機會成本

出自維基百科,自由嘅百科全書
跳去導覽 跳去搵嘢

做一樣嘢嘅機會成本英文opportunity cost)係指「做嗰樣而放棄咗嘅選擇當中,最有價值嗰個」。

概論[編輯]

睇埋:稀缺性同埋經濟學
"There ain't no such thing as a free lunch." (「呢個世上冇免費嘅午餐。」[1]

機會成本係現代經濟學理論嘅一個基本概念:生產必然會涉及機會成本;噉講意思即係話,喺場生產嘅過程當中,做生產嘅人梗要放棄咗,冇用啲資源去做第啲嘢,而做一次生產嘅機會成本就係「做嗰樣嘢而放棄咗嘅選擇當中,最有價值嗰個」[2][3]

舉個例說明,想像有班工程師建築工人用咗啲建築材料澳門嗰度起咗條路,噉佢哋就冇得用嗰啲材料喺珠海或者香港嗰度起路,而呢啲「如果冇起澳門嗰條路就有得起嘅路」當中最有價值嗰條就係「用嗰啲材料喺澳門起路」嘅機會成本。

機會成本唔淨只包含同各種嘅資本:想像一位麵包師傅可以用揀用佢一個上晝嘅時間焗菠蘿包,又可以揀用嗰個上晝打 PSP,又可以揀用嗰個上晝寫返篇有關菠蘿包嘅維基百科文;如果佢揀咗用個上晝寫維基文,噉佢就放棄咗用啲時間焗菠蘿包或者打 PSP,而佢做呢個選擇嘅機會成本就係另外嗰兩個選擇當中比較有價值嗰個-喺呢個例子入面,所涉及嘅資源就係時間[4]

焗菠蘿包 打 PSP 寫維基文
價值(以主觀效益量度) 60 40 30
揀呢個選項嘅機會成本 40 60 60

機會成本係稀缺性嘅必然結果:可用嘅資源係稀缺嘅,所以做決策嘅人喺消耗佢資源做生產嘅時候要做取捨,如果佢決定咗用資源做其中一樣嘢,噉佢就冇得做其他嗰啲嘢,而其他嘢當中最有價值嗰樣就係機會成本。對機會成本嘅分析係經濟學上嘅重要一環,如果一個選擇嘅機會成本高過另一個嘅(假設所有選擇嘅價值都可以用某啲數值量度),後者會係一個比較有效率嘅資源運用方法-揀佢所放棄嘅價值會比較少。

睇埋[編輯]

[編輯]

  1. Gwartney, James D.; Richard Stroup; Dwight R. Lee (2005). Common Sense Economics. New York: St. Martin's Press. pp. 8–9.
  2. "Opportunity Cost". The Economist Economics A-Z.
  3. Opportunity Cost. Econlib.
  4. Buchanan, James M. (1987). "Opportunity cost". In Eatwell, John; Milgate, Murray; Newman, Peter. The New Palgrave Dictionary of Economics. The New Palgrave: A Dictionary of Economics (first ed.). p. 1.