蝴蝶

出自維基百科,自由嘅百科全書
跳去: 定向搵嘢
Wikipedia:點樣睇生物分類框How to read a taxobox
蝴蝶
玉帶鳳蝶Papilio polytes
玉帶鳳蝶
Papilio polytes
物種分類
動物界 Animalia
節肢動物門 Arthropoda
昆蟲綱 Insecta
鱗翅目 Lepidoptera
Superfamily: 鳳蝶總科 Papilionoidea
Latreille, 1802
多樣性
7 個科
約 18,500 種

蝴蝶(以前叫崩紗,但而今已經幾乎無人用)係一類通常喺日間飛行嘅昆蟲,喺生物分類學中係指鱗翅目鳳蝶總科(學名:Papilionoidea)嘅一個總科演化支[1],又叫做真蝶總科,係蛾類嘅近親。下級分類中一共有7個科,包含咗約18,500種[2]。同其他昆蟲一樣,蝴蝶都屬於節肢動物,體表都有一節節嘅外骨骼,成蟲身體都係分為三個部份,胸部生有兩對翅膀,翅膀上各式各樣嘅色彩同斑紋係由翅膀上嘅鱗片組成。蝴蝶係完全變態昆蟲,佢一生包括幼蟲同埋成蟲四個階段。

世上最大嘅蝴蝶係亞歷山大鳥翼鳳蝶展翅闊到有280毫米[3],最細嘅蝴蝶係褐小灰蝶,只有16毫米[4]

分佈[編輯]

可參閱:日本台灣香港蝴蝶一覽

蝴蝶廣泛分佈世界各地嘅陸上地方,除咗南極洲以外都有分佈,熱帶地區物種多樣性最高,溫帶同埋寒帶地區都有好多種類棲息。世界上總共有大約18,500種蝴蝶,新北界有約775種,新熱帶界約7700種,古北界約1575種,埃塞俄比亞界約3650種,東洋界同埋澳新界共約4800種[2]。喺中國記錄咗大約2100種;台灣約370種;香港約260種。

生境

蝴蝶嘅生境非常廣泛,但主要都係圍繞佢哋賴以為生嘅植物,包括蜜源植物同寄主植物。前者係蝴蝶成蟲攝取花蜜嘅開花植物,後者係幼蟲食用嘅植物。

生命史[編輯]

可參閱:完全變態

蝴蝶係完全變態嘅昆蟲,佢哋嘅一生有幼蟲成蟲四個階段。呢種生存方式有更強嘅競爭性,例如幼蟲同成蟲之間完全唔同嘅食性可以減少種入面競爭、一生特化做各個階段可以更有效率噉完成唔同階段嘅任務:幼蟲有發達嘅消化系統使佢可以不斷進食並且貯存能量、蛹期唔使進食都可以渡過不利生長嘅冬季、成蟲長有翅膀同成熟嘅生殖系統能有效找尋配偶並繁殖後代。

睇晒整個生命史,蝴蝶壽命一般都有1至4個月,但係都視乎唔同季節同種類,壽命都會唔同。喺溫暖同食物充足嘅時候蝴蝶可以快速成長,壽命會比較短,反之亦然。一般成蝶只有兩個月壽命,但以成蟲越冬嘅斑蝶,成蟲壽命可以長達幾個月。

[編輯]

產卵方式依種類唔同,產卵位置可以係喺寄主植物葉片、嫩芽、枝條,休眠芽附近,或係喺寄主植物附近嘅其他植物體或地面上。都有將卵生喺樹皮裂缝,花苞同埋新芽孔隙嘅情形。卵粒單產或幾粒成一群,都有一次生幾百粒成卵塊嘅種類。通常卵粒藉由雌蝶副腺分泌物黏著喺物體上,都有完全隱藏喺泡狀或膠狀物中嘅情形,更有少數種類有直接將卵粒拋置地面嘅特殊習性。

幼蟲[編輯]

卵啱啱孵化成蟲嘅時候叫做一齡蟲,幼蟲一般由卵頂部咬爛卵殼出來,但係卵粒產喺裂縫同孔隙嘅種類入面有啲具有幼蟲由側面破卵而出嘅適應性,甚至有針對卵蜂演化出加厚卵殼而幼蟲由卵底穿過葉片脫出嘅種類。有啲種類喺孵化後幼蟲會食埋卵殼,唔會嘥料,又可以防止空卵殻暴露咗自己嘅位置,食咗卵殼後會不斷食寄主植物。極少數蝴蝶嘅幼蟲會食其他生物,例如灰蝶雲灰蝶亞科嘅蝶種都係肉食性,好似蚜灰蝶嘅幼蟲以蚜蟲為食、熙灰蝶幼蟲食介殼蟲[5]。直到下一個階段脫皮轉齡,幼蟲就會停止活動同埋進食,預備脫皮轉齡。脫皮開始嗰陣,幼蟲身體伸縮,將舊皮由頭部脫到尾部,最後將頭部嘅外殻甩出嚟就完成脫皮。幼蟲每次脫皮就大一齡,會脫皮4到6次。

