廣義化

樹樖樖都唔同樣，但有某啲共通點，呢啲共通點形成「樹」嘅概念。

廣義化（粵拼：gwong² ji⁶ faa³；英文：generalization）係指「攞多個唔同個案，搵出呢柞個案嘅共通點，用呢啲共通點形成一個概念」嘅過程。

具體定義

想像兩個相關嘅概念，A 同 B，如果話「A 係 B 嘅廣義化」（或者「B 係 A 嘅一個個案」）意思等同係話：

• B 入面嘅每個例子都同時屬於 A 嘅例子；但
• 有啲屬於 A 嘅例子並唔係 B 嘅例子。

舉個簡單例子，「動物」呢個概念係「昆蟲」嘅廣義化－屬「昆蟲」嘅物體（例如蝴蝶、蜜蜂同甲蟲呀噉）冚唪唥都屬「動物」，但有好多屬「動物」嘅物體（例如人類、八爪魚同烏鴉呀噉）都唔屬於「昆蟲」。可以睇埋子集（subset）嘅概念。

科學例子

• 生物分類：如果一個物種被分做類別 C，即係話嗰種物種嘅成員冚唪唥都屬 C，但 C 可以包含唔屬嗰個物種嘅成員。
• 物理定律：可以睇將牛頓力學上嘅一啲定律廣義化嘅狹義相對論。

... 等等。

睇埋

• 概念，將實例廣義化會形成嘅嘢
• 狹義化，廣義化嘅相對
• 學習遷移