跳去內容

投資

出自維基百科，自由嘅百科全書
一個熒光幕顯示啲股票嘅價格－買賣股票係一種常見嘅投資。
美國康湼狄格州一間屋－買賣不動產都係投資嘅一種形式。

喺經濟學上，投資tau4 zi1（英文：investment）係指一個個體或者群體短期內消耗資源（投入資源）換取一啲資產，並且諗住靠呢啲資產嚟長遠噉得到更大嘅利益[1][2]。

舉例說明，投資者喺金融市場使錢（消耗錢呢樣資源）買股票（資產），而佢預咗呢啲股票遲吓會升值－所以第時佢就可以賣手上嘅股票嚟得到利潤（長遠得到更大嘅利益）。再廣義啲講，投資可以包埋教育等嘅活動，例如一個人短期內消耗時間同錢讀返個學位，預讀咗個學位會喺第時提高自己搵錢嘅能力[3]。

喺經濟學同金融學等嘅領域上，有好多工作者都想分清楚投資同投機兩個概念：佢哋指，有好多人做「買資產，預咗打後會得益」呢樣嘢嗰陣，冇詳細嘅計劃，對自己做緊嘅投資一無所知亂咁買，好多時搞到自己最後損手爛腳，而呢啲經濟學同金融學工作者就主張，呢啲噉嘅行為應該屬投機而唔係真正嘅投資；投機嘅簡單例子有「未清楚理解一間公司就買佢哋股票，淨係諗住齋靠股價嘅短期上落嚟快速獲利」[4]。

投資喺經濟學同金融學上係一個大課題：一位投資者揀邊啲資產嚟買、「幾時買」同「幾時賣」等嘅因素都可以影響佢嘅最後所得；投資策略就係泛指一位投資者對「自己要點做投資」嘅策略，涉及好多對「投資呢家嘢應該按咩法則做，利潤先至會高」嘅深入思考。喺廿一世紀初，因為投資呢家嘢咁專業，好多人玩投資嗰陣都會特登出錢請專家（例如獨立理財顧問）幫手度投資策略[5]。

定義

[編輯]
而家個人手上得到啲錢，佢應該即刻使咗佢，定係將啲錢投放落去「令自己將來有多啲錢使」嘅嘢嗰度呢？
睇埋：經濟學、個人理財同消費

喺經濟學上，投資嘅嚴格定義係指「消耗資源嚟換取一啲資產，而嗰個個體噉做嘅目的係想等自己第時多啲錢使」[6]：一個個體進行生產活動會得到資源，而佢可以用呢啲資源做消費－即係消耗呢啲資源嚟即時噉滿足自己嘅需要同慾望，又可以用啲資源做投資－消耗啲資源嚟長遠自己嘅利益；舉個簡單例子說明，一個人做嘢賺到錢（得到資源），佢可以

  • 將啲錢使嚟買一啲即時滿足到自己需要同慾望嘅嘢，好似係買餸嚟滿足自己「要食嘢」嘅需要，即係消耗資源得到「餸」呢樣能夠即時噉有價值嘅嘢－消費；
  • 另一方面，佢又可以將啲錢使嚟買貨（假設佢有充分理由信呢啲貨會升值）再喺一段時間之後，靠賣走啲貨嚟賺利潤，即係消耗資源得到啲會喺一段時間後提升自己利益嘅資產－投資[1][2]。

順帶一提，有關消費同投資之間嘅對比，可以睇吓延遲折扣嘅概念[7]。

概念比較

[編輯]
内文：投機同賭錢

有好多經濟學同金融學等領域嘅研究者都主張，投資有別於投機[歐 1]同賭錢，主要在於幾點[8]：

  • 持有時期：投資者會攞住為投資買嘅資產攞一段相對長嘅時間，投機者會攞住啲資產攞一段短時間，而賭錢嘅人近乎唔會買啲乜嘢資產；
  • 分析程度：投資者會為咗做投資做好多詳細嘅分析，投機者靠嘅頂櫳係小道消息，而賭錢靠嘅係運氣；
  • 結果出現嘅時間：投資回報需要一段有返咁上下長嘅時間先會浮現，而投機同賭錢嘅時期短。

例如有好多人喺買股票嗰陣都會噉樣做：佢哋冇清楚理解一間公司嘅情況，唔知間公司响業務上前景好唔好，所以冇充分理由真係信間公司嘅股票會升值，淨係諗住齋靠股票市場實會有嘅週期上上落落嚟獲利。而有好多研究者都認為，呢種行為喺概念上理應係有別於投資嘅－於是就將呢啲活動定性為投機[註 1][8]。