喺化蛹嘅孔雀蛺蝶

老熟嘅幼蟲會停止進食,到處爬行搵結蛹嘅地方,通常會選擇停留喺葉底。為咗確保羽化成蝴蝶時能順利展翅,幼蟲會拉長個身度吓空間係咪足夠。決定好結蛹地點後幼蟲會先吐絲作墊,用尾足鉤著絲墊固定位置,然後不斷噉左右吐絲,造成一條粗帶固定蟲體,形成前蛹。大約一日之後就開始化蛹,前蛹會有間歇性嘅伸縮同埋膨脹活動。隨後伸縮同埋膨脹嘅次數會漸趨頻密,表皮由胸前裂開,並迅速噉推到腹部末端。最後,末端臀棘鉤著絲墊,甩咗最後一張皮就完成化蛹。

[編輯]

蛹嘅表面睇嚟好似靜止唔郁,其實佢第四至第六腹節係能夠活動嘅,喺呢個階段蛹入面會進行複雜嘅重組過程,將幼蟲時嘅器官分解,並組成成蟲嘅身體。大約十日之後,成蟲嘅器官會喺蛹入面發育完成,跟著就係羽化。

成蟲[編輯]

蝴蝶嘅羽化一般喺深夜至清晨進行。成蟲開始羽化嗰陣,蛹殼頭部同胸背呈十字形裂開,頭、胸同埋背部一一露出,跟著前足伸出,並將皺摺嘅翅膀同埋鼓脹嘅腹部拉出蛹殼外。啱啱爬出嘅成蟲通常會黐喺蛹殼下,或喺其他穩固位置將身體懸掛,引導腹部嘅血淋巴體液注入翅脈,流進翅膀,並將摺皺嘅翅膀迅速撐開。當雙翅伸展後,多餘嘅體液會由肛門排出。假如此時蝴蝶掉咗落地或有障礙物令翅膀唔能順利伸展,佢就會失去飛行能力,只能坐以待斃。待翅膀變硬後,成蟲就具備飛行嘅能力。

羽化後嘅成蟲,冇論喺外形同結構都與幼蟲完全唔相同,都係蝴蝶。成蟲所有器官已發育成熟,具備交配與產卵嘅能力,繁殖下一代,通常蝴蝶一生只會交配一次。雄蝶會揾雌蝶交配,交配後嘅雌蝶會找尋寄主植物產卵,由下一代延續蝴蝶嘅生命史。

形態[編輯]

頭部[編輯]

蝴蝶觸角嘅唔同形態

蝴蝶頭部表面密被鱗毛,左右兩側各具一發達嘅複眼,複眼由小眼,好多種類喺小眼間生有細毛,複眼係咪有毛以同埋其被毛狀態喺分類上頗有價值。頭部背側有一對細長,生好多有感覺器官嘅觸角,分為柄節、梗節同鞭節。鞭節喺外觀上分為好多小節,但係呢啲小節入面冇獨立運作嘅肌肉連繋。鞭節末端嘅膨大部分可叫做錘部,錘部成圓柱狀或壓扁狀,錘部末端叫做尖頂,喺弄蝶科格外發達。觸角表面被覆鱗片,但喺末端有裸露部分,又叫做裸節。喺觸角後方有毛叢,叫做毛隆。口器喺頭部下側,高度特化以利吸食流體食物,依種類同性別唔同會吸食花蜜、腐果、動物排遺、溪流邊與地面水分等。口器基本上只餘下唇鬚同埋小顎外葉,其他部分則已退化消失。下唇鬚能前伸或上舉,喺喙蝶亞科特別明顯。小顎外葉形成兩根半管,左右相互嵌合成一形如彈簧嘅吸管。

胸部[編輯]

