目標

（英文） 二〇〇八年喺聯合國總部大樓影到嘅發展目標，列出咗一系列要達到嘅目標。

目標（粵拼：muk6 biu1），粵港地區嘅中文亦可能叫目的（粵拼：muk6 dik1），係指某個個體或者某班個體對未來所作嘅構想，佢哋會採取一啲行動，想達到目標所指嘅狀態。目標呢個概念，可以由動物行為嘅角度思考：想像有隻大鼠，佢覺得肚餓，希望自己可以覺得溫飽（目標所指嘅狀態）於是就走去搵食物（為咗達到目標而採取嘅行動）。人類都會為咗達到各種目標而採取行動，而且人往往仲會訂立限期，嘗試喺有限時間內實現目標，將抽象嘅諗法轉化成具體嘅行動。

設定

睇埋：時間管理同策略計劃

管理學等領域嘅研究同工作表明，設定目標都有唔少技巧。

微目標

微目標（譯自英文：microgoal）係指一啲規模細、容易達成、用嚟支援主要目標（英文：macrogoal）嘅細目標。相比起長遠同龐大嘅計劃，微目標更具操作性，通常可喺短時間內完成，例如

• 「今日要睇五頁書」
• 「寫完篇短篇故仔嘅第一段」
• 「做十分鐘運動」

等等。經驗同研究表示，微目標能夠提升動力：呢啲目標容易達成，可以即時搞掂，俾人有一種成功感，從而增強效能感；此外，每次完成個微目標，就等於向大目標邁進一步，有助維持持續行動嘅動力。面對困難嗰陣，將大目標拆細做微目標，亦被指係有助減輕心理壓力。有管理學同教育學方面嘅工作者指出，唔少人設目標嗰陣設埋晒一啲太過大而長遠嘅目標，最後搞到成個人失咗方向，而微目標就被指可以應付呢種問題。

設定理論

内文：目標設定理論

目標設定理論係由美國管理學兼心理學教授愛德溫·洛卡（Edwin A. Locke）提出嘅動機理論。根據呢套理論嘅諗法，設定目標本身已經有激勵作用，會影響一個人嘅工作表現。目標可以將人本身嘅需要轉化做動機，推動佢哋採取行動去實現目標。所以，如果想提升一個人嘅工作動力（例如老細想員工落力啲），就應該同佢哋一齊定一啲：

• 夠清楚、
• 有一定難度但唔過分嘅挑戰性目標，
• 再加上適當嘅回饋（feedback），

噉樣最有可能令表現明顯提升。

心理

睇埋：動力

心理學等領域有研究目標呢個概念，尤其係講到目標會點樣人嘅情緒同埋做嘢嘅動力。

自我決定論（英文：SDT）係心理學上一套理論，講人點解有動力做嘢。呢個理論強調，人天生就有追求成長同發揮潛能嘅傾向，而要持續有動機去追求一個目標，關鍵唔係外在獎賞，而係嗰個目標係咪滿足到三個基本心理需要：

• 自主：人需要覺得自己有選擇權，可以主導自己做嘅事情；
• 勝任：人希望自己能夠掌握技能，應付挑戰，感受到自己做得到；
• 關聯：人渴望同其他人有連繫，得到理解同支持。

如果某個目標能夠滿足呢三種心理需要其中一種，就容易引發內在動機，個體唔使咩外在獎勵都願意主動投入。而如果目標滿足唔到呢啲需要，就只能基於外在壓力或者獎賞，例如人返工好多時都唔係因為覺得自己有選擇，唔係覺得有成功感，亦唔係覺得返工可以帶嚟友情或愛情，而只係為咗賺錢維持生活（外在壓力或者獎賞），呢種動力好常見，但持續程度較低，而且一旦冇咗外在壓力或者獎賞，個人通常就會即刻停手唔做。

自我決定論對目標設定嘅啟示係：假如人想提升長遠同持續嘅行動力（例如係想訂立長期嘅事業發展目標）應該鼓勵人訂立由內心認同、符合個人價值觀同興趣嘅目標，同時俾佢哋空間自己決定實踐方式，並提供足夠支持，令佢哋有能力應對挑戰，感受到自己嘅進步同成就。

睇埋

• 策略：訂立清楚目標，係諗策略嘅重要一環。
• 遊戲
• 智能體
• 心流體驗
• 強弱危機