範式轉移

範式轉移faan6 sik1 zyun2 ji4（英文：paradigm shift）係指一個科學領域（廣義上可以包埋非科學嘅領域）當中「啲基礎概念或者研究方法有根本上嘅轉變」嘅過程。

概論

睇埋：科學哲學同科學方法

科學本質上就睇重創新：科學係一套靠實證嚟追求知識嘅方法同世界觀（睇埋科學哲學），而追求知識定義上就係由「冇知識」去「有知識」嘅過程，會涉及新理論新諗法嘅出現；廿世紀美國哲學家湯瑪斯·孔恩（Thomas Kuhn）喺 1962 年寫咗本書，提出咗範式轉移嘅概念－科學家做研究嗰陣實會建基於某啲假設，假定咗某啲嘢係真確，一般嘅科研會跟從主流科學都同意嘅假設，而範式轉移就係指挑戰主流科學嘅假設，仲要得出良好（能夠更加有效噉解釋研究緊嘅現象）嘅結果。

廣義上，「範式轉移」呢隻詞仲可以泛指一個領域「喺思考方式上有根本嘅變革」。

例子

以下呢啲諗頭都成日俾人攞嚟做範式轉移嘅例子：

• 量子力學（quantum mechanics）：呢套現代物理學理論俾好多人指係物理學上嘅一場重大範式轉移；量子力學係一套內部一致嘅理論框架，提出咗好多打破打前嘅物理學假設咗係真嘅諗法－例如古典物理學假定咗物質同能量係兩樣本質上唔同嘅嘢，但量子力學就提出粒子（物質）有波長（一種傳統上認為係能量擾動先有嘅特性），而量子力學噉做成功解釋到光電效應等打前啲物理理論解釋唔到嘅現象。
• 認知革命（cognitive revolution）：呢場改革俾好多人指係心理學同神經科學等領域上嘅一場範式轉移；廿世紀初嘅心理學由行為主義主導，行為主義認為心理學應該一味淨係研究能夠直接觀察到嘅行為，要忽略好似思維同記憶等冇得直接觀察嘅嘢；認知革命就打破咗呢種諗法，用實驗方法展示人類同第啲動物嘅腦入面嘅認知過程，例子可以睇吓對心理旋轉嘅研究，改革咗當時嘅心理學，仲帶起咗「認知科學」嘅諗法。
• 機械學習（machine learning，ML）：呢種技術俾人認為係人工智能（AI）嘅一場範式轉移：廿世紀嘅 AI 集中於符號人工智能，即係用一啲人能夠睇得明嘅明文邏輯教 AI 做決策，例如如果家陣想教 AI 睇病，研究者就要教佢
  • 「if 一個普遍健康嘅大人發燒，then 佢有可能係感冒」、
  • 「if 一個普遍健康嘅大人發燒，then 佢都有可能係肺炎」
  • ... 等嘅若干條能夠明文噉寫出嚟嘅法則；ML 就唔同，ML 係用啲特製嘅演算法，教電腦睇一大拃數據，一路睇一路用數據入面嘅規律建立一個（人就噉睇睇唔明嘅）數學模型，再靠個模型嚟行事；到咗廿一世紀初，機械學習經已取得咗頗大嘅成果，可以攞嚟教電腦睇病，而且仲要表現好過人類嘅醫生。
• 古典力學用微積分分析物體嘅郁動，達到前所未有嘅精確性。
• 狹義相對論提出「無論觀察者同光源點郁，所有觀察者見到嘅光嘅速度都係一樣嘅」嘅諗法，解釋到當時解釋唔到嘅現象。
• 物競天擇用一個當時冇人諗過嘅諗法嚟解釋當時解釋唔到嘅生物進化。

睇埋

• 破壞型創新
• 研究
• 創意
• 想像