隨機對照試驗

想像依家要試新藥：受試者分三組，一組食該新藥，第二組食另一隻已知有用嘅藥，而第三組就食安慰劑。

隨機對照試驗（英文：randomised controlled trial，RCT ）係醫療相關研究上會用到嘅臨床研究技巧，屬於科學性質嘅實驗設計：喺呢種試驗之中，受試者會隨機噉分組做實驗組同對照組，當中實驗組會歷經某種干預，即係食某隻新藥或者接受某種新療法呀噉；而對照組就係服用安慰劑或者接受現行常見嗰隻療法；好多時仲會有比較組，會接受第種干預。透過呢種實驗法，研究者就可以評估療法嘅成效。

隨機對照試驗，其中一個最重要嘅特徵係會盡可能噉去除各種嘅偏誤：隨機分組能夠減低混淆變數嘅系統化影響；對照組食咗安慰劑，可以進一步控制受試者因心理預期而產生嘅影響；而且隨機對照試驗時常會配合埋雙盲，防止研究員唔覺意將預想嘅結果透露畀受試者知。由於隨機對照試驗設下咗咁多措施，有二十一世紀初嘅研究者甚至仲主張，隨機對照試驗係療效研究嘅黃金基準。

話雖如此，做隨機對照試驗都有好多嘢要留意，譬如樣本細得滯，就會有統計功效不足嘅憂慮，而且隨機對照試驗會用到統計顯著性，亦引起唔少人質疑會唔會有 p-hack 方面嘅問題。

基本概念

（英文）安慰劑嘅想像圖：即使隻藥實際上冇效，病人會唔會因為食咗藥，就感覺好咗？廿世紀嘅研究表示：會。

内文：實驗、實驗組同對照組

隨機對照試驗會用到以下呢啲技巧，確保得出嘅結論能夠有咁準確得咁準確。

隨機分組

内文：隨機分組

睇埋：混淆變數

隨機分組旨在減少混淆變數對研究結果嘅系統化影響：做臨床研究嗰陣，如果由得病人自選或者醫生決定邊個用新藥、邊個用舊藥，好容易就會令到一啲同療效無關嘅因素不自覺噉帶入分組之中，呢啲因素可以係病人的年紀、本身嘅體質、生活習慣或者經濟狀況等等；譬如新藥同舊藥，畀病人自選嘅話年紀大啲嘅病人會傾向揀舊藥，於是年紀就會成為混淆變數，到咗最後就算真係發現隻新藥嘅療效較佳，都無法知道係因為隻舊藥真係冇咁好用，定係只係因為舊藥組多年紀大嘅病人。

隨機分組會利用概率方法，例如叫電腦同每個病人產生一個冧把，按冧把決定邊個去邊組，確保是但搵一位受試者，佢分入 A 組同 B 組嘅機率完全相等。噉做無論係已知抑或係未知嘅混淆變數，都會傾向均勻分佈於實驗組同對照組之中，令到兩組嘅基本起點有一致嘅比較基礎。喺實際應用上，研究者好多時仲會做統計測試，睇下唔同組喺性別、年紀等因素上係咪有顯著嘅差異。

安慰劑

内文：安慰劑

安慰劑係指一啲「假藥」，望落、聞落、食落都同真藥一模一樣，但係完全冇任何藥效，同時又唔會對服用者造成任何危險。比如係沙糖丸呀噉。

喺試驗入便，對照組好多時都會食安慰劑 。呢個安排係為咗控制人嘅心理預期所產生嘅安慰劑效應：二十世紀嘅研究顯示，好多時，受試者只要諗住自己用咗新療法，身體就會不自覺噉產生生理上嘅改善，是為心理影響生理；若果新藥組食藥同時對照組咩都唔做，就會出現一個可能性，係新藥組病情改善，但係佢哋病情改善係因為佢哋食咗新藥，產生自己病情會改善嘅預期，於是研究者就無法釐清，到底病人好轉係因為隻藥真係有效，定係純粹源於安慰劑效應嘅心理影響。因此，研究者就必要畀對照組食安慰劑，最理想係新藥同安慰劑喺外形、氣味同味道上都完全無異。

