方法學

方法學fong1 faat3 hok6（英文：Methodology）係指針對做學術研究嘅方法嘅思考，例如係「實驗呢樣嘢可以攞嚟解答啲咩問題」噉嘅討論。

科學方法

用科學方法求知嘅流程圖

基本步驟

科學方法（scientific method）係根據科學哲學嚟追求知識嘅過程。搞親科學嘅人實係用科學方法嚟研究自己在意嘅現象嘅－由物理學同生物學等嘅自然科學至經濟學等嘅社會科學都係噉。科學方法有以下呢幾個步驟：

1. 喺日常生活嗰度觀察吓研究緊嘅現象，對現象嘅運作原理等提出問題，即係要諗吓呢啲現象係咪而家有嘅理論（theory；嚴格上係指會做有可否證性嘅預測嘅知識體）解唔解釋得到，而如果唔得，就要諗吓有冇啲乜嘢新嘅定律有可能解釋到呢柞現象；
   • 牛頓：「基於我觀察到蘋果由樹上面跌落嚟等嘅現象，我推測啲現象背後係因為有引力嘅作用。」
2. 基於諗出嚟嘅新定律或者理論，諗一啲有可否證性嘅假說（hypothesis；指由理論嗰度推理出嚟，有得直接觀察但係未經證實嘅講法）出嚟；
   • 牛頓：「如果我提倡條式係真確嘅，啲行星嘅公轉軌道應該會係噉噉噉...」（假說）
3. 做實驗或者有系統性嘅觀察，攞同分析數據；
   • 牛頓：「啲行星嘅公轉軌道實際上係點嘅樣？」
4. 做總結－
   • 如果數據撐條新定律嘅話，噉就將呢個新發現夾入去現有嘅理論入面，形成一個解釋力更勁嘅新理論；
   • 如果數據唔撐條新定律嘅話，就重新諗過；
   • 「如果我呢個理論係真確，呢場實驗或者觀察理應會得出某個某個結果，而個實際嘅結果係...」
5. 重複。

科學方法係一個循環性嘅過程－科學家會係噉重複上述嘅工序嚟豐富人類知識，因為次次搵到新嘅知識之後，好多時即刻又會有新嘅謎團；好似係牛頓萬有引力定律噉，當啲物理學家發現咗佢哋觀察到嘅嘢都係跟住呢條定律之後，佢哋又要開始去諗「萬有引力係點嚟」呢條新問題同埋做新實驗嚟搵答案。於是乎，人類喺知識上就不斷係噉有進步同發現新嘢。

驗證方法

驗證假說主要有兩大方法：

• 實驗（experiment）指一啲用嚟驗證某啲假說、牽涉到操控（manipulate）某啲變數嘅程序：响做實驗嗰陣，研究會操控自變數（IV）－即係用人工嘅方法改變自變數嘅數值，再睇吓噉樣做會點樣影響到應變數（DV）嘅數值。舉個例說明，想像家陣有位物理學家喺度做狹義相對論方面嘅研究；簡化噉講，狹義相對論主張，當一嚿物體郁嘅速度愈近光速，嚿物體過嘅時間就會愈慢；呢種現象就係所謂嘅時間膨脹，而要測試時間膨脹呢個諗法，（簡化噉講）研究者可以噉樣做實驗－
  1. 佢哋擺個原子鐘（量度時間）喺架好勁嘅火箭裏面，
  2. 開大架火箭嘅引擎，令架火箭飛得好快（有返咁上下接近光速），
  3. 飛完一輪，之後研究者再攞架火箭裏面嗰個原子鐘，攞個鐘嚟同一個由始至終都喺地球表面唔郁嘅原子鐘比較吓，睇吓以接近光速飛過嘅原子鐘係咪真係會行得慢咗。
  • 喺成個實驗入面，速度就係一個自變數（俾研究者人工噉操控咗嘅變數），而個原子鐘所量度嘅過咗幾耐時間就係一個應變數（研究者淨係量度咗呢個變數，冇直接噉操控佢數值）。實驗係現代科學上成日用嘅做法，而實驗室就正正係指一間專門攞嚟做實驗用嘅房，一般都會擺嗮啲專係攞嚟做實驗用嘅架生，而且因為用嘅架生個個科學領域都唔同，所以會有細分做化學實驗室、生物學實驗室或者心理學實驗室呢類再專門啲嘅實驗室噉。

「條試管入面啲化學物質同溫度等嘅特性經已設定好嗮（實驗操控），我個理論預測會發生嘅嗰場化學反應係咪真係會發生（應變數）呢？」

• 認真嘅觀察（observation）指緊一啲用嚟驗證某啲假說、但唔牽涉到操控任何變數嘅程序：响做觀察嗰陣，研究者會搵方法量度啲變數嘅數值，再睇吓啲變數之間嘅關係係咪同假說所講嘅一致，不過佢哋唔會特登郁手改變任何一個變數嘅數值；例如係經濟學家驗證一啲描述「貨品嘅價錢受乜嘢因素影響」嘅假說嗰陣，佢哋好難話直接控制（例如）市場上嗰啲商品嘅價錢，但佢哋可以試吓隨機（random）噉抽幾樣商品出嚟睇，計吓統計分析睇吓價錢係咪真係同（佢哋心目中會影響價錢嘅）嗰啲因素有明顯嘅相關，係嘅話就可以話啲數據撐咗佢哋心目中嘅假說，而喺成個過程入面，啲經濟學家冇操控任何變數，只係量度咗啲變數嘅數值，所以佢哋做緊嘅係個觀察，唔係實驗。順帶一提，觀察呢家嘢喺社會科學當中零舍常用。

睇埋

• 科學哲學