變數 (科研)
跳去導覽
跳去搵嘢
變數（粵拼：bin3 sou3；英格蘭話：Variable）喺科學研究度係指形容緊某啲嘢嘅特性（呢樣嘢可以係人定死物都得）[1]，「大細」或者「重量」係形容緊某啲物件嘅變數，而「有幾聰明」或者「宗教信仰」呢啲就係形容人嘅變數。雖然嗌就嗌做變「數」，但係變數唔一定係一啲可以做算術運算嘅嘢：例如「宗教信仰」，佢的確係形容緊人嘅一種特性，但係「信佛」或者「信耶穌」呢啲值冇得攞嚟加減乘除。
變數大致上有得分做兩種。連續變數（Continuous variable）係變數嘅一種，指啲有得用數字嚟量度、兼且去到小數點後幾多位都得嘅變數，而佢哋嘅值就叫做數值（粵拼：Sou3 zik6），呢啲數值攞得嚟比較大細同埋做數學嘅運算。例如人有幾高有幾重都可以講係連續變數－「身高」同「體重」有得用數字嚟度（兼且可以用有小數點嘅數字）。我哋有得用呢柞數值嚟比較唔同人嘅身高同體重，重可以用佢哋嚟計數；相反，「宗教信仰」係一個唔連續變數（Discrete variable）－佢唔可以用數字嚟度，而佢嘅值一般都唔可以攞嚟計數：「183 厘米」同「80 公斤」呢啲數值有得加減乘除，而「信佛」同「信耶穌」呢啲值雖然都係形容緊啲嘢，但係唔可攞計數機去撳加減乘除。
操作化[編輯]
喺做科研嗰陣，同一個變數有得用好多種唔同嘅方法嚟將佢操作化（Operationalize；指講好點樣量度一個變數嘅過程）：同一個變數可以有好多種唔同方法量度，而呢啲量度方法亦都唔有唔同嘅優點。例如係一份醫學研究想研究人嘅年齡同癌症嘅病發率，就需要量度「年齡」呢個變數，而「年齡」有得用好幾種唔同方法度，包括就咁用六十歲做分割點將人分做「老年組」同「非老年組」兩組、或者直接問啲人幾歲等等。
睇埋[編輯]
攷[編輯]
- ↑ Earl R. Babbie, The Practice of Social Research, 12th edition, Wadsworth Publishing, 2009, ISBN 0-495-59841-0, p. 14-18.