發現

發現（粵拼：faat3 jin6）指人首次觀察、認識到或者證明某樣事物嘅存在。新發現嘅事物可能一直存在但冇人留意到，唔似得發明噉：發現係揭示已有但前所未知嘅事物，而發明就係創造出前所未有嘅事物。發現可以係發現自然現象，好似係新嘅天體、新嘅生物物種，又可以係科學上對理論有新理解，例如係數學上證明到新定理呀噉^{[註 1]}。

喺科學上，發現被視為推動知識進步嘅重要途徑。不過，哲學上又時常有爭論，乜嘢先算係真正嘅發現，尤其係知識論同科學哲學都有就呢啲問題著墨。而科技不斷進步，人類嘅觀察能力不斷擴闊，發現新事物嘅機會亦會越來越多。