投資形式

[編輯]
睇埋：金融學、投資管理、投資組合、房地產同市場流通度

投資可以透過好多種資產嚟做。廿一世紀初比較常見嘅投資形式有以下呢啲[9][10]：

金融工具

[編輯]
一位投資者喺度用幾個熒幕睇住自己買咗嗰幾隻股票嘅勢。
内文：金融工具同金融衍生工具
  • 股票[歐 2]：指一間上市公司嘅擁有權嘅一部份；如果一個人買咗間公司嘅股票（持有若干量嘅股份），噉佢就係間公司嘅股東，算得上係間公司嘅擁有者之一，會（視乎佢持有幾多股份）喺間公司嘅營運上或多或少噉有啲話事權；噉亦都表示，如果嗰間公司喺業務上得到成功，啲股東就有權分利潤，而一個股東分到嘅利潤嘅量通常係佢持有愈多股份就會愈多嘅；一個人會買一間公司嘅股份通常都係因為佢睇好間公司嘅前景，而由間公司嘅角度睇，賣股票可以幫自己籌集擴張業務（睇埋商業發展）必要嘅資金[11]。
  • 債券[歐 3]：基本上係債券持有者借錢俾一間公司嘅途徑；買咗債券嘅人唔算係擁有間公司，唔會喺間公司嘅營運上有乜嘢話事權，但佢哋手上攞住啲債券，就表示間公司爭咗佢哋錢，所以間公司就需要定時定候還啲錢（而且仲有利息）；原理上，債券同股票好相似，都係一間公司想要籌集擴張業務要用嘅資金賣嘅，而如果啲投資者睇好間公司，覺得間公司係會愈轆愈大令到自己賺到錢嘅，就會肯使錢買債券同股票[12]。
  • 金融衍生工具[歐 4]：金融衍生工具係金融工具一種，特徵係價值建基於第種金融工具嘅價值之上；有以下呢啲種類：
    • 期貨[歐 5]：係一種協議，喺做個協議之前，買賣雙方講好個價，並且同意响第時嘅某個時間點會買或者賣某樣嘢（可以係股票或者債券等嘅金融工具，即係話件期貨嘅價值建基於交易緊嘅股票或者債券嘅價值）；例如家陣 A 同 B 兩位投資者同意，一個月後 A 會用 咁多嘅錢買起 B 手上嘅 公司嘅股份，如果 公司嘅股價喺呢一個月之內升嘅話，A 就會著數咗－等同可以用低啲嘅價錢買入啲股份，而 B 會肯噉賣法可能係因為佢預隻股嘅價嚟緊會跌，或者係好等錢使所以唔想冒險[10]。
    • 期權[歐 6]：都係一種協議，買賣雙方講好個履約價[歐 7]同埋一個日期，而其中一方有權喺嗰個日期打前用履約價買或者賣某樣事先講好咗嘅嘢（同一道理，呢樣嘢可以係股票或者債券，而噉亦都表示，期權嘅價值建基於交易緊嘅股票或者債券嘅價值）；期權協定嘅係其中一方「有權」買或者賣－相對於期貨嘅「一定要」買或者賣[13][14]。
  • 外匯[歐 8]：即係靠買賣通貨（港紙、美金同日圓呀噉）嚟做嘅投資；舉個簡單例子說明，想像家陣有個住喺日本嘅人手上揸住啲日圓，佢睇到而家呢刻日圓同美金之間嘅匯率係 $1/114－意思係指每 1 文美金值 114 円日圓；而佢（可能因為美國經濟好景等嘅原因）預美金嚟緊會升值，於是[15]
    1. 佢使 5,000,000 円買美金，買到 43859.65 文咁多美金；
    2. 喺跟住落嚟嗰幾個月，美金真係一如佢所料噉升值，最後日圓同美金之間個匯率變咗做 $1/120（美金貴咗）；然後
    3. 佢就將手上啲美金轉返做日圓，買到 43859.65 × 120 = 5,263,158 円咁多日圓，最後賺咗 5,263,158 - 5,000,000 = 263,158 円咁多日圓；
    • 喺跟住落嚟嘅時間入面，佢長時間（以年計）重複噉做以上嘅步驟，同時一路係噉留意住世界各大經濟體响通脹率同利率呢啲（已知會影響匯率嘅）因素上嘅變化，有技巧噉揀「買邊隻通貨」同埋「幾時買」，就可以慢慢將自己嚿儲蓄轆到愈嚟愈大，可以用嚟抗通脹[16]。
  • 保險：例如人壽保險都可以算係投資；一個人買咗人壽保就表示，佢要俾一定量嘅錢（短期內有代價），而喺佢死咗之後，佢嘅保險受益人（通常係佢屋企人）會攞到一筆有返咁上下大嘅錢（長遠嘅大嚿利益）；買人壽保都有一定嘅學問－例如家陣買咗一份人壽保，但如果喺買至攞到錢期間有極大嘅通脹嘅話，份人壽保嘅實際價值可以話係跌咗[17]。

