彈性 (經濟學)

喺經濟學上，彈性，粵拼：daan6 sing3，係需求同供應可以有嘅一種屬性，泛指需求量同供應量對價格改變有幾強嘅反應。彈性高，即係需求量同供應量傾向對價格改變有大反應，而反之彈性低，就係指兩個量對價格改變冇乜明顯反應。

概論

内文：供應同需求

例如某種貨品或服務嘅需求彈性，記作 $E_{d}$，係講緊對嗰種貨品服務嘅需求量對價格變動有幾敏感。價格上升嗰陣，幾乎所有貨品嘅需求量都會下降，即係需求定律講嘅嘢，但係唔同貨品嘅下降幅度可以爭好遠。需求嘅價格彈性就係指喺其他條件不變之下，價格每上升 1% 嗰時，需求量會出現幾多百分比嘅變化；如果彈性係 -2，即係話價格上升 1% 會令需求量下降 2%。呢個百分比高嘅話，就表示價格一升需求量就大跌，相比之下如果呢個百分比數值低，就表示價格唔會點樣影響件貨品服務嘅需求量。

某種貨品或服務嘅需求嘅價格彈性系數條式係：

$E_{\langle P\rangle }={\frac {\Delta Q/Q}{\Delta P/P}}$

需求彈性呢個概念，可以用需求同供應嗰種圖嚟思考，下邊兩幅圖嘅打戙條軸係價錢，打橫條軸係需求量：

• 
  高嘅彈性：價格跌少少，需求量大增。
• 
  低嘅彈性：價格跌好多，需求量都冇乜點變。

分析

喺經濟學上，必需品嘅需求價格彈性偏低，就算必需品嘅價格上升，消費者好多時都焗住要照買，例如糧食通脹下糧食變得愈嚟愈貴，消費者都仲係要買。

相比之下，奢侈品嘅需求價格彈性就傾向較高。

睇埋

• 通脹
• 斜率