抽樣分佈

抽樣分佈係統計學概念。抽象化啲講：基於隨機抽樣得出嚟嘅統計量，個統計量嘅概率分佈，就係佢嘅抽樣分佈。抽樣分佈相關嘅概念，可以用嚟思考估計值嘅可靠度等。

定義

抽樣分佈個主意，基於概率分佈同埋抽樣等嘅概念。

用日常用語講，可以想像噉嘅情景：某學校有上千個學生，統計師想知道佢哋嘅平均身高係幾多，但逐個逐個學生量度，再計平均值，噉做並唔實際；於是統計師就喺學生入便隨機抽出 40 個人量度佢哋嘅身高，再計平均值；設佢想評估呢個樣本平均值有幾可靠，就作出想像，假想佢係噉重複抽樣、再計平均，每次得出嘅樣本平均值都有少少唔同；佢將咁多次得出嘅平均身高畫成圖，就會見到一個概率分佈，嗰個分佈就係平均身高呢個統計量嘅抽樣分佈。