... 等等。

實質資產

[編輯]
2022 年喺香港深水埗影到嘅金鈪；買黃金可以保值，係一種頗受歡迎嘅投資方法。
2019 年加州呢一座葡萄酒窖，儲住咗好多支葡萄酒。座酒窖喺氣溫等嘅多種條件上都調較到啱啱好，確保啲酒唔會變味。
睇埋：資產、財產、商品市場、收藏同囤積 (經濟學)
  • 不動產[歐 9]：不動產泛指地以及地上面嘅結構（例如係屋）；買賣不動產係一種常見嘅投資－想像家陣一個人俾錢買咗間屋（短期付出資源），而間屋或者笪地嘅價錢喺一段時間後升咗，噉到時佢將間屋賣俾人就有賺，而買同賣嗰段期間，佢又可以透過俾人租間屋住嚟賺錢（長遠得到多啲嘅資源）；同股票等嘅金融工具比起嚟，不動產嘅流通度[歐 10]低啲，即係話買嘅過程同賣嘅過程都比較嘥時間，唔係話賣就賣得到，而且不動產往往仲要求持有人使錢嚟維持－屋等嘅建築物要維修，唔維修嘅話間屋就會開始爛，間屋爛就會變到冇咁值錢。如果投資者唔識呢啲嘢，好易搞到自己損失慘重[18][19]。睇埋房地產。
  • 貴金屬：貴金屬係指罕有、具有高經濟價值嘅自然金屬，例如係金、銀同白金呀噉；呢啲金屬化學上穩定（唔易因為同第啲嘢起化學反應而走樣，所以好襟擺），有好多實用價值，例如係攞嚟整銀仔同珠寶，而喺現代有唔少科技產品都會用到呢啲貴金屬，例如金就成日俾人鍍落去電子電路嗰度嚟幫手導電[20]；噉即係表示，貴金屬係一啲有恆定經濟價值嘅嘢，所以能夠保值－簡單例子：家陣有個人使咗 咁多錢嚟買咗柞貴金屬，跟住通脹，搞到 呢個量嘅錢嘅實際價值跌，但因為貴金屬依然仲係咁有用（實際價值冇變），於是個買咗貴金屬嘅人可以喺呢個時候賣咗啲貴金屬佢，得到 咁多錢（）－佢買貴金屬保護咗自己免受通脹嘅影響[21]。
  • 藝術品：藝術品除咗可以買嚟裝飾家居之外，仲可以用嚟做投資；原則上，藝術品可以好似股票噉升值－例：想像有個人由某位後生藝術家嗰度買咗幅畫，跟住佢將幅畫掛喺屋企埲牆上面做裝飾，若干年之後，嗰位後生藝術家成名（或者個經濟體入面啲人變得有錢，對藝術品等嘅奢侈品需求上升），令到幅畫嘅價值上升，個人就可以將幅畫賣咗佢賺錢。藝術品係一樣頗為高風險、低流通度嘅投資品，而且好長遠－專家指，投資藝術品要成起碼 10 年先會見到回報[22]。
  • 葡萄酒：事實表明，陳年嘅葡萄酒好多時都畀人覺得零舍好飲[23]，而古舊嘅葡萄酒可以價值連城，一支值成幾廿萬銀美金嘅都有[24]－噉即係話葡萄酒有可能隨住時間價值上升，所以可以攞嚟做投資；事實係，有啲人會買葡萄酒嚟收藏，靠呢啲收藏做自己嘅投資；不過要留意嘅係，葡萄酒可以按成份或者產地等嘅因素分做好多唔同類，而且儲起上嚟要有技巧，如果唔係嘅話就會搞到啲酒變味，而變味就會喪失價值，所以要玩呢種投資，有需要對葡萄酒有返咁上下認識先得[25]。

