需求

  呢篇文講經濟學講嘅需求。想搵第二個意思嘅話，請睇需求 (搞清楚)。

圖中紅色嗰條係需求曲線，反映成個需求。

需求（參見英文：demand；粵拼：粵化口語音：di6 maan1）係經濟學入便一個基本概念，指消費者喺唔同價錢下，願意同有能力購買某種貨品或服務嘅數量。一般嚟講，價錢升需求量會跌；價錢跌需求量會升。呢種負向關係就係需求理論嘅出發點。

基本概念

内文：供應同需求同微觀經濟學

睇埋：消費、需求定律同供應

定義上，需求關乎消費者嘅行為。某樣貨品或服務嘅價錢低咗，買得起嘅人自然多咗，需求量（消費者有能力又願意買嘅量）就會上升。舉例說明，若果出前一丁每包嘅價由 4 文港紙跌到 2 文，普羅消費者「有能力又願意買嘅量」就會多咗，例如係啲人掃多幾包去儲糧。

呢種價錢同需求量之間嘅反向關係，可以用需求曲線嚟表達。圖中打橫軸代表需求量（有能力又願意買嘅量），打戙軸代表價錢。條曲線通常向右下斜，斜率係負數（需求定律），反映平嘢買多啲呢種基本消費心理，亦反映消費者嘅收入實係有限嘅—所以佢哋「有能力又願意買嘅量」都係有限嘅數值。

需求定律係經濟學上嘅基本定律之一。呢條定律宣稱，是但搵個市場同是但一件貨品或服務，假設其他因素不變，件貨品服務嘅價格同買家會買嘅量之間會形成負關係（條線嘅斜率係負數）－價格愈高買家就會買得愈少，而價格愈低買家就會買得愈多。呢條定律係稀缺性嘅必然結果：價格係啲買家每買一件就要付出嘅資源量，所以一件貨品服務嘅價格乘需求量（買家有能力又肯買嘅量）反映買家有能力付出幾多資源嚟買件貨品服務，但錢係一樣有限嘅資源，所以價格同需求量乘埋出嗰個數一定係有限嘅數值；如果條需求曲線係由頭到尾都打橫、打直或者成正斜率嘅話，就會出現價格同需求量乘埋個數可以係無限大嘅情況，所以如果錢呢樣嘢係稀缺嘅，噉需求曲線只可以係斜率係負數嘅線。

幾個容易撈亂嘅詞：

• 需求：指定時間同地點，消費者喺各種可能價格下，對某種貨品或服務有能力又肯買嘅量。將呢啲「價錢及對應嘅需求量」畫條線出嚟，就會形成需求曲線。
• 需求量：指喺某個特定價格之下，消費者願意同能夠購買幾多。即係話，一個需求量係需求曲線上面其中一點，會對應某個價錢；需求量會跟住價格改變而變，但噉唔代表整體需求改變。
• 需求定律：經濟學入便一條基本原則，講緊假如其他因素冚唪唥不變，某貨品或服務嘅價愈高，消費者對佢嘅需求量就愈低；反之價格愈低，需求量就愈高。

需求改變

需求改變指嘅係：喺價錢唔變嘅情況下，需求量出現改變，喺幅圖中，成條需求曲線會移位。呢種情況有別於需求量改變，需求量改變係價錢郁咗，需求量自然改變；但需求改變指緊嘅係價錢不變需求量改變，成條需求曲線左右移動。

上圖係改變緊嘅需求曲線（D）同埋唔郁嘅供應曲線（S）；呢幅圖反映需求提升（由 D₁ 去 D₂）。

造成需求改變嘅原因包括

• 收入改變：例如政府派消費券或者經濟增長，普羅市民多咗錢使。
• 喜好同潮流轉變：例如港澳突然掀起新熱潮，興飲泰式奶茶，啲人個個走去飲泰式奶茶，泰式奶茶取代咗珍珠奶茶，就表示珍珠奶茶價錢不變，需求量跌。
• 替代品或互補品價格變化：例如港鐵加價，巴士嘅需求好可能會升。
• 未來預期：例如啲人預期嚟緊會有通脹，可能會提前買米儲貨，米嘅需求突然升。

當需求增加嘅時候，同時假設供應不變，會推高均衡價錢：均衡係指市場入面供應量同需求量啱啱相等，即係話供應同需求圖上兩條曲線交叉嗰個點；如果某種商品或服務嘅價格低過均衡價，需求會多過供應，市場就會出現短缺；相反如果價格高過均衡點，供應就會多過需求，結果就會出現盈餘。出現短缺嗰時，消費者為咗買到貨，往往願意出更高價，從而拉高市價；但如果出現盈餘，賣家就會爭住清貨，從而壓低售價。以口罩為例，疫症或者流感發生嘅時候需求會急升（需求曲線向右郁），價錢就跟住飆升；疫情減退後，需求就會跌（需求曲線向左郁），價錢回落。

睇埋

• 彈性：需求可以有嘅一種重要特性。
• 需求預測
• 市場研究
• 替代同互補品
• 需求拉動通脹