市場流通度

「你想要呢件貨，就畀 799 文港幣我啦」－現錢嘅市場流通度高，可以攞嚟即時換取各種嘅貨同服務。

市場流通度（參照英文：liquidity），又叫市場流動度，係經濟學上成日講到、資產可以有嘅特性。某件資產嘅流通度係指件資產有幾容易可以攞去換做現錢（或者第啲資產）同時又唔影響佢嘅市場價值。

Liquidity（近似粵拼：lik6 kwik1 dit4 ti4）廣受投資者關注，好似現錢等流通度高嘅資產被指係容易受到通脹影響而實際價值跌，所以做買賣嗰陣，投資者梗要考慮啲資產嘅流通度有幾高，先至會做決定。

投資考量

2012 年英倫一地有棟建築物貼咗個 for sale 牌想搵人買－建築物呢種資產 liquidity 唔高，成日都要搞一大輪先賣得出。

睇埋：投資、通脹同波動性

想像現錢同屋呢兩種資產：

• 現錢可以話係流通度最高嘅嘢。人揸住啲現錢，只要佢夠錢，就基本上實可以攞啲錢換取任何貨同服務（點 1），同時佢買嘢嘅過程唔會搞到佢啲現錢嘅價值無端端變咗（點 2）。
• 相比之下，屋就唔同。一間屋要搵人買，往往要搞好多嘢，例如要同啲買家約時間睇屋，買家睇完屋通常仲會諗一大輪先至做決定－即係話屋難以快速轉做現錢（點 1）；另一方面，如果擁有間屋嘅人真係好急想將間屋轉換做現錢嘅話，佢有得選擇監平監賤賣咗間屋佢，最後用（例如）相當於間屋價值嘅 20% 嘅價賣出－想急住賣咗件資產嘅話，就會搞到佢嘅市場價值出現急劇變化（點 2）。

所以一般認為，同現錢比起嚟，屋係一種流通度低嘅資產。

喺會計同金融等嘅工作當中，流通度廣受關注：

• 原則上，投資者或者企業有必要喺任何時候都或多或少揸住流通度高嘅資產（例如現錢）－除咗心理上覺得安心啲之外，事實表明咗如果一個人手上揸嘅資產流通度低得滯，佢會容易喺等錢使嗰陣一時之間搵唔到錢週轉；
• 但同時好似現錢等流通度高嘅資產，又成日容易因為通脹而價值跌；

因為噉，從事會計同金融工作嘅人成日都要幫個人或者公司度橋諗（例如）「手上揸幾多現錢最穩陣」同埋「要將幾多手上嘅現錢轉做第啲資產，先至最著數」噉嘅問題。順帶一提，有唔少金融工作者主張，人手上嘅高流通度資產，起碼應該要夠佢 3 至 6 個月嘅生活。睇埋應急資金嘅概念。

相關嘅數

内文：流動比率同速動比率

睇埋：會計流通度

無論由實用定學術角度睇，要剖析一樣嘢，就有必要量度樣嘢－即係要搵方法計啲數出嚟，用數值反映研究緊嗰樣事物。响廿一世紀初，流通度相關嘅變數有好多種方法計。

流動比率係最常見嘅流通度相關數字之一，指流動資產同流動負債之間嘅比例，當中

• 一件流動資產係指預期可以喺未來一年內攞到嚟使嘅資產，例如手上嘅現錢或者可以短期內轉到做現錢嘅資產；
• 一件流動負債係指預期要喺未來一年內支付嘅負債；

流動比率條式就係

${\text{Lau dung bei leot}}={\frac {c_{1}}{c_{2}}}$，當中

$c_{1}$ 係流動資產，而 $c_{2}$ 係流動負債。流動比率仲可以進階啲變做速動比率－速動比率計法同流動比率一樣，唯一分別係 $c_{1}$ 保守啲，淨係包好似現錢呢啲可以近乎即時轉做現錢嘅資產。對於「流動比率同速動比率要幾多先算係好」呢條問題，會計同金融學界可以話係眾說紛紜：一般認為，流動比率最起碼要大過 1 先得，但有啲會計師主張流動比率要高過 2 先至算係穩陣。

亦都要留意，上述嘅式就噉望落好似好簡單噉，但會計師要實際噉同間企業計流動比率同速動比率嗰陣，佢要走去查好多有關間企業嘅營運嘅紀錄，而且佢仲要對「邊啲資產係可以快速轉做現錢嘅」有所認識，先至可以得知 $c_{1}$ 同 $c_{2}$ 嘅數值－佢要做嘅工作同用到嘅專業知識，遠遠唔淨只「代啲數入條式度」咁簡單。

睇埋

• 經濟泡沫：有經濟學家主張，經濟體「利率低得滯，同時有大量高流通度嘅資產流通」係經濟泡沫形成嘅主因。
• 外匯市場：一種出名流通度高嘅投資。
• 市場結構
• 實際價值

拎

• （英文） Understanding Liquidity and How to Measure It，投資百科講市場流通度嘅概念。