... 等等。原則上，如果一樣資產係可以攞嚟做投資嘅，噉呢樣資產實要能夠有可能隨時間升值或者保值。好似係屋、貴金屬同藝術品等嘅物品都係有可能升值或者保值嘅；相比之下，例如買生果通常唔會算係一種投資－正路嚟講，生果唔襟擺，一過咗咁上下耐嘅時間就會變到冇咁新鮮甚至會腐爛，即係話好似生果[註 2]呢啲噉嘅物品，價值基本上實會隨時間下跌[9]。

第啲形式

[編輯]
  • 儲錢：指將賺到嘅錢唔使住，並且擺落去一啲安全嘅地方，等第時先至攞返出嚟用；儲錢响廣義上可以算係投資－喺廿一世紀初嘅社會，啲人儲錢多數會儲落銀行嗰度，而銀行會俾利息，所以嚿錢理論上係會愈變愈大嚿嘅（而家唔使錢變成第時多咗錢使）。一般嚟講，儲錢係低風險低回報嘅，因為銀行儲蓄戶口嘅利息一般都唔係好高（例：美國 2021 年一個人儲錢每年平均淨係會賺到大約 0.04% 嘅利息[26]），而且政府好多時仲會為咗鼓勵啲人攞啲錢去做第啲投資而減利率，搞到儲錢賺到嘅利息少咗[27]。
  • 教育：教育都可以算係廣義上嘅投資；啲人好多時會為咗讀書或者供仔女讀書而儲錢（啲錢而家唔使住），期望噉做能夠喺將來俾自己或者仔女讀一啲學位，預呢啲學位讀咗會提升自己或者仔女賺錢嘅能力（將來有更加大嚿嘅回報）[28]。

... 等等。

Info：孖展

孖展係一種高風險嘅投資做法。

要投資就實要買啲金融資產（股票、forex... 等）返嚟。喺正常情況下，買資產用嘅錢係由位投資者嘅經紀戶口度直接畀嘅，即係例如位投資者戶口有 5,000 文美金，噉佢就頂嗮攏都淨係可以使 5,000 文美金買資產，如果位投資者想要再買多啲，就要入錢落個戶口；孖展就唔同，會容許投資者借錢嚟買資產，投資者要確保個戶口入面嘅錢量 kip1 住喺某條 maa1 zeon2（可能漢字：孖燼；嚟自英文 margin 一字，即係英文邊界噉解）以上，噉亦即係話一旦例如投資者買咗嘅資產個價冧，搞到戶口入面嘅錢量跌到落低過條孖燼嘅水平，投資者就會收到 ko1 叫佢擺錢入個戶口度，令戶口嘅錢量返到孖燼以上。噉即係話，孖展會令投資者有能力揸到更多嘅資產，所以理論上有可能有高回報，但同時又有高風險－時不時都會有投資者投資孖展投到爭落一身債。

因為噉，投資專家一般都唔建議投資新手玩孖展[29]。

呢幅圖，顯示緊 2022 年唔同 ETF 嘅總值；ETF 係一種證券投資基金，投資者可以好似買賣單一股票噉樣買賣一隻 ETF，喺唔同平台（例如投資用嘅流動應用程式）上都可以買賣。一隻 ETF 通常會設定做追蹤住某個特定指數、商品、債券或者一籃子資產，可以係（舉例嚟講）一籃子嘅股票加上黃金。所以本質上就做到多角投資。
呢幅圖，顯示緊 2022 年唔同 ETF 嘅總值；ETF 係一種證券投資基金，投資者可以好似買賣單一股票噉樣買賣一隻 ETF，喺唔同平台（例如投資用嘅流動應用程式）上都可以買賣。一隻 ETF 通常會設定做追蹤住某個特定指數、商品、債券或者一籃子資產，可以係（舉例嚟講）一籃子嘅股票加上黃金。所以本質上就做到多角投資。 

經濟影響

[編輯]
一架貨船運緊貨；一個經濟體內部同經濟體之間要有商貿活動，就實需要資金－租貨船同運貨等嘅工作冚唪唥都會消耗資源。
内文：本地生產總值、經濟增長同金融市場
睇埋：利息同利率

