基本競爭策略

出自維基百科,自由嘅百科全書

基本競爭策略英文generic strategies)指一間公司用邊種策略喺佢嘅市場嗰度追求競爭優勢

概論[編輯]

睇埋:競爭優勢

基本競爭策略係由美國著名經濟學家米高波特(Michael Porter)提出嘅一個諗法。根據佢嘅諗法,一間公司想要爭取競爭優勢,只有三種基本策略可以用[1]

  • 成本領導性(overall cost leadership):指降低成本,務求有同類公司當中最低嘅成本;用呢種策略嘅公司一般係自己喺效率、規模或者經驗(睇經驗學習曲線)上優勝過對手;
  • 產品差異化(differentiation):指改變自己嘅產品,務求令到自己提供嘅貨品服務質素優越過競爭對手嘅,所以就算價格一樣,都會有更多消費者肯買;
  • 集中(focus):指專化成淨係專攻市場當中嘅某一部份,例如由專門賣運動用品專化成專門賣足球用品,等自己喺生產足球用品嘅成本同質素都變得更有競爭力。

以上呢三種基本競爭策略可以想像成下圖噉嘅樣[2]

一般認為,三個基本競爭策略各有優劣:成本領導性同產品差異化都唔重視專化落市場嘅某一部份,但前者重視成本,後者重視質素,冇得成本優勢同質素優勢兼得;集中就係想成本優勢同質素優勢兼得,但就要犧牲公司嘅覆蓋面,而一旦集中選擇咗嗰個市場因為外在因素唔增長,就會搞到間公司喺擴張上受阻(例:足球嘅人氣唔上升,令足球用品嘅市場唔增長)。根據米高波特嘅建議,一間公司喺選擇基本競爭策略嗰陣必需要做取捨,最理想係要淨係揀其中一種基本競爭策略,如果唔係就好容易三頭唔到岸[1]

睇埋[編輯]

[編輯]

  1. 1.0 1.1 Porter, Michael E. (1980). Competitive Strategy. Free Press.
  2. Kiechel, Walter (2010). The Lords of Strategy. Harvard Business Press.