廣義化

樹樖樖都唔同樣，但有某啲共通點，呢啲共通點集合，就形成樹嘅概念。

  呢篇文章講嘅係哲學上嘅概念。假如你想揾嘅係越南一省，請睇「廣刈」。

廣義化，粵拼：gwong2 ji6 faa3，英文：generalisation，係哲學以至科學都成日提到嘅概念，可以大致理解為：攞住多個唔同個案，搵出呢啲個案嘅共通點，即係攞走一啲淨係某啲個案有嘅嘢，用呢啲共通點，結合形成一個概念。

具體定義

睇埋：子集

想像兩個相關嘅概念，A 同 B，如果話 A 係 B 嘅廣義化，或者 B 係 A 嘅一個個案，意思等同係講緊：

• B 入面嘅每個例子，都屬於 A 嘅例子；之但係
• 有啲屬於 A 嘅例子並唔係 B 嘅例子。

舉例說明，動物呢個概念，可以算係昆蟲嘅廣義化－

• 屬於昆蟲嘅物體，例如蝴蝶、蜜蜂同埋甲蟲等，冚唪唥都屬於動物，
• 但係有好多屬動物嘅物體，例如人類、八爪魚同烏鴉等，都唔屬於昆蟲。

換句話講，動物呢個概念，包含嘅「空間」比昆蟲包含到嘅更加廣泛。將某概念廣義化，個概念會變成一個包含到嘅「空間」更大嘅概念。

科學例子

科學周不時都會提到廣義化：

• 生物分類：如果某個物種 X 分做類別 C，即係話物種 X 嘅成員，冚唪唥都屬於 C，但 C 可以包含唔屬於物種 X 嘅成員。
• 物理定律：亦可以睇睇狹義相對論，點樣將牛頓力學上嘅某一啲定律廣義化。

睇埋

• 狹義化：廣義化嘅相對
• 概念：將實例廣義化，會形成概念。
• 學習遷移
• 總描