對照組亦有可能係接受舊有療法，而唔係食安慰劑。於是成場研究就變成對比新療法同舊療法，睇下邊個有效啲。

雙盲實驗

内文：雙盲實驗

雙盲實驗講緊無論係受試者定係直接接觸受試者嘅醫護或研究人員，都唔知道邊個分咗入邊一組。

如果淨係受試者唔知，研究人員喺評估病情或者同病人互動嗰陣，依然可能會帶有主觀偏見，例如佢哋可能會唔覺意噉特別關照啲食緊新藥嘅病人，甚至不自覺噉向病人透露預期嘅療效。雙盲操作有效噉降低呢種觀察者偏誤嘅影響，令到試驗數據嘅收集過程更接近絕對客觀。

進階類型

隨機對照試驗仲可以再分細類：

• 平行試驗 (暫譯) ：兩組各自接受干預，（最少理論上）完全互不相干。
• 誇組試驗 (暫譯) ：隨時間推進，每位受試者以隨機嘅次序接受唔同嘅干預。
• 析因實驗
• 聚類隨機對照試驗
• 隨機對照試驗好多時都唔係單一嘅，而係帶有適應性，例如一開始嗰陣分五條路線並行，隨住時間過去，終止睇落冇咁有效嗰啲試驗，將資源集中喺有效嗰啲試驗身上。

統計測試

睇埋：推論統計學、貝葉斯統計同第一型錯誤

分析隨機對照試驗得出嘅數據，會用到以下呢啲方法：

• T-測試：用嚟對比兩組喺某連續變數上有冇差異。
• ANOVA：用嚟對比多過兩組喺某連續變數上有冇差異。
• 邏輯迴歸：可以用嚟分析二元嘅應變數，二元意即一係有一係冇，譬如（簡化例子）係最後要入醫院定係唔使。
• 生還模型：如果想研究接受唔同療法嘅病人分別有幾耐命，就會用到生還模型。

隨機對照試驗好多時仲會考慮埋脆弱指數 (暫譯)：脆弱指數係指用一啲指標嚟衡量研究結果有幾「脆弱」，重點係講緊至少要有幾多個受試者狀態改變—例如由最後冇病變成最後有病。一般嚟講，脆弱指數嘅值愈高愈好。

不過要留意嘅係，隨機對照試驗上嘅統計測試，即使做到統計顯著，亦都未必表示隻新療法真係有用。搵到統計顯著，只係表示新療法組真係同對照組有差異，但依然有可能出現一啲情況：雖然真係有差異，但新療法組唔係真係好對照組咁多，同時新療法成本極之高昂，假如新療法嘅改善幅度夠細，同時成本上升幅度夠大，就難以說服醫療人員採用呢種新療法。用行話講，呢種情況即係個結果雖然統計上顯著，但臨床上唔顯著。亦可以睇下最小臨床重要差異同埋效應值嘅概念。

優同缺點

睇埋：再現危機

喺醫療界嘅證據等級入便，隨機對照試驗同埋其相關嘅系統文獻回顧，一直公認為最高質嘅證據，能最有效排除各種混淆變數等因素嘅干擾。隨機對照試驗最具革命性嘅地方，在於佢有能力推翻以往靠觀察研究得出嘅錯誤醫學「常識」。

不過，隨機對照試驗亦有其缺點：呢種試驗嘅代價極之巨大，要嘥好多金錢同埋時間上嘅成本；大型嘅三期臨床試驗，耗資可以高達幾千萬美金、歷時幾年甚至幾十年亦都唔少見，噉就搞到針對罕見副作用、或者需要超長期追蹤嘅療法難以開展。此外正因為隨機對照試驗成本驚人，好多試驗只能夠依賴財力雄厚嘅企業資助，噉就引致利益衝突方面嘅擔憂—多項研究證實，由藥廠資助嘅隨機對照試驗，結論傾向係對藥廠有利，往往存在「報喜不報憂」嘅發表偏差。

喺嚴格嘅醫療上，齋靠隨機對照試驗係唔夠嘅，研究者仲要做埋觀察研究等，先至可以嚴謹噉確立自己嘅假說。

睇埋

• 文獻綜述：做隨機對照試驗前，梗要摷下前人做過嘅研究，有理論基礎探討，嚟緊要試嗰種干預點解預期佢會 work 。
• 臨床顯著
• 概念驗證
• 假說檢定
• 觀察研究

拎

• （香港繁體）iMACE 公眾資訊，呢度用官話講解，有提到隨機對照試驗。