蝴蝶胸部由三節組成,分別為前胸、中胸與後胸。前胸窄小,兩側生有氣孔,背側有骨化或膜質構造,叫做背翼英文Patagium。胸部具有兩對翅,喺中胸嘅係前翅,後胸嘅係後翅。前翅基部有用以保護翅基關節之骨片,叫做肩板英文Tegula (insect anatomy)。胸部各節亦分別有一對,由前至後分別為前足、中足同埋後足[6]。足主要分為基節、轉節、腿節、脛節同埋跗節五節,上覆有鱗片同埋刺毛,脛節上常有成列小刺。中足同埋後足脛節上常具一或兩對具關節嘅距。鳳蝶弄蝶前足脛節上具有叫做前脛突嘅特殊構造,生有梳狀刺毛[7]。跗節通常分為五節小跗節,末端生有一對彎曲嘅爪,但喺蛺蝶科同埋灰蝶科雄蝶跗節常癒合成圓筒狀,唔分節,末端冇爪嘅構造。

腹部[編輯]

蝴蝶腹部包含消化,排泄同埋繁殖器官,由10節腹節組成,各腹節由骨化程度較高嘅一片背板英文Tergum同埋腹板,以同埋兩側兩片骨化程度弱嘅側板英文Pleuron (insect anatomy)所構成,第1至7腹節除咗第1腹節缺乏腹板以外,其餘各節形態簡單,缺乏特化構造,但喺側板上具有氣孔。雌蝶第8至10腹節以同埋雄蝶第9至10腹節高度特化,形成外生殖器,呢個構造同部分雌蝶部分内生殖器構造夾埋叫做交尾器。

翅膀[編輯]

蝴蝶翅膀嘅色彩同斑紋由鱗片組成
寬紋黑脈綃蝶嘅部分翅室冇鱗片,成為透明

蝴蝶翅膀構造獨特,前翅翅形常接近三角形,後翅接近扇形,兩者翅前方邊緣叫做前緣,後方邊緣叫做後緣,同身體相接處叫做翅基,而遠離身體嘅邊緣叫做外缘。前緣同外緣相接處叫做翅頂,後緣同外緣相接處叫做臀角。翅膀呈膜質,有骨化嘅翅脈,分別有六組縱脈,由前至後分別為前緣脈(C)、亞前緣脈(Sc)、脛脈(R)、中脈(M)、肘脈(Cu)同埋臀脈(A)。蝴蝶嘅前緣脈明顯退化,只喺活體前翅前緣有模糊嘅痕跡,喺乾燥標本上則完全消失。肘脈可分為前肘脈(CuA)與後肘脈(CuP),但係喺蝴蝶中僅有鳳蝶科仍具有後肘脈翅脈間嘅區域叫做翅室。翅室名稱跟隨其前方翅脈名稱,如M1脈後方嘅翅室即為M1室。喺脛脈同肘脈間形成一空室,叫做中室,中室外端有時具一橫脈叫做中室端脈,中室端脈存喺時叫做中室封閉,而中室端脈缺少則叫做中室開放。此外,後翅Sc+R1脈近基部位置常有一叫做肩脈(hm)嘅游離短脈。

蝴蝶翅面上布滿鱗片,呈覆瓦狀排列。鱗片基部有一小柄,藉以附喺翅膜上細微窩孔上。鱗片壁同埋孔隙中包含由幼蟲時期由寄主植物獲得嘅成分,成蝶自行代謝出嘅產物,或係代謝廢物等來源之色素,呢個類色彩叫做「化學色」或「色素色」,部分蝶種嘅鱗片上具有各種物理甚至近乎螢光特化結構,可造成光線干涉等物理效應形成金屬光澤嘅效果,呢個類色彩叫做「物理色」或「構造色」。

好多雄蝶同埋少數雌蝶喺翅膀生有用作釋放與求偶有關嘅信息素嘅特化鱗,叫做香鱗英文External_morphology_of_Lepidoptera#Androconia。香鱗有嘅散布喺翅面上,有啲聚成一片形成「性標」,有啲位於特化嘅袋狀構造或翅褶入面。

多型性

當同一種蝴蝶出現兩種或以上嘅型態,就叫做多型性。同個體差異唔同,多型性嘅型態差異較大,各型態亦恆常發現。多型性包括兩性異形、季節異形[8]等型態。兩性體亦會罕有地發生,即同一隻蝴蝶擁有兩性嘅性器官,左右翅膀嘅花紋都唔一樣,甚至形狀唔同。

幼生期[編輯]