喺廿一世紀嘅世界，投資對經濟增長嚟講好重要[30][31]：

  • 一盤生意要增長就實要用資本，例如家陣有間工廠想要提升自己生產效率，等自己第時賺多啲利潤，噉佢哋首先需要做嘅嘢就係使錢嚟得到多啲生產用嘅資本（例如係機械同工人呀噉），令到成間工廠嘅生產量提升，而喺呢個過程當中，佢哋需要資金－「買新嘅機械」同「請新嘅工人」等嘅嘢冚唪唥都係錢。
  • 生意增長嘅過程會引致交易嘅發生，產生經濟增長（生產多啲嘢，滿足多啲慾望）嘅動力，例如間工廠由整生產用機械嘅廠嗰度購置機械，甚至乎研究點提升生產效率－當成個經濟體入面嘅人同埋組織各自為咗令自身利益最大化而擴充自己嘅生意嗰陣，就會令到個經濟體入面有更加多嘅經濟活動，產生更多嘅經濟價值，提升個經濟體嘅生產能力。

响上述嘅呢個過程當中，好似買股票等嘅金融投資活動會令到啲上市公司多啲資金使，而呢啲上市公司有資金就會為咗賺多啲錢而擴充自己嘅生意，令到上述嘅生產力提升過程得以進行。事實表明咗，响廿一世紀初嘅世界，各經濟體嘅本地生產總值（GDP）有好大部份都係因為投資而有嘅，例如喺 2017 年，中國齋係對固定資本[歐 11]（指機械等實質、喺生產過程當中俾人重複噉用嘅資本）嘅投資就經已霸咗 GDP 嘅成大約 42% 咁多[32]。

市場情緒

[編輯]
内文：市場情緒

市場情緒[歐 12]指一個金融市場入面啲投資者嘅普遍態度，大致上可以分兩種[33][34]：

  • 牛[歐 13]市指啲投資者普遍預期個金融市場嘅價值會升（好似隻牛角噉向上指），而
  • 熊[歐 14]市指啲投資者普遍預期個金融市場嘅價值會跌（好似隻熊掌噉向下拍）。

市場情緒展示咗投資當中存在嘅不理性：市場情緒由投資者嘅心理主宰，有陣時可以搞到金融市場有大嘅上落；好似係恐慌性拋售[歐 15]噉，就係金融學上一種相當受關注嘅現象－恐慌性拋售涉及個市場啲投資者突然間變到普遍都好想賣走手上嘅股票（例如可能有小道消息傳出，講啲上市公司利潤大跌），噉就會搞到股價突然間大跌，而呢種大跌會造成市場入面嘅上市公司突然唔見咗好大量嘅資金，對個經濟體嚟講可以好大鑊－啲上市公司嘅生產能力突然間大跌，可以引發嚴重嘅經濟衰退[33][35]。

法蘭克福證券交易所外面嘅牛熊雕像

投資策略

[編輯]
内文：投資策略
睇埋：套戥、多角投資同風險

投資策略係金融學等領域上好受關注嘅一個課題。廿一世紀初嘅投資策略通常都仲係經驗之談－主要係由玩投資玩得多嘅人諗，「有乜嘢投資行為大機會會令自己賺到錢」，「有乜嘢投資行為大機會會搞到自己有損失」，並且靠呢啲經驗嚟教人「投資嗰時要守啲乜嘢法則」[36]。

