風險管理
定義[編輯]
嘅事件。做親生意通常都或多或少噉會有啲風險。做風險管理嘅人要先諗吓最有可能發生嘅負面狀況有邊啲，分析吓每個負面狀況發生嘅機率，再做相應嘅措施嚟處理風險[1][2]。
舉例說明：想像家吓有一間公司喺香港搞建築，佢受人委託要起棟樓，香港係亞熱帶地方，夏天成日都打風，打風可能會損毀棟樓，而如果棟樓受損，個客可能會唔老嚟，跟手走去唱衰佢哋間公司（諗吓最有可能發生嘅負面狀況有邊啲）；做風險管理嘅人要按照各種因素－例如係棟樓嘅位置－計吓如果打起風上嚟棟樓受損嘅機會率有幾高（分析吓每個負面狀況發生嘅機會率），再諗吓一啲計嚟減低呢個風險，例如係安排資源搵啲專業嘅建築師幫手度吓棟樓要點樣設計先可以令棟嘢受損嘅機率下降到合理水平（做相應嘅措施嚟處理呢個風險）[2]。
風險管理涉及嘅工作包括咗[2]：
- 做資料搜集；
- 用數學模型計吓每件可能嘅負面事件發生嘅機率；
- 計吓如果某件事件發生咗，會做成幾負面嘅效果；
- 諗吓有乜嘢方法可以令風險下降到合理水平。
... 等等。
數學概念[編輯]
概率（probability），又叫機會率或者或然率，係風險分析當中最重要嘅數學概念。概率可以噉樣想像：家陣有若干件可能嘅事件，而分析者同每一個可能嘅事件都畀一個數值佢；每件事件掕住嗰個數值就係嗰件事件嘅概率 ，用日常用語講表示「件事件有幾大機會發生」，
- 0 表示一定唔會發生，
- 1 表示一定會發生。
响廿一世紀嘅概率論當中，啲人一般會用以下噉嘅數學符號嚟表示所講嘅嘢[3]：
- 啲人一般會用「」或者「」嚟代表「 發生嘅概率」，
- 而一場實驗嘅結果（）可以用噉嘅方式表達[4]－
－上述呢段符號意思係「 嘅概率係 」、「 嘅概率係 」... 呀噉； 可以想像成（例如）「擲骰仔得到嘅數」。
用返頭先個例子，想像而家間公司想喺香港嘅灣仔區嗰度起樓，分析者可以（簡單講）睇返過往嘅紀錄，睇吓灣仔區嘅樓喺夏天嗰幾個月內有幾大機率會因為打風而受損－條數嘅答案係
- 因為打風而受損嘅樓嘅數量，除以
- 同一時段內區內嘅樓嘅數量。
概率論同統計學仲有更加進階嘅方法可以計風險，例子可以睇吓條件概率同迴歸分析（尤其係結果二元嘅邏輯迴歸）等嘅技術。
金融應用[編輯]
風險管理方面嘅概念，成日會畀金融投資方面嘅工作者攞去用：投資嘅嘢，梗會有風險；對投資有返咁上下熟嘅人做投資嗰陣，都梗會想搵返啲方法嚟衡量單投資有幾大風險。
例如受險價值（value at risk，VaR）就係金融相關分析上成日用嘅一隻統計數字，會反映指定一單投資同一段時期，一位投資者（投資者可以係個人以至成間公司）「最多可以唔見幾多錢」，籠統啲講即係話 VaR 反映緊位投資者承受住幾多嘅風險；正常嚟講，計 VaR 應該會得出好似以下噉嘅資訊[5]－
- 「手上睇緊嗰件資產，有 3% 嘅 1 個月 2% VaR」
上面句嘢意思係話，喺嚟緊嗰 1 個月之內件資產有 3% 咁大嘅機率價值會跌 2% 咁多。抽象化啲嘅話
- 「手上睇緊嗰件資產，有 x% 嘅 [時段] y% VaR」
→ 呢句嘢意思等同「喺嚟緊 [時段] 咁耐嘅時間內，件資產有 x% 咁大嘅機率價值會跌 y% 咁多」。 VaR 有多種計法，最簡單嗰隻係走去睇返件資產嘅過往紀錄，並且假設將來嘅走勢會同過往嘅相似（或者最少唔係爭咁遠），睇吓件嘢過往跌得最勁係試過跌幾多，同埋噉嘅跌勢有幾常發生[6]。
應付風險[編輯]
投資者有好多技巧可以用嚟應付投資常見嘅風險。
- 多角化投資（diversification）：指投資者套投資組合持有多種唔同嘅資產，即係例如一位投資者揸住啲股票又同時揸住啲債券，唔淨只揸住單一一款資產；又或者會揸吓啲大（大通常即係穩定）嘅公司嘅股票，同時又會揸吓啲細嘅新創公司嘅股票；又可能係手上同時揸住基於美國嘅資產、又揸住基於日本嘅資產、又揸住基於歐洲嘅資產... 呀噉[7]。
- 證券投資基金（investment fund）：指成班投資者將佢哋啲錢夾埋一齊，跟住再（通常）請返個識做投資管理嘅人幫佢哋手攞呢嚿錢去做投資；例如一班人將佢哋嘅錢夾埋一齊，有 100 萬美金，跟住佢哋請位投資管理者幫佢哋手攞嚿錢去投資，最後嚿錢變咗 200 萬，班人就齊齊將賺到嗰 100 萬攞去分咗佢。一般認為證券投資基金有唔少好處，包括係規模經濟（交易成本低）同埋一班人一齊承擔風險呀噉[8]。
- 短倉（short）：一類進階嘅投資做法（唔建議投資新手用），泛指一啲「預件資產價值會跌，跌咗就會有利可圖」嘅做法；最常見嘅做法係賣空－想像依家位投資者借一件資產返嚟，再賣咗件資產佢，等到遲啲佢就要買返件資產返嚟還畀債主，如果期間件資產嘅價跌咗，噉呢位投資者就有賺[9]。
