解釋
解釋（粵音：gaai2 sik1 ）係科學同哲學等領域上嘅重要概念。一個解釋會係一組陳述，通常用嚟描述某啲事實，描述嘅目標係指搞清楚呢啲事實背後嘅成因、背景，以及係會引致咩結果。解釋好多時可以幫人明白某啲規律，甚至建立起法則，或者將現有嘅規律同某啲對象或者現象連結起嚟，令人將成件事睇得更清楚[1]。
喺哲學入便，解釋指嘅係一組令某個對象、事件，或者某種狀態變得可以理解嘅陳述。其中最常見嘅一種，就係因果式嘅解釋，即係話講明件事係由咩原因導致嘅，解釋背後嘅因果關係。
例子
[編輯]例如生物學界已經觀察到一個事實，就係生物種群會喺幾萬至幾百萬年咁長嘅時間入面，逐漸出現改變（進化定義上所指嘅嘢），例如移居到寒冷地方嘅動物物種，隨時間啲毛皮會一代代噉變得越嚟越厚，或者以第啲方式進化出能夠禦寒嘅能力。要解釋呢種現象，可以運用物競天擇嘅概念：根據物競天擇嘅諗法，環境寒冷，禦寒能力強啲嘅個體生存同繁殖嘅機率較高，生得多下一代，下一代又遺傳咗佢哋嘅禦寒能力；禦寒能力冇咁強嘅個體就比較易凍死，無法繁殖，結果就自然淘汰，於是個種群嘅基因庫就會一代代噉慢慢變化，整體變到禦寒能力愈嚟愈強[2]。喺呢個例子之中，進化呢個事實，生物學家用咗物競天擇呢個概念嚟解釋。
考量
[編輯]根據奧坎剃刀呢條科學哲學原則，對現象嘅解釋係愈簡單愈好。呢個原則唔係話簡單一定真確，而係話如果有好幾個假說或者理論都可以解釋到研究緊嘅現象，噉思考者應該選擇最唔需要額外假設、最少前設嘅嗰一個[3][4]。
電腦模擬嘅技術，可以用嚟檢驗某一拃相對簡單嘅法則係咪能夠解釋到（產生出）睇緊嘅現象。用電腦模擬方法做研究嘅人，會教電腦一拃相對簡單嘅法則，然後叫部機計數，計如果呢啲法則真係成立，會出現點嘅結果，假如出嘅結果同現實中觀察到嘅現象一致，噉研究者就有理由話嗰拃簡單法則可以解釋到研究緊嘅現象[5]。
睇埋
[編輯]引咗
[編輯]- ↑ Drake, Jess (2018). Introduction to Logic. EP TECH PRESS. pp. 160-161.
- ↑ Lewontin, R. C. (November 1970). "The Units of Selection" (PDF). Annual Review of Ecology and Systematics. Palo Alto, CA: Annual Reviews. 1: 1–18.
- ↑ Walsh, D. (1979). Occam's razor: A principle of intellectual elegance. American Philosophical Quarterly, 16(3), 241-244.
- ↑ （英文） 奧坎剃刀：概率睇法，呢篇文講解貝葉斯統計學嗰套諗法，點樣支撐奧坎剃刀嘅使用。
- ↑ Bedau, Mark A. (1997), Weak Emergence (PDF).