喺廿一世紀初，比較常用嘅投資策略有以下呢啲：

  • 價值[歐 16]投資：指個投資者集中買認為係價錢低得滯嘅嘅股票；採用價值投資嘅投資者認為，靠金融投資賺錢嘅重點在於「市場上嘅第啲投資者唔能夠準確噉評估啲公司嘅潛力」－佢哋認為自己要做嘅嘢係用基本分析對見到嘅上市公司作出分析，由呢啲分析嗰度搵出第啲人唔識珍惜嘅公司嘅股票，買入呢啲股票，而等到呢啲股票一如自己預期升嗰陣，自己就有賺[37]。好出名嘅「股神」巴菲特[歐 17]就好鍾意用價值投資呢種策略[38]。
  • 增長[歐 18]投資：指個投資者集中買一啲升值潛力高嘅股票；採用增長投資嘅投資者著眼於市場同公司嘅增長潛力－佢哋會分析唔同產品嘅市場，睇吓邊啲產品嘅公司喺未來最有增長潛力，再（用基本分析嘅結果同過往股價等嘅指標）睇吓呢啲產品嘅公司當中邊間最似會增長，然後就買入嗰啲公司嘅股票。廿一世紀初嘅研究指，增長投資嘅表現（長遠嚟講賺到幾多錢）冇價值投資咁好[39]。
  • 動量[歐 19]投資：指個投資者集中買啲近排喺度升值嘅股票；動量投資嘅觀點主張，最能夠預測一隻股票嘅未來價錢嘅資訊就係嗰隻股票早排（一般係過去 3 至 12 個月）嘅價錢－就好似股價嘅上落會有動量噉，一隻股票愈升佢股升勢就會愈勁，一隻股票愈跌佢股跌勢就會愈勁，所以投資者要做嘅就係「買嗰排升勢勁嘅股票」同埋「賣嗰排跌勢勁嘅股票」。採取動量投資策略嘅投資者好睇重評估股價嘅升勢同跌勢，途中成日會用到數據科學上嘅技術[40]。
  • 平均成本法[歐 20]：同上述嗰幾隻策略唔互斥嘅做法；指揀好一隻策略，然後响一段時間內（例如一年內）每隔一段時間（例如每隔一個月）就將一嚿特定嘅錢攞嚟按揀咗嗰隻策略嚟做投資，例：喺一年內每隔一個月就揼 1,000 文嚟做價值投資。呢種做法被指係低風險，因為用呢種做法嘅投資者頂嗮櫳都只係會損失定咗嗰嚿投資用嘅錢[38]。

... 等等。

幾個人喺度留意住啲股票嘅價：
價值投資者：邊啲公司嘅潛力最受到低估呢？
增長投資者：邊啲公司業務最可能會增長呢？
動量投資者：邊隻股票嘅價近排升得最勁呢？

簡史

[編輯]
17 世紀中一幅油畫；幅畫描繪當時嘅阿姆斯特丹證券交易所。
睇埋：荷蘭東印度公司同阿姆斯特丹證券交易所

嚴格嚟講，最廣義上嘅投資早喺文明起源打前經已存在：喺人類發明文字之前，世界各地嘅人都已經或多或少噉有農業[41]，亦即係話佢哋要做出「手上有嘅蔬果，而家食咗佢好吖，定係應該攞去種，等自己第時有更多蔬果呢？」噉嘅決策－「將啲蔬果攞去種」經已可以算係投資嘅一種。

金融投資呢家嘢嘅起源係喺中世紀（5 至 15 世紀）嘅中後期：金融投資最早可以追溯到去伊斯蘭黃金時代（大約 8 至 14 世紀嘅伊斯蘭世界），當時嘅伊斯蘭世界喺經濟同科學等各方面有巨大嘅發展，佢哋開始有咗啲原始嘅金融工具，例如係俾若干個投資者將自己嘅資本交俾一個代理，然後個代理跟手就攞啲資本嚟做貿易，賺到利潤就會同啲投資者分，不過損失咗啲資本嗰陣個代理就唔使孭乜嘢責任；呢種安排可以話就好似係原始嘅股票同債券噉－投資者將資本交俾一個做生意嘅人，盤生意賺到利潤，啲投資者就有利潤分[42]。

及後喺大航海時代（15 至 18 世紀）嗰陣，歐洲人大舉噉四周圍探索同做生意，出現咗世上第一間證券交易所－一般認為，史上第一間證券交易所係由荷蘭東印度公司喺 1602 年嗰時成立嘅阿姆斯特丹證券交易所[歐 21]，當時荷蘭東印度公司開始賣自己嘅股份，係史上第一間賣自己股份嘅公司，正式開展咗好似現代金融投資噉嘅活動[42]。

到咗廿一世紀初，金融投資呢家嘢經已相當普遍，一般市民大眾都會或多或少噉做投資（當中投資外匯零舍受歡迎），有唔少人仲會請理財計劃師等嘅專業人士提供有關投資嘅建議[42]。

