心理病態
提示：呢篇文講嘅唔係心理變態。
心理病態（粵拼：sam1 lei5 beng6 taai3）喺嚴格嘅性格心理學上係指一種性格上嘅特質，俾好多人認為係黑暗三角特質當中最反社會嗰個。心理病態傾向有持續嘅反社會行為、缺乏同理心而且異常大膽。罪犯多數都有心理病態（但多數心理病態者都唔會做犯法嘅嘢）。
基本概念
[編輯]心理病態嘅英文名叫做 psychopathy。
心理病態係一種性格特質，程度有高低之分，主要特徵包括情感上嘅冷漠、缺乏同理心、良心感低下、同埋衝動行為。心理病態者往往望落有魅力、口才好，但實際上內心冷酷無情。佢哋好少可會對自己嘅行為感到內疚，即使做出傷害他人嘅行為都唔覺得有問題。另一個重要特徵係對社會規範無視，容易做出反社會行為，而且難以建立長期穩定嘅關係。心理病態常透過工具性質嘅手段接近人，例如用說話或表演製造信任，但本質上缺乏真誠關懷。
生理研究
[編輯]睇埋：杏仁核
心理學研究指，心理病態最重要嘅特點係唔識驚：有心理學研究試過搵班受試者返嚟，用生理方法（量度心跳率同埋皮膚電導呀噉）嚟睇住啲受試者嘅情緒，發現一般人喺見到自己以外嘅人痛或者驚嗰陣，都會或多或少噉出現驚嘅反應（同理心），所以唔會想做出令其他人痛或者驚嘅行為；相比之下，心理病態程度高嘅人就缺少咗呢種反應－佢哋傾向咩都唔驚，即係話就算佢哋明知自己做緊嘅嘢（例如係操縱人、攻擊人甚至殺人）會令其他人覺得受苦或者驚，佢哋都唔會有咩感覺，事後更加唔會因為做咗傷害人嘅嘢而自責（不過有可能會為咗呃身邊嘅人而扮自責）[1]。
有關心理病態嘅神經研究發現，有心理病態嘅人嘅杏仁核（有份處理驚嘅情緒嘅腦區）對於會令一般人驚嘅嘢嘅反應異常咁弱，意思即係話正常人嘅杏仁核會因為驚而活動起變化，但心理病態程度高嘅人嘅杏仁核冇呢種反應[2]。
睇埋
[編輯]引咗
[編輯]- ↑ Marsh, A. A., & Cardinale, E. M. (2012). Psychopathy and fear: Specific impairments in judging behaviors that frighten others (PDF). Emotion, 12(5), 892.
- ↑ Blair, R. J. R. (2003). Neurobiological basis of psychopathy (PDF). The British Journal of Psychiatry, 182(1), 5-7.
拎
[編輯]