受試內設計

受試內設計（英文：within-subject design），又有叫重複量數設計（repeated measures design），喺統計學上指份研究量度咗每位受試者喺若干個時間點當中嘅變數數值；例：一路睇住班受試者嘅食量，每日睇一次，連睇 10 日，噉個數據庫會每個受試者有 10 個數值，表示佢喺呢 10 日當中每一日嘅食量），等研究者可以分析一個變數點樣隨時間變化。相對於受試間設計。

概論

睇埋：實驗設計

想像家陣有位醫學研究者想研究隻新藥，但唔淨只想睇隻新藥對受試者嘅短期影響，仲想睇隻藥對受試者有咩長期影響，於是佢就噉樣做：

• 搵咗班病人返嚟做受試者；
• 將佢哋分做實驗組同對照組，實驗組食隻新藥，對照組食安慰劑；
• 不過今次佢嘅分析方法有啲唔同－佢唔淨只比較受試者食咗藥之後嘅病情係點，仲比較兩組
  • 1 年後嘅病情（DV₁）、
  • 2 年後嘅病情（DV₂）、
  • 3 年後嘅病情（DV₃）... 至
  • n 年後嘅病情（DV_n）。

好似呢場實驗噉嘅研究就用咗所謂嘅重複量數設計，呢場實驗嘅研究者分析咗其中一個變數（病情）隨時間嘅變化（成 $2\times n$ 噉嘅設計；其中一個 IV 係時間）。重複量數設計可以係 $1\times n$ 嘅，即係淨係睇一組人隨時間嘅變化，又可以係 $m\times n$（當中 $m$ 係一個整數而且 $m>1$）噉嘅設計，用嚟比較唔同組嘅受試者隨時間變化嘅規律有咩分別－例如好似「睇隻藥對受試者有咩長期影響」個例子噉，實驗組嘅病情可能隨時間好轉，但對照組嘅病情就隨時間不變。好似呢啲噉嘅研究可以俾到好多「齋靠分析啲變數响一個時間嘅值」提供唔到嘅資訊，喺醫學以至社會科學上都相當受到重視。

重複量數變異數分析

内文：重複量數變異數分析

重複量數變異數分析（repeated-measure ANOVA，rANOVA）係唔同組係同一班受試者喺唔同時間點嘅數值嗰陣用嘅 ANOVA。想像一個用受試內設計嘅實驗，喺 $n$ 個時間點分別噉量度班受試者喺變數 $X$ 上嘅值，如果 $n=2$，研究者可以用配對樣本 t 測試，而如果 $n>2$，噉研究者就要用 rANOVA－比較 $n$ 組（$n>2$）數值之間喺 $X$ 上嘅平均值嘅差異，而呢 $n$ 組唔係各有一班受試者，而係同一班受試者喺唔同時間點嘅 $X$ 值。

睇埋

• 實驗設計
• 時間序列
• N-of-1 試驗