統計學嘅誤用

同一樣嘅數據有得用唔同嘅方法呈現。

統計學上嘅數據同分析方法對科研有巨大幫助，但又時不時會俾人誤用。舉附圖嚟說明，同一樣嘅統計數據可以用唔同嘅方法呈現，而唔同嘅呈現方法可以攞嚟誤導人，好似係附圖嗰兩幅棒形圖噉，兩幅圖表達嘅數據一樣，都係表達緊一間公司喺二〇一〇同二〇一一年嘅銷售量（Y 軸係銷售量，X 軸係年份）但係兩幅圖嘅原點唔同－左圖嘅 Y 軸係以 36 做起點，右圖嘅以 0 做起點，令到前者望落好似賺多咗好多錢噉。

有人就曾經噉講：

（粵文翻譯）世上有三種大話：大話、抵死嘅大話、同埋統計數字。

做科研嘅人，好多時都要應付呢啲統計學嘅誤用。

使用

俄羅斯輪盤玩法：準備一支左輪手槍，裝得落六發子彈，但只入一粒，粒子彈嘅位置隨機；然後玩家輪流將槍口對準自己個頭掹雞，睇吓邊個死先。

想像有人寫報告噉樣講：

「我哋訪問咗一班曾經玩過俄羅斯輪盤嘅人，發現佢哋當中 100% 嘅人玩完之後仲有命。結論：俄羅斯輪盤好安全，係一種有益身心嘅遊戲。」

——玩過俄羅斯輪盤嘅人好多都死咗，死咗嗰啲唔會訪問到。

好多人呈現同解讀統計數據嗰陣，都會特登用對自己有利嘅方法嚟誤導人，而美國作家達利哈夫嘅書《點樣用統計學講大話》就揭露咗好多生意人同政治家點樣用類似詭計嚟呃人。

做研究嘅人又有可能 p-hack：例如係漁翁撒網噉將數據庫入便嘅自變數逐個逐個睇晒佢，睇吓有邊個得到統計顯著嘅結果，然後寫報告嗰陣淨係報導顯著嗰啲結果；研究者又可以係將同一場分析做幾次，每次都加入或者剔除其中一啲變數，然後淨係報告「有價值」（例如樣眼、可以炒作）嗰啲結果。由統計學角度睇，呢啲做法會令結果有誤導性，佢實際上冇效果研究者都可以拗話佢有。

防範

要預防統計學嘅誤用有好多方法，包括要用啱嘅圖表等等。而且喺將用統計得出嘅結論普遍化嗰陣，要留意佢會唔會超出咗個樣本代表到嘅範圍，只有個當樣本可以代表到個總體嗰陣，統計方法得出嘅結果先至算係可信、精確嘅，例如係一份用白人做樣本嘅醫學研究得出嘅結論未必啱唐人用。

要避免 p-hack 相關嘅問題，研究人員可以事前講明要用咩分析方法，而且跟足計劃做，唔好諗住想搵顯著結果就走去試其他分析，而且佢哋要將做過咩分析同埋啲結果全部如實報晒出嚟。

睇埋

• 謬論
• 指標執著