供應
供應（粵拼：gung1 jing3；參見英文：supply）係經濟學嘅核心概念，指生產者喺唔同價錢之下，願意同能夠提供幾大量嘅貨品或者服務。一般嚟講，價錢升，供應量都會跟住升；價錢跌，供應量都會跟住跌。呢種正向關係就係供應概念嘅出發點。[1]
基本概念
[編輯]
定義上，供應講緊嘅係生產者願意供應幾多貨品或者服務，價錢係佢哋考慮嘅一個關鍵因素。若果某樣貨品或服務賣得貴咗，生產者就會有更大誘因去生產多啲，於是供應量就上升，因為營業額高咗。例如魚翅賣價貴咗（價錢升），供應商就好可能會加大進口或轉向非法捕撈，令到市面上流通嘅魚翅量多咗（供應量上升）。[2]
呢段價錢與供應量之間嘅關係，可以用供應曲線嚟表示。喺圖中，打橫嗰條軸代表供應量，打戙嗰條軸代表價錢。供應曲線一般向右上斜，反映「賣價愈高，供應商就會供應愈大量嘅貨或服務」呢個合乎直覺嘅經濟事實。
供應改變
[編輯]供應改變指嘅係喺同一個價錢水平下，生產者願意供應嘅數量「無端端」增加或者減少，呢種改變同件貨品服務本身嘅價錢無關。呢點有別於供應量改變——供應量改變係因為價錢郁咗，順住曲線走，供應量跟住變，而供應改變就係成條曲線郁。[3]
引致供應改變嘅成因有好多，例如
- 生產嘅成本變化：例如工人嘅人工平咗，就算價錢冇變，供應商都可以請多啲工人，供應到嘅量上升。
- 技術進步：價錢冇變，供應量都升到。
- 天氣同自然災害：例如水浸破壞農田，農作物少咗，就算價錢冇變，供應商有能力供應嘅量都跌咗。
- 政策變動
供應增加嗰陣，供應曲線會向右移（價錢不變，供應量升）；反之，供應減少條線就會向左移（價錢不變，供應量跌）。譬如街市嘅生果檔為例，如果入口香蕉嘅成本因為航運費跌而降低，成條供應曲線就會向右移，同一價錢下可以買到更多嘅香蕉。
供應改變會直接影響市場嘅均衡點：均衡係指供應量同需求量相等嘅狀態，即係幅供應需求圖入面供應曲線同需求曲線相交嗰點。
短缺發生嗰陣，啲買家就會爭貨，鬥俾高價錢買－推高個價，而盈餘發生嗰陣，啲賣家就要賤買手上嘅存貨－就會撳低個價。所以供應同需求理論亦都預測咗，長遠嚟講，任何貨品服務如果外在因素不變，佢個價格係會慢慢噉趨向均衡狀態，令到個供應量同需求量最後變成相等嘅，而當有某啲外在因素改變搞到成條供應曲線或者成條需求曲線有所改變嗰陣，個均衡價格會跟住變[4]。如果供應增加而需求不變，就會供過於求，價錢會跌；反之如果供應減少而需求不變，可能會推高價錢。
睇埋
[編輯]引咗
[編輯]- ↑ Mankiw, N. Gregory (1998). Principles of Economics, Wall Street Journal Edition. Dryden Press, San Diego. pp. 71–73. ISBN 0-03-098238-3.
- ↑ Melvin & Boyes, Microeconomics 5th ed. (Houghton Mifflin 2002)
- ↑ Goodwin, Nelson, Ackerman, & Weissskopf, Microeconomics in Context 2d ed. (Sharpe 2009) at 83.
- ↑ Dixon, H. (1990). "Equilibrium and Explanation". In Creedy. The Foundations of Economic Thought. Blackwells. pp. 356–394.
