係傳染病嘅分佈。

以下呢段係 an excerpt from 空間分析.[編輯]

空間分析，粵拼：hung1 gaan1 fan1 sik1，又名空間統計，係一類分析資料嘅技術，近似地理同統計呢兩個學科嘅結合。空間分析重點在於睇手上嘅變量點樣隨空間而變化，並且用呢啲資訊產生有用嘅洞見或者解答研究問題。空間分析有別於純粹嘅地圖學，唔單只係畫圖咁簡單，仲係講緊分析資料同埋位置同距離等嘅空間特性有咩關係，例如係某啲現象會唔會集中喺某個地區，定係會呈現某種方向性^[1]。

譬如係流行病學噉，就不時會用到空間分析。流行病學屬醫療領域，研究疾病點樣喺人群中出現、傳播同影響健康。想像研究人員想分析某隻病，例如登革熱，喺唔同地區出現嘅頻率，睇下係咪有某啲地區情況零舍嚴重。佢哋仲可以透過空間分析，發現潛在嘅傳播途徑，或者搵出關鍵地點去做防疫工作。

除咗流行病學，空間分析喺第啲領域都有用，好似係地理學、城市規劃、考古學、生態學、經濟學同市場研究呀噉。喺呢啲範疇入面，分析者往往會處理大量牽涉地點資訊嘅數據，用空間分析去理解複雜嘅地理分佈同規律。

縱向研究

縱向研究可以用嚟判斷健康問題嘅成因。

縱向研究係觀察研究一種，講緊研究者喺若干個時間點對樣本進行觀察^[2]。呢種研究方法嘅核心特點係重複同埋長時間，研究人員會喺一段有返咁上下長嘅時間中，持續追蹤同一批研究對象，並且反覆收集數據。

重要概念

共病

以下呢段係 an excerpt from 共病.[編輯]

共病（粵拼：gung6 beng6）係醫學上嘅概念，指一個人身上同時出現兩種或以上嘅疾病。共病之所以會出現，好多時係因為唔同病之間有因果關係，一種病引起另外嗰種，亦可能係獨立出現，但互相影響。共病呢個概念，喺流行病學同心理健康等嘅領域都廣受討論，例如精神醫學上就講到抑鬱同焦慮症之間有共病傾向，成日都會一齊出現。

風險因素

以下呢段係 an excerpt from 風險因素 § 基本概論.[編輯]

如果某種特徵或者條件，會令某種疾病或者不良結果發生嘅機率上升，噉呢種特徵就可以稱為一個風險因素。風險因素可以係與生俱來嘅生理條件，亦可以同個人嘅生活習慣或者行為有關。常見嘅例子包括：食煙會增加患肺癌同埋心血管病嘅風險；高血壓同中風以及冠心病有密切關聯；而長期承受心理壓力亦被視為抑鬱症嘅一個重要風險因素^[3]。

如果話某樣嘢係風險因素，意思即係話嗰樣嘢會引致一種或多種疾病或受傷，或者提升呢啲病同傷發生嘅機率。^[4]

舉數值例子說明：喺某場婚禮入面，有 74 位賓客食咗婚禮現場提供嘅雞肉，其中有 22 人，婚禮過後出現不適；相反，淨低嗰 35 位揀咗食魚類或者素食餐嘅人士之中，只得兩人事後感到不適。要判斷食咗啲雞肉係咪風險因素，可以利用相對風險（下面嘅 FH ）嚟比較兩組人出事嘅機率^[5]：

{\text{FH}}={\frac {\mbox{  接  觸  到  風  險  因  素  嘅  人  幾  大  機  會  出  事}}{\mbox{  冇  接  觸  到  風  險  因  素  嘅  人  幾  大  機  會  出  事}}}

^[6]

用呢條式嚟計：

食咗雞肉人士嘅風險為 22/74 ≈ 0.297；

冇食雞肉人士嘅風險為 2/35 ≈ 0.057。

由此可見，前者出現不適嘅機率超過後者五倍，即相對風險大於 5。呢個結果顯示雞肉好可能同今次事件有關。而除咗相對風險之外，風險因素仲有好多種唔同計法。

隊列效應

隊列效應係社科上嘅重要概念：隊列通常係指某一班喺同一年代出世，或者一齊經歷過某啲大事嘅人，譬如二戰後出世嘅嬰兒潮嗰代就可以當係一個隊列；隊列效應講嘅係，屬同一隊列嘅人，佢哋喺特定時期一同經歷過某啲大事，所以佢哋梗會傾向具有某啲共同嘅特徵或者行為模式，係佢哋以外嘅人冇嘅^[7]^[8]。