蝴蝶嘅具多變化嘅形態,外部具有卵殼,卵殼頂部中央有叫做精孔嘅小孔。

蝴蝶嘅幼蟲身體常呈圓筒形或蛆狀,啱啱孵化嘅一齡幼蟲體表具有形態同數目固定嘅啱啱毛,叫做一次刺毛英文Seta,對分類同演化研究好有價值。其後每蛻一次皮即叫做增加一齡,而體表會長出變化多端,數目唔定嘅二次刺毛。幼蟲期總齡數多為四或五齡,亦有多達12齡嘅情形。

幼蟲頭部骨化程度高,生有感覺毛,下端具備咀嚼式口器,兩側各有幾個可用來感光嘅側單眼。頭部具有縫線,藉以喺化蛹時裂開讓蛹體脫出。

幼蟲身軀體壁骨化程度弱而呈膜質,骨化部分只有一次刺毛基部嘅小硬板前胸背側叫做前胸硬皮板嘅部分,以同埋第10腹節背側叫做肛上板嘅部分。

胸部具有三對步足,其跗節僅一節,末端有一爪。腹部分為10節,喺第3、4、5、6同埋第10節具有原足英文Proleg。原足上具有成列小鉤,叫做原足鉤,藉以附著攀附喺幼蟲吐絲形成嘅絲墊或其他物體上[9]。前胸以同埋第1至8腹節各具一對氣孔。幼蟲多半總齡數固定,但唔固定嘅種類都唔少。

蝴蝶嘅係彼蛹,附肢同翅緊貼軀體,體表喺唔同部位生有刺毛。頭部嘅複眼,觸角同埋小顎外葉等部分可見。觸角沿前翅前緣延伸小顎外葉位於腹面中央,長度通常超出翅面。

胸部各節均可見,多以中胸最為發達。前翅喺蛹體側腹面,後翅大部分或完全俾前翅覆蓋。前足,中足可見,位於觸角同小顎外葉之間。中胸氣孔位於背側。腹部10節都可見,但最後三節癒合而唔可動其他腹部嘅可動性依種類而唔同。第1至8腹節具有氣孔,但係第1腹節氣孔因被翅覆蓋而睇唔到,第8腹節氣孔則失去功能而冇開口。交尾器痕喺雄蟲嘅第9腹節,而喺雌蟲則喺第8同埋9腹節,交尾器痕呈圓形或線形。肛門痕喺第10腹節,形狀都呈圓形或線形。

第10腹節特化,伸長成叫做垂懸器嘅構造,有鉤狀刺毛,蛹體可藉此構造攀附絲上以附著喺物體上。蛹體附著物體嘅方式主要分為僅以垂懸器附著,頭下尾上嘅懸蛹以同埋胸部有絲帶環繞固定嘅縊蛹,但係都有好多係以上兩類嘅其他附著方式。蛹嘅外部形態變化萬端,好多種類模擬植物體唔同部位藉以隱藏有啲種類並其依附著位置嘅質地,色彩而呈綠色或褐色。另有一啲體入面含有毒素嘅種類擁有鮮豔色彩。

習性[編輯]

喺訪花嘅歐洲粉蝶
食性

蝴蝶成蟲嘅口器特化為吸管狀,所以只可以食流質食物。除咗花蜜以外,水、樹汁、腐果、動物糞就等都係各種蝴蝶嘅食物。蝴蝶喜歡喺溪邊或濕潤嘅土壤聚集一起吸水,攝取水中嘅礦物質。

同螞蟻共生嘅灰蝶幼蟲
共生

好多灰蝶幼蟲會同螞蟻共生,螞蟻保護幼蟲,並由幼蟲身上取得蜜露,雙方都獲得好處[10]。但蟻種唔限定,冇螞蟻幼蟲都可以生長,此爲非絕對嘅互利共生銀線灰蝶屬幼蟲亦同螞蟻共生,但雌性蝴蝶要有特定蟻種氣味時先會產卵,呢個係絶對嘅互利共生。

過冬
一隻喺香港深水灣捕獲,被發現係由日本同歌山縣遷徙到港嘅大絹斑蝶

冬天嘅時候蜜源植物唔多,寄主植物都凋零,成蟲同幼蟲會因食物不足而難以生存。所以好多蝴蝶都已卵或蛹形態過冬,因為呢兩個都係靜止狀態,唔使食剐。然而,有啲斑蝶會以成蟲過冬,喺秋季佢哋會努力吸花蜜,儲存養分,冬季時會集體喺山谷中過冬,形成蝴蝶谷嘅奇觀。帝王斑蝶大絹斑蝶兩種較爲出名嘅品種都會進行長距離遷徙

