圖書館學
圖書館學同資訊科學有好密切嘅啦掕：資訊科學泛指研究分析、操控同儲藏資訊嘅科學領域，而圖書館學正正就係研究圖書館－人類社會裏面其中一種最重要嘅資訊儲藏形式；因為噉，兩個領域有幾大嘅重疊，成日都會俾人擺埋一齊嚟講[1]。
定位[編輯]
傳統上，圖書館學研究點樣打理書同書嘅儲藏－包括咗係有關圖書館嘅組織（簡例：啲書要點擺先方便啲用家摷書嚟睇？）同埋保養（簡例：圖書館啲氣溫同濕度要設成點先可以令啲書冇咁易爛？）呀噉；不過隨住資訊科技嘅進步，資訊仲可以用電子形式儲喺電腦數據庫等嘅電子空間嗰度，甚至出咗好多所謂嘅數碼圖書館－即係指儲嗰啲書純以電子形式存在。因為噉，廿一世紀嘅圖書館學經已將「圖書館」呢個概念廣義化咗－响佢哋心目中，「圖書館」一詞包嗮任何扮演到「儲起大量嘅資訊，兼且特登整到容易俾人攞呢啲資訊嚟用」嘅功能嘅嘢[2][3]。
概念[編輯]
- 圖書館：廣義上，如果一笪地方儲住一大柞嘅資訊（例如係以書或者 DVD 等嘅形式）、而且笪地方啲設施係特登設計到等啲人可以輕易噉攞呢啲資訊嚟用，噉嗰笪地方就可以算係一間圖書館－响廿世紀打前，圖書館基本淨係指一啲以大量藏書嚟儲起一大柞資訊嘅地方，但自從廿世紀中開始，資訊科技開始愈嚟愈發達，令人有得以電子形式儲起啲資訊，甚至仲有咗數碼圖書館噉嘅技術－即係間圖書館收藏嗰啲資訊主要（甚至完全）係以電子形式儲起嘅。
- 分類法：指將圖書館入面嗰啲資源有系統性噉分類嘅做法；好似係廿世紀嘅香港興用嘅杜威十進制圖書分類法（DDC）噉，喺呢種分類法下，間圖書館會每件資源都同佢俾返個分類號，個分類號會有 3 個位，反映件資源屬邊個學科，例如分類號 500-599 嘅書冚唪唥都係屬社會科學嘅；而除咗 DDC 之外仲有好多種圖書分類法[4]。
- 參考文獻：指喺篇文裏面註明返話「呢個諗法係由邊個邊個喺邊年邊年講過嘅」；學術研究往往會想將自己嘅諗法建基喺第啲研究者嘅諗法之上，又或者係批判第啲研究者嘅見解，而喺呢啲情況下，寫一篇文嘅人通常要喺篇文入面註明返某個諗法係由某個人講過嘅，例如喺句句子最尾掕返隻類似 Smith (1990) 噉嘅字－意思係話句句子入面嗰個諗法係由 Smith 喺 1990 年嘅一篇文嗰度講過嘅。唔同嘅期刊對參考文獻嘅格式要求都唔同[5]。睇埋抄襲。
- 版權：一份原創出版物（例如係一篇學術文）嘅作者會有嘅一種權利，指淨係得位作者有得賣、分發或者決定要重新出版；响正常情況下，如果一個人唔係一份出版物嘅版權持有人，又冇得到版權持有人嘅正式批准，走去賣甚至話份嘢係自己嘅作品，嗰個人就算係犯咗法，版權持有人可以告佢[6]。
睇埋[編輯]
參攷[編輯]
- ↑ Yan, Xue-Shan (2011-07-23). "Information Science: Its Past, Present and Future". Information. 2 (3): 510–527.
- ↑ Bates, M.J. & Maack, M.N. (eds.). (2010). Encyclopedia of Library and Information Sciences. Vol. 1-7. CRC Press, Boca Raton, USA.
- ↑ Rubin, Richard E (2010). Foundations of Library and Information Science. New York: Neal-Schuman Publishers. p. 1.
- ↑ Chan, L. M. (1994). Cataloging and Classification: An Introduction. New York: McGraw-Hill.
- ↑ Association of Legal Writing Directors & Darby Dickerson, ALWD Citation Manual: A Professional System of Citation, 4th ed. (New York: Aspen, 2010),
- ↑ Dowd, Raymond J. (2006). Copyright Litigation Handbook (1st ed.). Thomson West.