睇埋

[編輯]
  • 經濟泡沫：泡沫成日會搞到啲投資者損手爛腳；投資界間中就會出現一種情況，涉及啲投資者一時之間極度睇好某隻資產，諗住隻資產買咗係「包賺」噉嘅樣，於是就個個爭住走去買，推到個價高一高，但一旦個價高到咁上下，啲人就會發覺隻資產嘅潛力遠遠冇原先想像嘅咁高，跟住隻資產個價就插水式噉冧，而使咗好多錢買隻資產嘅投資者，就個個都損失慘重。
  • 證券詐騙：例如龐氏騙局[歐 22]就成日畀人用嚟呃啲冇乜投資經驗嘅投資者；喺最基本嗰種龐氏騙局下，行騙嘅人會呃啲投資者，話有個好正嘅投資機會，誘使投資者將錢交畀佢，然後行騙方會再搵第啲投資者，並且同後者講相同嘅嘢引誘後者畀錢，跟住行騙方就會將新嗰啲投資者嘅錢畀返去打前嘅投資者度，話嗰啲錢係盤投資賺返嚟嘅－如是者，佢就呃到愈嚟愈多嘅人[43]。
  • 貪心：專家指出，啲人玩投資玩到損手爛腳，好多時係皆因佢哋貪心。
  • 上市公司
  • 投資銀行
  • 財務管理
  • 技術分析
  • 風險判斷
「
玩投資係鬥跑馬拉松，唔係鬥短跑。[註 3][44]
 」

註釋

[編輯]
  1. ↑ 不過亦有唔少研究者主張，投機可以定義做「投資嘅一種，指比較高風險同冇遠見嘅投資」。
  2. ↑ 除非個人打算攞啲果核去種新嘅生果或者點。
  3. ↑ 句嘢講緊投資係要歷經幾十年咁耐嘅時間慢慢轆大嚿錢嘅，「手上嘅資產一嘢升幾百倍」呢家嘢係可遇不可求。

引述

[編輯]

文中用咗嘅詞彙嘅英文（或者其他外語）版：

  1. ↑ speculation
  2. ↑ stock
  3. ↑ bond
  4. ↑ financial derivatives
  5. ↑ futures contract
  6. ↑ option
  7. ↑ strike price
  8. ↑ forex
  9. ↑ real property
  10. ↑ liquidity
  11. ↑ fixed capital
  12. ↑ sentiment
  13. ↑ bullish
  14. ↑ bearish
  15. ↑ selling climax
  16. ↑ value
  17. ↑ Warren Buffett
  18. ↑ growth
  19. ↑ momentum
  20. ↑ dollar cost averaging，DCA
  21. ↑ Euronext Amsterdam
  22. ↑ Ponzi scheme