領域

雄性蝴蝶嘅領域行爲會驅離其他競爭者,畀自身取得制空優勢。佢哋會企喺樹上嘅葉面以取得制空權,假如有其他雄蝶或飛行物闖入領域,就會互相追逐,直至入侵者被驅逐。但如果闖入嘅係雌蝶,就會設法將雌蝶留住並交配。領域性係蝴蝶常見嘅競爭方式。

交配緊嘅長腹灰蝶
登峰

每日上晝,各地嘅蝴蝶會順着地形往上飛,最後聚集喺各處山嶺或山脊。雄蝶喺山頭盤據,互相追趕,等待雌蝶登山。而雌蝶喺交配後會飛到山下產卵。

求偶

雄蝶嘅數量比雌蝶多,所以雄蝶嘅競爭非常激烈,幾隻雄蝶追求一隻雌蝶嘅情況並唔罕見。雄蝶對雌蝶嘅氣味異常敏感,常有雄蝶守候喺未羽化嘅雌蝶蛹旁,等雌蝶如花後就第一時間交配。雄蝶嘅領域同登峰行為都係為咗交配繁殖。

生態學[編輯]

節尾猴咬住一隻閃蝶

天敵[編輯]

蝴蝶係被各種天敵捕食嘅對象,即獵物。蝴蝶位於食物網嘅底層,係其他動物嘅捕食對象,包括雀鳥蜥蜴蜘蛛螳螂蜻蜓青蛙等,佢哋大多行動敏捷或會設置陷阱,捕捉正採花甚至飛緊嘅蝴蝶成蟲。蝴蝶幼生期嘅各階段亦幾乎都有寄生性天敵。小自卵蜂、繭蜂、大至姬蜂、寄生蠅線蟲等,根據種類嘅唔同會將卵產喺蝴蝶嘅卵、幼蟲或蛹上。當佢哋嘅幼蟲孵出後就會食寄主嘅組織。類寄生生物吸取寄主營養長大後通常會導致寄主死亡,哩個類關係屬擬寄生物,擬寄生生物同寄主之間大多具專性。此外,細菌病毒真菌都係令佢哋生病嘅微生物

防禦[編輯]

部分灰蝶幼蟲同螞蟻共生時,能藉由螞蟻提供嘅防衛能力避免被擬寄生生物危害,但遇上體型稍大嘅天敵,螞蟻都幫唔到手。幼蟲同埋成蝶可藉由移動能力尋找合適地點躲藏,或係快速飛行,逃走或裝死,而冇移動力能嘅蝶卵、蛹,就有其他避敵方法提高生存機會。

鱗片

蝴蝶身上佈滿細毛同鱗片,當天敵捕食時,容易脫落嘅細毛同鱗片令天敵捉佢唔住,增加逃脫嘅機會。

隱藏

蝴蝶會藉由各種隱蔽環境隱藏起來。例如臺灣灑灰蝶雌蝶將卵產喺樹皮裂縫入面;弄蝶幼蟲製作嘅蟲巢,進食時間外到都會喺葉包入面;趾弄蝶屬成蝶停棲喺葉片下表面等。

枯葉蛺蝶嘅僞裝
僞裝

蝴蝶嘅各種外型、顏色或行爲等融入周遭環境,利用保護色令天敵唔易察覺,例如好多蝴蝶嘅幼蟲同卵到同寄主植物嘅顏色十分相似,偽裝成葉片、花或樹枝嘅一部份,好像枯葉蛺蝶蠹葉蛺蝶嘅翅紋似枯葉[11]。又會模仿天敵唔感興趣嘅物體,如鳳蝶幼蟲外型似鳥糞[12]。又會利用斑紋嘅形態分割干擾天敵嘅視覺,如環蛺蝶屬翅膀嘅條紋破碎、灰蝶後翅臀角嘅眼斑、尾突,令天敵以爲係頭部而攻擊錯誤目標,所以一啲灰蝶停留時會擺動後翅來模仿頭部動作,天敵往往被騙以攻擊後翅,灰蝶藉此逃過一劫[13]