喺統計上，隊列效應可以用多層模型相關嘅技巧嚟分析。

睇埋

文獻

歐美文獻：

The Health Protection Agency
The Collection of Biostatistics Research Archive
European Epidemiological Federation
'Epidemiology for the Uninitiated' by D. Coggon, G. Rose, D.J.P. Barker, British Medical Journal
Epidem.com – Epidemiology (peer reviewed scientific journal that publishes original research on epidemiologic topics)
'Epidemiology' – In: Philip S. Brachman, Medical Microbiology (fourth edition), US National Center for Biotechnology Information
Monash Virtual Laboratory – Simulations of epidemic spread across a landscape
Division of Cancer Epidemiology and Genetics, National Cancer Institute, National Institutes of Health
Centre for Research on the Epidemiology of Disasters – A WHO collaborating centre
People's Epidemiology Library
Epidemiology of COVID-19 outbreak

引述

↑ Banerjee, Sudipto; Carlin, Bradley P.; Gelfand, Alan E. (2014), Hierarchical Modeling and Analysis for Spatial Data, Second Edition, Monographs on Statistics and Applied Probability (2nd ed.), Chapman and Hall/CRC.
↑ Posner, Barry Z. (2009). "A Longitudinal Study Examining Changes in Students' Leadership Behavior". Journal of College Student Development. 50 (5): 551–563. ISSN 1543-3382.
↑ Stephen, A.M.M.M.S. and Lawrie, M., 2010. Research methods, statistics and evidence-based practice. Companion to Psychiatric Studies E-Book, p.157.
↑ Overarching methods and choices for risk factors，佢哋呢道噉講："A risk factor is any determinant that causes (or increases the likelihood of) one or more diseases or injuries."
↑ Tenny, Steven; Hoffman, Mary R. (2020), "Relative Risk", StatPearls, StatPearls Publishing, PMID 28613574, 喺2020-06-10搵到
↑ 當中 FH 取自粵拼：fung1 him2。
↑ Atingdui, Norissa (2011), "Cohort Effect", 出自 Goldstein, Sam; Naglieri, Jack A. (編), Encyclopedia of Child Behavior and Development (英文), Boston, MA: Springer US, p. 389, doi:10.1007/978-0-387-79061-9_617, ISBN 978-0-387-79061-9, 喺2023-07-27搵到
↑ Ryder, Norman B. (1965). "The Cohort as a Concept in the Study of Social Change". American Sociological Review. 30 (6): 843–861. doi:10.2307/2090964. ISSN 0003-1224. JSTOR 2090964. PMID 5846306.

[1] Banerjee, Sudipto; Carlin, Bradley P.; Gelfand, Alan E. (2014), Hierarchical Modeling and Analysis for Spatial Data, Second Edition, Monographs on Statistics and Applied Probability (2nd ed.), Chapman and Hall/CRC.

[2] Posner, Barry Z. (2009). "A Longitudinal Study Examining Changes in Students' Leadership Behavior". Journal of College Student Development. 50 (5): 551–563. ISSN 1543-3382.

[3] Stephen, A.M.M.M.S. and Lawrie, M., 2010. Research methods, statistics and evidence-based practice. Companion to Psychiatric Studies E-Book, p.157.

[4] Overarching methods and choices for risk factors，佢哋呢道噉講："A risk factor is any determinant that causes (or increases the likelihood of) one or more diseases or injuries."

[5] Tenny, Steven; Hoffman, Mary R. (2020), "Relative Risk", StatPearls, StatPearls Publishing, PMID 28613574, 喺2020-06-10搵到

[6] 當中 FH 取自粵拼：fung1 him2。

[7] Atingdui, Norissa (2011), "Cohort Effect", 出自 Goldstein, Sam; Naglieri, Jack A. (編), Encyclopedia of Child Behavior and Development (英文), Boston, MA: Springer US, p. 389, doi:10.1007/978-0-387-79061-9_617, ISBN 978-0-387-79061-9, 喺2023-07-27搵到

[8] Ryder, Norman B. (1965). "The Cohort as a Concept in the Study of Social Change". American Sociological Review. 30 (6): 843–861. doi:10.2307/2090964. ISSN 0003-1224. JSTOR 2090964. PMID 5846306.

[1]

[2]

[3]

[4]

[5]

[6]

[7]

[8]