文中引述咗嘅學術文獻或者網頁：

  1. ↑ 1.0 1.1 Barber, B. M., & Odean, T. (2000). Trading is hazardous to your wealth: The common stock investment performance of individual investors. The Journal of Finance, 55(2), 773-806.
  2. ↑ 2.0 2.1 Hartzell, D., Hekman, J., & Miles, M. (1986). Diversification categories in investment real estate. Real Estate Economics, 14(2), 230-254.
  3. ↑ Schultz, T. W. (1961). Investment in human capital. The American economic review, 1-17.
  4. ↑ Szado, Edward (2011). "Defining Speculation: The First Step toward a Rational Dialogue". The Journal of Alternative Investments. CAIA Association. 14: 75–82.
  5. ↑ Grossman, S. J., & Zhou, Z. (1993). Optimal investment strategies for controlling drawdowns. Mathematical finance, 3(3), 241-276.
  6. ↑ Hayes, A. (2021). [1]. Investopedia.
  7. ↑ "I want the money now!" Why do we rarely invest in the future? 互聯網檔案館嘅歸檔，歸檔日期2019年6月29號，..
  8. ↑ 8.0 8.1 Graham, Benjamin (1973). The Intelligent Investor. HarperCollins Books.
  9. ↑ 9.0 9.1 謝劍平 (2012). 投資學：基本原理與實務. 智勝.
  10. ↑ 10.0 10.1 Redhead, Keith (1997). Financial Derivatives: An Introduction to Futures, Forwards, Options and Swaps. London: Prentice-Hall.
  11. ↑ Stringham, Edward (2002). "The Origin of the London Stock Exchange as a Self Policing Club". Journal of Private Enterprise. 17 (2): 1–19.
  12. ↑ O'Sullivan, Arthur; Sheffrin, Steven M. (2004). Economics: Principles in action. Upper Saddle River, New Jersey 07458: Prentice Hall. pp. 197, 507.
  13. ↑ Fischer Black and Myron S. Scholes. "The Pricing of Options and Corporate Liabilities," Journal of Political Economy, 81 (3), 637–654 (1973).
  14. ↑ Crack, Timothy Falcon (2004), Basic Black-Scholes: Option Pricing and Trading (1st ed.), pp. 91-102.
  15. ↑ How Do You Make Money Trading Currencies?.
  16. ↑ Mancini, L., Ranaldo, A., & Wrampelmeyer, J. (2013). Liquidity in the foreign exchange market: Measurement, commonality, and risk premiums. The Journal of Finance, 68(5), 1805-1841.
  17. ↑ Kutty, Shashidharan (12 August 2008). Managing Life Insurance. PHI Learning Pvt. Ltd.
  18. ↑ Hudson-Wilson, S., Fabozzi, F. J., & Gordon, J. N. (2003). Why real estate?. The Journal of Portfolio Management, 29(5), 12-25.
  19. ↑ Ross, S. A., & Zisler, R. C. (1991). Risk and return in real estate. The Journal of Real Estate Finance and Economics, 4(2), 175-190.
  20. ↑ Goodman, P. (2002). Current and future uses of gold in electronics (PDF). Gold bulletin, 35(1), 21-26.
  21. ↑ Riley, C. (2010). A new gold rush: Investing in Precious Metals. The Journal of Investing, 19(2), 95-100.
  22. ↑ How To Invest In Art - Is It A Good Investment?.
  23. ↑ Jackson, R. S. (2008). Wine science: principles and applications. Academic press.
  24. ↑ The world's most expensive wines are a testimony of survival. The CEO magazine.
  25. ↑ How To Invest In Wine. Forbes.
  26. ↑ What Is the Average Interest Rate for Savings Accounts?. Smart asset.
  27. ↑ Dell'Amore, Giordano (1983). "Household Propensity to Save", in Arnaldo Mauri (ed.), Mobilization of Household Savings, a Tool for Development, Finafrica, Milan.
  28. ↑ Saving for Education.
  29. ↑ Cash Account vs Margin Account: Which Do I Need?. Forbes.
  30. ↑ Alexander, L., & Eberly, J. (2018). Investment hollowing out. IMF Economic Review, 66(1), 5-30.
  31. ↑ Coulson, N. E., & Kim, M. S. (2000). Residential investment, non‐residential investment and GDP. Real Estate Economics, 28(2), 233-247.
  32. ↑ Gross fixed capital formation (% of GDP). The World Bank.
  33. ↑ 33.0 33.1 Baker, Malcolm; Wurgler, Jeffrey (2007). "Investor Sentiment in the Stock Market". Journal of Economic Perspectives. 21 (2): 129–152.
  34. ↑ Gervais, Simon; Kaniel, Ron; Mingelgrin, Dan H. (2001-06-01). "The High-Volume Return Premium". The Journal of Finance. 56 (3): 877–919.
  35. ↑ Barberis, Nicholas; Shleifer, Andrei; Vishny, Robert W. (1998). "A Model of Investor Sentiment". Journal of Financial Economics. 49 (3): 307-343.
  36. ↑ Chan, K. C. (1988). On the contrarian investment strategy. Journal of Business, 147-163.
  37. ↑ Lowe, Janet (1996). Value Investing Made Easy: Benjamin Graham's Classic Investment Strategy Explained for Everyone. New York: McGraw-Hill.
  38. ↑ 38.0 38.1 Graham (1949). The Intelligent Investor. New York: Collins, Ch. 20.
  39. ↑ Chan, L. K., & Lakonishok, J. (2004). Value and growth investing: Review and update. Financial Analysts Journal, 60(1), 71-86.
  40. ↑ Low, R.K.Y.; Tan, E. (2016). "The Role of Analysts' Forecasts in the Momentum Effect". International Review of Financial Analysis. 48: 67–84.
  41. ↑ Bocquet-Appel, Jean-Pierre (29 July 2011). "When the World's Population Took Off: The Springboard of the Neolithic Demographic Transition". Science. 333 (6042): 560-561.
  42. ↑ 42.0 42.1 42.2 Robert H. Hillman, "Limited Liability in Historical Perspective", (Washington and Lee Law Review, Spring 1997), Benedikt Koehler, "Islamic Finance as a Progenitor of Venture Capital", (Economic Affairs, December 2009).
  43. ↑ Frankel, Tamar (2012). The Ponzi Scheme Puzzle : A History and Analysis of Con Artists and Victims. New York: Oxford University Press.
  44. ↑ Why Investing is a Marathon, Not a Sprint（英文），著名商業雜誌《福布斯》

文獻

[編輯]

有志攻讀經濟學或者金融學嘅學生，可以去摷吓：

拎

[編輯]
維基同享有多媒體嘅嘢：
投資
由「https://zh-yue.wikipedia.org/w/index.php?title=投資&oldid=2215233」收