柑橘鳳蝶幼蟲伸出臭角
威嚇防衛

眼蝶等蝶種翅膀擁有唔合比例嘅巨大眼斑鳳蝶屬終齡幼蟲胸部嘅眼斑等,都可能令天敵誤以爲係巨獸而唔敢攻擊。大量嘅幼蟲群聚都有威嚇效果,亦令捕食者難以集中捕食,增加生存機會[14]。部分蝶蛹表面具有金屬色澤,斑蝶幼蟲顏色鮮豔,對比明顯嘅體色係警戒色英文Aposematism,警告天敵唔好捕食。部分蝴蝶幼蟲體表有堅硬棘刺或係體表有長毛,藉以警告天敵佢哋可能有毒,唔可口或難吞得落。若冇法嚇阻天敵嘅行動,鳳蝶幼蟲嘅臭角英文Osmeterium散發難聞嘅氣味[15]同斑蝶成蝶會用毛筆器散發出斑蝶素嘅味道以達到自我防衛嘅驅敵效果。

擬態

擬態係係利用其他生物嘅防衛機制,擬態要有以下三者至成立:捕食者、被擬態者同埋擬態者。捕食者喺捕食過程中學識被擬態者唔好食、有毒或難以捕食,由唔好嘅經驗令佢之後會避免捕食外型相似嘅物種,擬態者則因爲外型似被擬態者而減少被捕食。

  1. 貝氏擬態:冇威脅性、冇毒者,模仿具威脅性、有毒嘅外貌,猶如狐假虎威[14]。被擬態者嘅數量要夠多而且兩者要共域分布先符合,例如雌性金斑蛺蝶外型似有毒嘅虎斑蝶玉帶鳳蝶雌蝶紅紋型似有毒嘅紅珠鳳蝶
  2. 穆氏擬態:兩種或兩種以上都係具威脅性、有毒嘅物種,彼此外型相似互爲擬態者同埋被擬態者。體色通常爲鮮豔或對比色,擬態能加強警戒色嘅效果例如食馬兜鈴嘅鳳蝶多具有白色斑紋或紅色斑紋;青斑蝶屬絹斑蝶屬旖斑蝶屬三類有毒嘅成蝶嘅外型相似,有毒嘅紫斑蝶屬中嘅物種有相似嘅色澤等。
  3. 速度擬態:速度慢者模仿速度快者嘅樣貌以欺騙天敵,做出放棄追捕嘅念頭。
  4. 隱蔽式擬態:獵物(擬態者)同生活嘅環境或周遭物體相似(被擬態者),藉此躲避天敵嘅捕食。作法乃僞裝模仿等納入嘅廣義擬態。

種系發生[編輯]

外類群[編輯]

蝴蝶係鱗翅目中嘅一個演化支,鱗翅目曾將蝴蝶歸類為「錘角亞目」,而則係「異角亞目」,呢個係依觸角嘅形狀將蝴蝶同蛾區分,但現今科研已證實呢個種分類並唔合宜。其後,一啲分子種系發生學英文Molecular phylogenetics研究分別有指出蝴蝶跟小鱗翅亞目英文Microlepidoptera大鱗翅亞目英文Macrolepidoptera有密切嘅親緣關係[16][17]。亦曾經認為蝴蝶(鳳蝶總科+弄蝶總科+喜蝶總科)跟錨紋蛾科同埋網蛾科屬同一演化支[18][19],又被視作木蠹蛾總科+斑蛾總科嘅旁系群[20]。近年嘅種系基因組學英文Phylogenomics研究指出鳳蝶總科(包括弄蝶總科同喜蝶總科)有獨立嘅演支,係Obtectomera嘅基群,都係麥蛾總科+錨紋蛾科+網蛾科+螟蛾總科+米馬隆蛾科+Macroheterocera嘅旁系群[21]

內類群[編輯]

喺蝴蝶嘅次級分類中,曾細分為弄蝶總科、鳳蝶總科同喜蝶總科[22],並認為弄蝶係較原始嘅類群。然而,近年研究指出鳳蝶總科中嘅鳳蝶科才係蝴蝶中最早分化嘅一個演化支,即鳳蝶科係其除所有蝶類嘅旁系群(包括弄蝶同喜蝶),呢個意味鳳蝶總科定義係多系群[23]。另外又發現弄蝶同喜蝶係旁系群[21]。綜合以上研究結果,蝴蝶唔應該區分成三個總科[19],並將原來歸入鳳蝶總科嘅蝶類+弄蝶+喜蝶構成新定義嘅鳳蝶總科[1]。換言之,現今蝴蝶分類中共有1個總科,包含咗7個科。當中各科之間嘅關係包括,蜆蝶科灰蝶科係旁系群,蛺蝶科係佢哋嘅旁系群,粉蝶科係以上嘅旁系群,弄蝶科+喜蝶科嘅演化支係以上嘅旁系群,最後鳳蝶科係以上各科嘅旁系群[24]

文化[編輯]

