經濟

出自維基百科,自由嘅百科全書
(由經濟體跳轉過嚟)
跳去導覽 跳去搵嘢

經濟粵拼ging1 zai3英文economy),又叫經濟體,係響有限資源之下包含生產分配消費系統。研究經濟嘅學科叫經濟學

「經濟」呢組字係近代日本用先,攞「經國濟民」噉嘅意思。

稀缺性[編輯]

棒球係一種競爭性嘅運動;咁多隊球隊當中得一隊有得做冠軍-「冠軍位置」有稀缺性。
內文:稀缺性

稀缺性(scarcity)係經濟最基礎嘅一個概念,指嘅係有限嘅資源同理論上無限慾望(want)之間嘅差異:人類有好多慾望,但係就算有咗現代科技,佢哋手頭上嘅資源-錢、時間、精神-都硬係有限嘅,好多時佢哋都冇足夠嘅資源達到嗮佢哋想要達到嘅目的,例如一個人唔夠錢買嗮佢想要嘅嘢,唔夠時間做嗮佢想要做嘅嘢,又或者一間公司唔夠資源生產嗮佢想要生產嘅嘢。因為稀缺性嘅問題,人類需要做犧牲,需要放棄某啲嘢,嚟獲得更多佢想要嘅稀缺(scarce)嘅資源,亦都因為噉樣而有咗競爭,人同人之間會各自犧牲時間精神等嘅資源嚟爭稀缺嘅嘢。舉個例子說明,「人工高嘅工」係一種稀缺性嘅資源:好多人都想要賺多啲錢,所以會犧牲時間精神返工同搵人工高嘅工,而高人工嘅職位嘅數量少過想要呢啲職位嘅人嘅數量,所以啲人就要爭,佢哋會有誘因落力,犧牲更多時間同精神為求爭到嗰啲職位[1]:p. 105

世上有一啲資源係冇稀缺性嘅問題嘅,好似係空氣噉就係一個例子,空氣對於地球上嘅生命嚟講不可或缺,但係佢對人類嚟講唔具有稀缺性(雖然對於某啲生物嚟講可能有):一個正常嘅人類無時無刻一唞就唞到氣,唔使用啲乜嘢時間精神嚟令到自己有氣唞,而且目前地球上嘅空氣充足到不得了,夠嗮人類享用,所以人類根本冇誘因爭空氣-空氣呢種資源嘅量足夠滿足人對佢嘅需求,所以唔具有稀缺性[2][3]

稀缺性係經濟學嘅最根本概念。有好多資源都係稀缺嘅,所以人類要做好多決策,決定點樣運用某啲資源(時間、精神等等)去最大噉滿足自己嘅慾望:一個人會想用自己有限嘅收入滿足最多嘅慾望,好多時又會想要有多啲錢(等自己可以滿足多啲慾望),但係錢係有限嘅,所以人同人之間會爭錢、爭人工高嘅工;一間牟利公司會想用自己有限嘅人力賺最多嘅盈利,又會想要有多啲人力嚟賺多啲盈利,但係優秀人才嘅數量係有限嘅,所以公司同公司之間會爭人才;一個國家會想用自己有限嘅資源(自然資源同土地等)令自己最穩固,又會想要有多啲資源,而世上嘅資源係有限嘅,所以國家同國家會以外交甚至打仗嘅方式爭資源爭土地。呢啲競爭嘅過程迫使決策者要以最有效率嘅方式運用自己手上嘅資源-而「人類點樣運用手上資源,最有效率噉達到目的」正正就係經濟學研究嘅重心[1][4]

睇埋[編輯]

文獻[編輯]

  • Sheila C. Dow (2005), "Axioms and Babylonian thought: a reply", Journal of Post Keynesian Economics, 27 (3), p. 385-391.

[編輯]

  1. 1.0 1.1 Heyne, Paul; Boettke, Peter J.; Prychitko, David L. (2014). The Economic Way of Thinking (13th ed.). Pearson.
  2. Scarcity, choice and opportunity cost 互聯網檔案館歸檔,歸檔日期2019年7月20號,.. Economics Guide.
  3. Opportunity Cost, Scarcity, and Choice 互聯網檔案館歸檔,歸檔日期2019年7月8號,.. The Federal Reserve Bank of Philadelphia.
  4. Carlton-Ford, Steve. 2009. Major Armed Conflicts, Militarization, and Life Chances: Pooled Time-Series Analysis. Armed Forces & Society, Vol. 36, No. 5.

[編輯]