工程應用[編輯]
.jpg)
工程工作都要面對風險方面嘅問題。
容錯能力（fault tolerance）係指一個系統「喺某個或者某啲組成部份故障嗰陣，有幾能夠繼續正常運作」，亦都包埋個系統喺呢種情況下「表現會跌幾多」[10]：
- 冇容錯能力：一旦個系統其中一橛出咗錯，就成個系統軭嗮；
- 有咁上下容錯能力：一旦個系統其中一橛出咗錯，佢依然行到，但表現會明顯變差；
- 「得體」嘅容錯能力（得體降級）：隨住系統越來越多出錯，佢依然行到，表現只會細微噉變差。
舉個例說明，啲大型嘅船同飛機好興設計成有多過一部發動機；噉如果架嘢嘅主發動機出咗故障，佢哋就可以改為用後備發動機嚟推動架嘢，等架嘢仲可以繼續行，或者起碼有足夠時間駛去安全嘅地方。相比之下，私家車就比較少會落呢種噉嘅設計，因為要同架車加多部發動機成本極高－汽車係要量產嘅（相比之下，例如大型郵輪就唔使量產），吓吓都加後備發動機要使多好錢，而且架車個殼又裝唔落兩部發動機，而要將架車設計到大啲又係搞到成本大增。除此之外，因為大型嘅船同飛機「大」，就表示佢哋出起事上嚟死得人多，更加令工程師有強烈誘因同呢啲船同飛機加多啲後備發動機，令系統嘅容錯能力高啲。
睇埋[編輯]
攷[編輯]
- ↑ Lehar, A. (2005). Measuring systemic risk: A risk management approach. Journal of Banking & Finance, 29(10), 2577-2603.
- ↑ 2.0 2.1 2.2 Al-Bahar, J. F., & Crandall, K. C. (1990). Systematic risk management approach for construction projects. Journal of Construction Engineering and Management, 116(3), 533-546.
- ↑ Bain, Lee J.; Engelhardt, Max (1992). Introduction to Probability and Mathematical Statistics (2nd ed.). Belmont, California: Brooks/Cole. p. 53.
- ↑ Murphy, K. P. (2012). Machine learning: a probabilistic perspective, p. 35. MIT press.
- ↑ Value at Risk (VaR). CFI.
- ↑ Feuerverger, A., & Wong, A. C. (2000). Computation of value-at-risk for nonlinear portfolios. Journal of Risk, 3, 37-56.
- ↑ Medo, M., Yeung, C. H., & Zhang, Y. C. (2009). How to quantify the influence of correlations on investment diversification. International Review of Financial Analysis, 18(1-2), 34-39.
- ↑ Goetzmann, William N.; Rouwenhorst, K. Geert (2005). The Origins of Value: The Financial Innovations that Created Modern Capital Markets. (Oxford University Press.
- ↑ Short sellers make VW the world's priciest firm. Reuters.
- ↑ Adaptive Fault Tolerance and Graceful Degradation, Oscar González et al., 1997, University of Massachusetts - Amherst
拎[編輯]
維基同享中有關風險管理嘅資源類- What Is Risk Management in Finance, and Why Is It Important?（英文），Investopedia 講金融學點樣用風險管理。
