營銷組合

營銷組合（英文：marketing mix）係市場學上嘅概念，指「幫一件產品做市場有乜嘢要考慮」。喺傳統嘅營銷組合上，想幫自己產品搵市場嘅生意人有四大因素要考慮：

• 產品（product）：指件產品本身嘅特性以及件產品能夠滿足乜嘢需要（產品梗要滿足到某啲需要先會有人買）；
• 價錢（pricing）：指件產品賣幾多錢；諗價錢嘅過程當中要估消費者肯出幾多錢買，會用到需求同供應同相關嘅概念；
• 地方（place）：指件產品要點送到去啲客嘅手上，可以涉及地理方面嘅考量；
• 宣傳（promotion）：指點樣確保消費者知件產品存在同埋「件產品能夠滿足到佢哋需要」呢件資訊；

諗好嗮呢啲嘢之後，幫件產品做市場嘅人就可以決定佢哋套營銷策略。

營銷4P嘅優點：

• 容易明：營銷4P都幾易明，就算係營銷嘅新手都識得快速咁用佢去制定營銷策略。
• 以客為先：重視嘅係目標市場同埋消費者，以消費者嘅角度去設計產品同營銷方法。
• 夠全面：囊括咗營銷嘅四大主要部分，幫助行銷人整合各樣營銷活動，嚟達致最好嘅營銷效果。

營銷4P嘅缺點：

• 太單純：有時營銷4P可能太簡單啦，唔足夠考慮到行銷嘅全部細節。
• 限制咗創意：因為行銷4P係固定嘅模型，可能會限制咗營銷人嘅創意同想像，難以進行更有創意嘅營銷活動。

擴展

4P 營銷組合喺廿世紀嘅市場學界好有影響力，不過由廿世紀尾開始，就有唔少嘅市場學專家開始覺得淨係諗嗰四大因素根本就唔夠，主張營銷除咗產品、價錢、分銷同埋宣傳之外仲有好多緊要嘅因素要考慮；於是廿一世紀初嘅市場學界就有開始喺度諗要點樣擴展傳統嘅營銷組合模型。呢啲包含嗰四大因素以外嘅營銷組合模型就係所謂嘅擴展營銷組合（extended marketing mix）。廿一世紀初多人提嘅擴展營銷組合元素有以下呢啲：

• 人（people）
• 過程（process）
• 物理證據（physical evidence）

... 呀噉。