中國五代時期著名花鳥畫家徐熙筆下嘅蝴蝶同紫藤
  • 大型蝴蝶非常引人注意,有人專門收集各種蝴蝶標本,亦吸引好多自然愛好者同攝影者參與。
  • 愛爾蘭嘅傳統民族相信人後會化成蝴蝶[25]
  • 中國傳說梁山伯與祝英台,男女主人雙雙殉情後,靈魂化為蝴蝶。蝴蝶喺當中成為追求自由同爱情嘅象徵。
觀蝶

觀蝶就係觀察蝴蝶自然生態嘅活動,可以到郊外或蝴蝶園進行。觀蝶時唔應該搔擾野生動物、採捕蝴蝶嘅任何階段,以免擾亂生態。觀蝶時可攜帶當地嘅蝴蝶圖鑑、記錄表同相機等工具,方便記錄[26]

睇埋[編輯]

[編輯]

  1. 1.0 1.1 van Nieukerken et al., 2011 in Zhang (Ed.), Animal biodiversity: An outline of higher-level classification and survey of taxonomic richness. Order Lepidoptera Linnaeus, 1758 Zootaxa 3148 : 212-221
  2. 2.0 2.1 Williams, Ernest; Adams, James; Snyder, John. "Frequently Asked Questions". The Lepidopterists' Society. 喺9 September 2015搵到. 
  3. Dönitz, Prof. Dr. W. (1897). "Sitzungsberichte des Entomologischen Vereins in Berlin für das Jahr 1896". Berliner entomologische Zeitschrift. 42 (1-2): 1–25. doi:10.1002/mmnd.18970420102. (德文)
  4. 大衛.卡特 (2007年7月). 蝴蝶. 中國友誼出版公司. ISBN 9787505713222. 
  5. Venkatesha, M. G.; Shashikumar, L.; Gayathri Devi, S.S. (2004). "Protective Devices of the Carnivorous Butterfly, Spalgis epius (Westwood) (Lepidoptera: Lycaenidae)". Current Science. 87 (5): 571–572. 
  6. Smart, Paul 1977. The Illustrated Encyclopedia of the Butterfly World, chapter 2. Chartwell Books. ISBN 0-89009-093-9
  7. Triplehorn, Charles A. and Johnson, Norman F. 2005. Borror and Delong's introduction to the study of insects. 7th ed, Thomson Brooks/Cole. Belmont, California, p578. ISBN 0-03-096835-6
  8. Monteiro, A.; Pierce, N. E. (2001). "Phylogeny of Bicyclus (Lepidoptera : Nymphalidae) Inferred from COI, COII, and EF-1 Alpha Gene Sequences". Molecular Phylogenetics and Evolution. 18 (2): 264–281. doi:10.1006/mpev.2000.0872. PMID 11161761. 
  9. "Peggy Notebaert Nature Museum". Larva Legs. Chicago Academy of Sciences. (原先內容喺19 March 2012歸檔). 喺7 June 2012搵到. 
  10. Fiedler, K.; Holldobler, B.; Seufert, P. (1996). "Butterflies and Ants: The Communicative Domain". Cellular and Molecular Life Sciences. 52: 14–24. doi:10.1007/bf01922410. 
  11. Robbins, Robert K. (1981). "The "False Head" Hypothesis: Predation and Wing Pattern Variation of Lycaenid Butterflies". American Naturalist. 118 (5): 770–775. doi:10.1086/283868. 
  12. "Featured Creatures: Giant Swallowtail". University of Florida. 喺12 September 2015搵到. 
  13. Stevens, M. (2005). "The Role of Eyespots as Anti-Predator Mechanisms, Principally Demonstrated in the Lepidoptera". Biological Reviews. 80 (4): 573–588. doi:10.1017/S1464793105006810. PMID 16221330. 
  14. 14.0 14.1 Edmunds, M. (1974). Defence in Animals. Longman. 第 74–78, 100–113頁. 
  15. Chattopadhyay, J. 2011. The structure and defensive efficacy of glandular secretion of the larval osmeterium in Graphium agamemnon agamemnon Linnaeus, 1758 (Lepidoptera: Papilionidae).
  16. Minet J. 1991 Tentative reconstruction of the ditrysian phylogeny (Lepidoptera, Glossata). Entomol. Scand. 22, 69–95. (doi:10.1163/187631291X00327)
  17. Tree of Life Web Project. 2010. Ditrysia. Version 17 November 2010 (temporary). in The Tree of Life Web Project (英文)
  18. Mutanen M, Wahlberg N, Kaila L. 2010 Comprehensive gene and taxon coverage elucidates radiation patterns in moths and butterflies. Proc. R. Soc. B 277, 2839–2848. (doi:10.1098/rspb.2010.0392)
  19. 19.0 19.1 Kristensen NPKristensen NP, Skalski AW. 1998 Phylogeny and palaeontology. In Lepidoptera: moths and butterflies 1 Handbuch der Zoologie/handbook of zoology IV/35 (ed. Kristensen NP), pp. 7–25. Berlin, Germany: Walter de Gruyter.
  20. Regier JC, et al. 2009 Toward reconstructing the evolution of advanced moths and butterflies (Lepidoptera: Ditrysia): an initial molecular study. BMC Evol. Biol. 9, 280. (doi:10.1186/1471-2148-9-280)
  21. 21.0 21.1 Kawahara, A. Y., & Breinholt, J. W. (2014, August). Phylogenomics provides strong evidence for relationships of butterflies and moths. In Proc. R. Soc. B (Vol. 281, No. 1788, p. 20140970). The Royal Society.
  22. Scoble MJ. 1992 The Lepidoptera. Form, function and diversity. Oxford, UK: Oxford University Press.
  23. Kristensen NPAckery PR, de Jong R, Vane-Wright RI. 1998 The butterflies: Hedyloidea, Hesperoidea and Papilionoidea. In Lepidoptera: moths and butterflies 1 Handbuch der Zoologie/handbook of zoology IV/35 (ed. Kristensen NP), pp. 263–300. Berlin, Germany: Walter de Gruyter.
  24. Heikkilä, M., Kaila, L., Mutanen, M., Peña, C., & Wahlberg, N. (2012, March). Cretaceous origin and repeated tertiary diversification of the redefined butterflies. In Proc. R. Soc. B (Vol. 279, No. 1731, pp. 1093-1099). The Royal Society.
  25. 寄藤文平, 梁桂慈譯. 2010. 死嘅型錄:鬼才插畫家筆下嘅生命終點. 圓神出版社有限公司
  26. 潘瑞輝 譚健聰 (2011年8月). 鳳園生態系列-香港觀蝶入門手冊. 香港: 大埔環保會 鳳園蝴蝶保育區. ISBN 978-988-15271-1-0. 

