天花板效應

天花板效應（英文：ceiling effect）指想量度嗰啲數值高得滯，搞到件量度架生唔再俾到有用嘅資訊。

舉個簡化嘅例子，想像家陣攞支日常嘅溫度計去量度太陽（塊表面超過 5,000 °C 咁熱）同天狼星（塊表面估計超過 9,000 °C 咁熱）嘅表面溫度，

• 攞支日常溫度計去度太陽表面嘅話，條溫度計應該會變成氣體（假如條溫度計係用一般玻璃造－普通嘅玻璃沸點好多時得嗰 2,200 °C 左右），
• 而攞支日常溫度計去度天狼星表面，條溫度計都係變氣體，

－噉即係話，雖然天狼星明顯熱過太陽，但條溫度計對太陽定對天狼星都係俾一樣嘅反應（變氣體）－做唔到分辨兩者（俾唔到有用嘅資訊）。

社科

睇埋：智商測試同天才

呢種情況喺社科入面都見得到：想像家陣有 A 君同 B 君兩個人，兩個都喺智商測驗度攞滿分；但噉唔表示兩個一樣咁聰明－可能 A 君明顯聰明啲，但佢同 B 君嘅智能都係遠超份智商測驗度到嘅值；於是份智商測驗就唔再俾到有用嘅資訊－發生咗天花板效應。

睇埋

• 地板效應