多角投資

出自維基百科,自由嘅百科全書
呢個熒光幕顯示一隻資產嘅價嘅走勢;如果位投資者淨係攞住呢隻資產而隻資產冧,佢就咩投資就冇嗮。

多角投資粵拼do1 gok3 tau4 zi1英文diversification),又叫分散投資,係投資上成日講到嘅一個概念。多角投資最基本嗰個諗頭係做投資嗰陣,應該喺同一個 portfolio粵拼pou6 fou1 li4 ou4)入面有多種唔同資產,例如同時揸住啲股票又揸住啲債券而唔好淨係揸住單一一隻資產。即係要「由度」嚟做投資。

多角投資最重要嘅用途,係控制投資所涉及嘅風險:簡單噉講,如果一位投資者手上淨係揸住單一一隻資產,嗰隻資產個價冧嗰時,位投資者就會損失慘重,但如果位投資者手上揸多種唔同嘅資產,就會比較難出現「啲投資一嘢就化為烏有」噉嘅情況;因為噉,多角投資被指可以大幅噉減低投資帶嚟嘅風險。仲有唔少實證研究表示,多角投資的確能夠幫投資者長遠賺到更多嘅錢[1]

分散方法[編輯]

多角投資可以用好多唔同做法嚟達致「多種唔同投資」[1][2]

  • 揸邊種資產:投資可以透過好多種唔同嘅資產嚟做,包括股票債券不動產貴金屬外匯... 呀噉。例子可以想像一位鍾意低風險投資嘅投資者,手上揸住債券、貴金屬同埋一定量嘅外匯... 等好幾種風險偏低嘅資產。
  • 揸邊個 sector粵拼sek1 taa4)嘅資產:投資風險好多時都係會集中於打擊某個 sector 嘅;例如家陣政府話要立法,要限住啲人每個禮拜可以用幾多個鐘頭嚟上社交媒體,噉搞社交媒體嘅公司啲股價好有可能會受到打擊,如果一位投資者揸嘅股票冚唪唥都係社交媒體公司嘅,噉佢就會有相當嘅損失,而相比之下,如果佢揸吓社交媒體公司嘅股票同時又揸吓快餐店公司嘅股票,就冇咁易受制於呢啲專打擊某個 sector 嘅風險。
  • 間公司有幾創新;好多投資者都鍾意投資落啲大、有長期噉運行嘅公司度,但另一方面事實又表明,呢啲公司好多時出唔到咩大嘅創新重大創新成日都源於啲肯搏嘅人創業,而創新梗要重大先至會引致大幅度嘅價值提升[註 1];因為噉,有唔少投資者都會起碼留意吓個市場有冇咩有潛力嘅新創公司,並且投資錢嚟買呢啲新創公司嘅股票或者債券。一位行多角投資嘅投資者,好可能會同時揸吓啲大同穩定嘅公司嘅股票,又揸吓啲新創公司嘅股票。亦都可以睇埋價值投資呢個諗頭。
  • 啲資產屬乜嘢地區:例如想像而家美國經濟衰退,噉美國相關嘅資產(例如係好多美國公司嘅股票,或者買嚟做外匯投資嘅美金)好有可能價值會跟住跌;如果有位投資者一味淨係揸呢啲基於美國嘅資產,佢就會有損失;一位比較多角化投資者,往往會(例如)手上揸啲基於美國嘅資產、又會揸啲基於日本嘅資產、又會揸啲基於歐洲嘅資產... 呀噉。
  • 市場流通度:有啲資產流通度高啲,即係比較易轉做現錢,例如外匯噉;同時又有啲資產係流通度低嘅,可能要搞成幾個月先轉到做現錢,例如房地產噉;一個多角化嘅投資者,正路會揸啲流通度高嘅資產,同時又會揸住啲流通度低嘅資產。

有唔少金融理財領域嘅研究者,都想能夠做到盡可能咁精確,即係能夠畀到啲具體嘅數值出嚟解答「要攞幾多隻唔同嘅資產、要買幾多個唔同 sector 嘅股票、或者要買幾多個唔同地區嘅外匯,先最穩陣」噉嘅問題,不過到咗 2020 年代初,呢啲問題仲係好難解答[註 2][3]

統計概念[編輯]

  • 統計相關:可以用嚟量度一個 portfolio「有幾咁多角化」,如果個 portfolio 夠嗮多角化,噉佢涉及嗰啲資本嘅價應應該唔好有太強嘅正相關
  • 標準差變異數:都係成日畀人用嚟量度一個 portfolio「夠唔夠多角化」,夠穩陣低風險嘅投資,理應係回報數值嘅標準差同變異數都細嘅[4]
  • 中央極限定理

睇埋[編輯]

註釋[編輯]

  1. 不過大膽創新唔係「價值大幅提升」嘅充分條件,有好多大膽創新都係失敗收場嘅。
  2. 研究者指,其中一個主因係因為金融市場複雜系統,有好多唔同因素喺度影響投資者嘅得失。

引述[編輯]

  1. 1.0 1.1 Leković, M. (2018). Investment diversification as a strategy for reducing investment risk. Ekonomski horizonti, 20(2), 173-187.
  2. Medo, M., Yeung, C. H., & Zhang, Y. C. (2009). How to quantify the influence of correlations on investment diversification. International Review of Financial Analysis, 18(1-2), 34-39.
  3. Zaimovic, A., Omanovic, A., & Arnaut-Berilo, A. (2021). How many stocks are sufficient for equity portfolio diversification? A review of the literature. Journal of Risk and Financial Management, 14(11), 551.
  4. E. J. Elton and M. J. Gruber, "Risk Reduction and Portfolio Size: An Analytic Solution," Journal of Business 50 (October 1977), pp. 415-437.

[編輯]

  • (英文) 乜嘢係 diversification?投資百科講多角投資嘅基礎。
  • (英文) E. J. Elton and M. J. Gruber, "Risk Reduction and Portfolio Size: An Analytic Solution," Journal of Business 50 (October 1977), pp. 415-437,有實證研究指出,揸住多隻股票傾向會令投資回報率標準差(SD)下跌,簡單噉講即係令到「投資賺到幾多錢」呢個數值穩定啲。