參考[編輯]

中國
  • 周堯 (1992年). 中國蝶類志. 中國: 河南技術出版社. ISBN 75349-15740. 
  • 王敏, 范驍凌 (2002-04). 中國灰蝶志. 中國 鄭州: 河南科學技術出版社. ISBN 7534923840.  檢查日期值喺: |date= (詳情)
  • 袁鋒, 袁向群, 薛國喜 (2015). 中國動物誌 昆蟲綱 第五十五卷 鱗翅目 弄蝶科. 中國 北京: 科學出版社. ISBN 9787030439147. 
  • 寿建新, 周尧, 李宇飞 (2006-04-01). 世界蝴蝶分類名錄. 中國: 陝西科學技術出版社. ISBN 9787536936768. 
台灣
  • 呂至堅, 陳建仁 (2014年3月23號). 蝴蝶生活史圖鑑. 台灣: 晨星出版有限公司. ISBN 9789861777849. 
  • 徐堉峰 (2013年2月10號). 臺灣蝴蝶圖鑑.上【弄蝶、鳳蝶、粉蝶】. 台灣: 晨星出版有限公司. ISBN 9789861776705. 
  • 徐堉峰 (2013年2月10號). 臺灣蝴蝶圖鑑.中【灰蝶】. 台灣: 晨星出版有限公司. ISBN 9789861776705. 
  • 徐堉峰 (2013年3月10號). 臺灣蝴蝶圖鑑.下【蛺蝶】. 台灣: 晨星出版有限公司. ISBN 9789861776682. 
香港
  • 楊建業, 饒戈, 丘紹文. 香港蝴蝶圖誌. 香港: 香港鱗翅目學會. 
  • 潘瑞輝, 楊英豪 (2012年6月). 香港蝴蝶百科 辨蝶篇. 香港: 香港鱗翅目學會. ISBN 9789628694372. 
  • 羅益奎, 許永亮 (2004年). 郊野情報蝴蝶篇. 香港: 漁農自然護理署. ISBN 9621428432. 
  • Bascombe, M.J., Johnston, G. & Bascombe, F.S. (1999年). The Butterflies of Hong Kong. 倫敦]: Academic Press. ISBN 9780120802906. 

出面網頁[編輯]