生物物理學

有關核糖體嘅生物物理學研究

生物物理學（Biophysics）係一門跨學科嘅科學，佢採用物理學裏面傳統嘅方法同埋手段，去研究生物嘅現象。生物物理學覆蓋生物組織嘅所有層次，由分子去到成個生物體再到成個族群。生物物理學嘅研究同生物化學、分子生物學、物理化學、生理學、納米科技、生物工程、運算生物學、生物力學、發育生物學同系統生物學有好大嘅交集。

生物物理學呢個詞語最初喺1892年由 Karl Pearson 提出。而喺學術界，生物物理學呢個詞係講緊研究生物系統中嘅物理量（例如電流、溫度、應力、熵）。其他生物科學領域，例如分子生物學、細胞生物學、化學生物學同生物化學，都有研究生物體嘅生物物理特性。

簡介

分子生物物理學通常處理嘅生物學問題同生物化學同分子生物學好似。大家都係致力於尋找生物分子現象背後嘅物理基礎。呢個領域嘅科學家進行研究，關注細胞內各個系統之間嘅相互作用，包括DNA、RNA同埋蛋白質生物合成之間嘅相互作用，以及呢啲相互作用係點解會被調節。為了解答呢啲問題，科學家用咗好多唔同嘅技術。

螢光影像技術、電子顯微鏡、X射線晶體學、核磁共振光譜學、原子力顯微鏡同埋用X射線同中子（SAXS/SANS）去做小角度散射（SAS）等等技術，通常都會用嚟睇生物學上重要嘅結構。蛋白質動力學可以用中子自旋回波光譜學嚟觀察。構型上嘅變化可以用雙極化干涉儀、環形二色性、小角度散射同埋中子自旋回波光譜等技術嚟測量。用光學鉗或者原子力顯微鏡可以直接操控分子，亦都可以用嚟監測力同距離都喺納米尺度發生嘅生物事件。分子生物物理學家通常將複雜嘅生物事件睇作為互動實體嘅系統，而佢地係可以用統計力學、熱力學同化學動力學嚟理解。透過由多種唔同嘅學科入面汲取知識同實驗技術，生物物理學家通常可以直接觀察、建立模型、操控一個分子或者分子複合物嘅結構同互動。

除咗傳統生物物理學嘅議題，例如結構生物學或酶動力學，現代生物物理學包含非常廣泛嘅研究範圍，由實驗和理論工具所牽涉，包括生物電子學同量子生物學。生物物理學家愈來愈多地應用從物理學、數學同統計學中獲得嘅模型同實驗技術去研究更大嘅系統，例如組織、器官、人口同生態系統。生物物理模型廣泛應用喺單一神經元嘅電傳導研究，以及組織同成個大腦嘅神經迴路分析。