科學理論

化學上會用嘅分子模型；唔同色嘅波代表唔同原子。科學理論都係一種模型，模擬研究緊嘅現象。

科學上講嘅理論（粵拼：lei5 leon6 ）係一套套經過精心設計、用嚟解釋現實世界發生緊咩事嘅知識框架。理論唔係隨便估估下，而係要由既定嘅一套套概念、定律同埋假設組成。要稱得上係理論，必須要符合幾個條件：

• 有解釋力：話到畀人聽點解某啲現象會發生。
• 有預測力：憑住理論，研究者可以推測未來會發生咩事。
• 有返咁上下可否證度。

無論係自然科學定社會科學，研究者做得研究，動機通常得幾個：一係想建立新理論，一係想修補現有理論嘅漏洞，甚至係想搵證據去反駁舊有嘅諗法。

基本概念

始祖鳥嘅化石

睇埋：科學、假設、公理、解釋同證據

喺廿一世紀初嘅科學界，科學理論會係一個個知識體。一個噉嘅知識體會包含一拃描述緊某啲現象嘅講法，而且佢仲達到以下呢啲條件：

1. 個理論本身會做一啲可否證嘅預測；
2. 個理論會合乎由實驗同觀察度攞到嘅數據；
3. 個理論受到嚟自唔同源頭嘅證據支持。

喺廿一世紀嘅科學界，進化論係一個非常有影響力嘅理論。若果用最簡單嘅方法去講，進化就係指响一個生物群組入面，啲基因出現嘅頻率隨住時間一代一代噉產生變化，包括

• 微進化：種群內部啲基因起細微改變。
• 宏進化：假若呢啲變化積累到一個地步，令到進化前後嘅兩群生物變咗做唔同嘅「物種」，就謂之宏進化。

進化論完全符合科學理論嘅三大特徵：有得驗證—只要研究者去量度生物嘅基因數據，就可以知道啲頻率有無變；符合現實觀察—大量嘅實驗同長期觀察都證實，生物種群嘅基因頻率的確會隨住世代而改變；多個源頭嘅證據支撐—除咗實驗室嘅數據，現實世界仲有好多強力證據，例如人工選擇同埋化石紀錄等。

重要概念

睇埋：抽象模型

假說

内文：假說

睇埋：肯定後項

以下呢段係 an excerpt from 臆測 § 基礎概念.[編輯]

睇埋：科學方法同證據

假說係科學方法不可或缺嘅一部份。

假說嘅一啲例子：

• 物理學：光速不變假說就係一個重要嘅例子。呢個假說話明，無論觀察者點郁，光喺真空中嘅速度永遠都係一樣嘅。呢個假說後來成為咗狹義相對論嘅基本前提之一。
• 生物學：自然選擇假說就解釋咗進化發生嘅原理。呢個假說指出，適應環境嘅生物個體傾向於生存同繁殖，佢哋嘅特徵會傳畀下一代。呢個假說喺《物種起源》入便首次系統噉出現。
• 經濟學：理性選擇假說假設咗人係理性嘅決策者，佢哋會根據可得資訊同個人利益作出對自己最有利嘅選擇。呢個假說喺多個經濟理論中扮演核心角色，例如博弈論呀噉。到咗廿一世紀初，行為經濟學研究已經引致好多經濟學研究者放棄理性選擇假說。

變數

内文：變數 (科研)

喺科學研究同建立理論嘅過程入便，變數係核心概念，指嘅係一啲喺唔同情況或者唔同個體之間可以有唔同數值、或者展現出唔同狀態嘅因子。簡單嚟講，只要某個概念係「可以起變化」嘅，噉統計學同科學模型就會將佢當做變數。

科學理論通常就係喺度描述緊變數同變數之間嘅關係。喺實驗或者模型入面，變數一般可以分為以下幾類：

• 自變數：指由研究者操縱或者預先存在嘅因子，預期佢會對其他變數產生影響，例如做研究，睇下食量係咪會影響體重，食量就係自變數。
• 應變數：指研究者想觀察或者預測嘅目標，佢嘅數值會隨住自變數嘅改變而起變化，例如上述例子入面嘅體重。

簡潔

内文：奧坎剃刀

睇埋：搬龍門

每當科學界發現一啲新嘅現象，科學家都會各自提出理論去解釋。如果同時有幾套理論都講得通，科學界就要揀。呢個時候，奧坎剃刀就派得上用場。奧坎剃刀呢條原則，簡單講就係簡單就係最好：

假設第啲條件冚唪唥一樣，理論越簡單就越好。

如果有兩套理論解釋力一樣咁強，證據又一樣咁充足，科學家通常會揀個變數少啲、公式簡單啲嗰套。原因有：

• 審美與哲學：歐美傳統上覺得「優雅」就係用最少嘅力做最多嘅嘢，呢種思想喺藝術同科學都係通。
• 可驗證度（更實際嘅原因）：理論越複雜、變數越多，就越難驗證，亦越容易「搬龍門」。

  例子： 想像理論 A 得 4 個變數，而理論 B 有 30 個變數。

  如果做完實驗發現數據唔符合理論 B，支持理論 B 嘅人好容易會搵到藉口，事後孔明噉話：「我哋今次淨係控制咗 20 個變數，仲有 10 個變數無量度到喎，所以今次失敗唔算數！」

  相反，理論 A 得 4 個變數，要控制晒所有因素去做測試相對容易好多。

只係理論

喺大眾討論入便，公眾對理論呢個詞彙經常存在認知落差。

唔少人會用「只係理論」呢句說話嚟作論證，好似呢句說話能夠反駁科學上確立咗嘅理論噉。

一個典型嘅例子係，部分反對進化論嘅人士會以「進化只係理論」為由，試圖削弱其學術地位。針對呢種論調，生物學家道金斯曾指出，喺科學層面，理論並非指毫無根據嘅猜測，而係一套擁有大量證據支撐嘅知識架構。

喺辯論當中，啲人有陣時會嘗試用噉嘅方法嚟拗：「進化只不過係一個理論。」呢個講法原則上正確，不過有需要理解呢句嘢係咩意思，因為喺科學上嚟講，「地球圍住太陽轉」都一樣只係理論，係一個有極大量證據支撐嘅理論。

理論一詞，有些少歧義問題。喺無論英文抑或係粵語嘅語境當中，理論一詞有兩個好唔同嘅意思：

• 日常用語：喺一般生活對話中，理論好多時會當正係假說或者個人見解嘅同義詞，泛指任何對某種現象嘅講法；根據呢個定義，無論係科學定論定係宗教上嘅典籍，都可以稱為理論。
• 科學定義：喺科研領域，科學理論係指一套經過嚴謹建構、嘗試解釋自然現象，並且獲得相當程度實證支持嘅解釋。

學術界普遍認為，進化論具備極其豐富嘅證據支持，並且能夠有效預測自然現象。因此進化論符合科學定義上理論嘅標準。相比之下，缺乏實證支持或者無法通過可否證測試嘅主張，喺現代科學框架下唔會歸類為理論，例如係將《舊約聖經》視為準確歷史紀錄嘅睇法。

睇埋

• 定義
• 科學
• 模型
• 實驗設計
• 草人謬論
• 球狀乳牛