貨幣經濟學

貨幣經濟學fo3 bai6 ging1 zai3 hok6（英文：monetary economics）係經濟學一個子領域，專門研究錢點運作以及同錢相關嘅經濟理論。

四大功能

喺現代經濟理論當中，錢一般會抽象化成具有以下功能嘅物件：

• 交易媒介（medium of exchange）：錢普遍有價值，所以每個人手上攞住若干量嘅錢，就有得各自噉用自己嘅錢嚟同其他人換嘢；相比之下，好多貨品服務都係冇普遍價值嘅，例如一個鎚仔對做建築工程嘅人嚟講有用，但對一個廚師嚟講就未必咁有用，所以喺一個冇錢嘅經濟體當中，一個手上攞住一柞鎚仔嘅人，有得同建築工人同建築工程師做交易，但想要同廚師做交易就難啲。
• 價值量度（unit of account）：錢普遍可以攞嚟換嘢，所以可以攞嚟量度貨品服務嘅市場價值，每樣貨品服務都可以俾個數字佢，明確噉表達佢值幾多錢；相比之下，喺一個以物易物經濟當中，要量度一樣貨品服務嘅價值，就要用「呢件嘢值 3 個鎚仔」或者「呢件嘢值 30 粒釘」等嘅方法量度－好撈絞。
• 儲起價值（store of value）：錢可以輕易噉儲起，然後隔一段時間之後提取返出嚟－令人可以做投資等長遠經濟考慮；相比之下，有好多物品都唔啱用嚟儲起價值，例如生果同牛奶等嘅食物同飲品噉，雖然有價值，但因為佢哋唔擺得耐，所以做唔到長遠噉用嚟儲起經濟價值。
• 延期支付嘅標準（standard of deferred payment）：錢普遍有價值，可以攞嚟做延期支付－兩個經濟個體可以講明「家陣呢個人借咗幾多幾多錢，會喺某段時間內還錢」；錢嘅存在令到借貸嘅活動變得容易，而喺現代社會當中，借貸令到人有得（例如）問銀行借錢搞生意，事業有成之後還錢俾銀行，令到好多唔借錢就唔夠本錢搞生意嘅人有得搞生意－變相幫助咗長遠嘅經濟增長。

睇埋

• 投資
• 古德哈特定律