量化

  想搵音樂技術嘅話，請睇量化 (DAW) 。

溫度計；溫度計做嘅就係畀個數值，量度周圍嘅嘢有幾熱。

量化（當中量係數量個量；粵拼係 loeng6 ）係指「將觀察到嘅現象用量表達出嚟」嘅過程，當中量簡化講就係數值。譬如依家要研究牛頓力學，要分析力呢個概念，就要有方法用數值描述一股力，然後先可以做進一步嘅研究，而喺現代物理學，牛頓第二定律提供咗方法將力概念量化：

$\mathbf {F_{net}} =m\mathbf {a}$；

當中 $\mathbf {F}$ 係指淨力，即係所有力加埋之後得出嘅總和，$m$ 係指質量（單位係公斤），$\mathbf {a}$ 係加速度。

領域例子

睇埋：科學、應用數學同變數 (科研)

量化對科學嚟講好重要，科學工作者透過數字化測量同分析嚟理解現象、建立理論同驗證假說。唔同科學疇都會用到量化，譬如係：

• 物理學（自然科學） - 速度

  速度將「件物體郁得幾快」呢個概念量化，速度指物體喺單位時間內移動嘅距離，可以用公式：𝑣 = 𝑑 / t （速度 𝑣 等於行咗嘅距離 𝑑 除以用咗嘅時間 t）去計。例如，一架車以時速60公里行駛，每小時行60公里，呢個數值係量化緊速度。

• 生物學（自然科學） - 心跳率

  心跳率係指一分鐘內心臟跳動嘅次數，通常以每分鐘心跳數（BPM）表示。例如健康成人靜止時嘅心跳率大約係60-100 BPM。醫生可以透過測量心跳率評估病人嘅健康狀況。

• 經濟學（社會科學） - 通脹率

  通脹率係指物價指數（如CPI，消費者物價指數）喺一段時間內嘅變化百分比。例如，假設上年某地區嘅CPI係100，而今年上升到103，通脹率就係3%。呢個數據可以用嚟衡量貨幣購買力嘅變化，影響經濟決策。

• 心理學（社會科學） - 智商（IQ）

  智商係用標準化測驗量度人類智能得出嘅數值，平均智商設定為100，標準差通常設定為15。例如，如果一個人嘅智商係130，表示佢智能比一般人高兩個標準差咁多。

• 語言學（社會科學） - 語義網絡

  語義網絡能夠用數值表示兩隻字詞喺意思上有幾接近。

呢啲例子顯示咗量化喺唔同科學範疇都有用，幫助研究人員精確描述、分析同預測各種現象。

領域對比

睇埋：量度層次

唔同領域用嘅量化方法可以好唔同。社會科學研究人類行為、社會，研究嘅變數好多時無法用等比尺度。

譬如對比溫度（物理學同化學等常用）同智商（心理學成日用）。溫度同智商雖然都係量化，用數值表示，但兩者喺計算上有根本嘅差異。溫度可以用攝氏（°C）同埋華氏（°F）等嘅等距量度表示，呢啲數值做加減係有意義嘅，可以話 20°C 同 10°C 之間個差距，等同 40°C 同 30°C 之間嗰個差距。而如果用絕對溫度（開氏，K）嚟量化，溫度就會係等比量度，可以做乘除嘅計算，話 200K 係 100K 嘅兩倍咁熱。相比之下，廿一世紀初嘅智商概念就比較接近次序量度，只係有得比較高低，IQ 130 嘅人智能係高過 IQ 120 嘅人，但智商測驗出嘅數冇得攞嚟做加減，即係話 IQ 130 同 IQ 120 之間嘅智能差距，唔係真係等同 IQ 110 同 IQ 100 之間嘅智能差距，噉係因為智商數值只係參照總體分佈計出嚟，並唔係一個物理量。

睇埋

• 量度
• 變數
• 硬同軟科學

文獻

• Crosby, Alfred W. (1996) The Measure of Reality: Quantification and Western Society, 1250–1600. Cambridge University Press.