寵物小精靈

出自維基百科,自由嘅百科全書
跳去: 定向搵嘢
寵物小精靈系列嘅國際商標

寵物小精靈(粵音:cung2 mat6 siu2 zing1 ling4;日文:ポケットモンスター,日語發音:Pokettomonsuta),而家任天堂官方中文名叫精靈寶可夢(粵音:zing1 ling4 bou2 ho2 mung6),係由日本公司 Game Freak 嘅代表田尻智喺1995年開發,日本任天堂株式會社喺1996年開始推出嘅一個以遊戲為主嘅系列。佢嘅內容係圍繞住一班叫「精靈訓練員」嘅人類捕捉「寵物小精靈」 - 擁有神奇力量嘅架空生物 - 同訓練佢哋去戰鬥嘅故事。

喺一開始嗰陣,寵物小精靈係喺 Game Boy 度出嘅 RPG 遊戲(紅、綠)。遊戲嘅內容係玩嗰個人扮演一個想做精靈訓練員大師嘅細路,並且喺隻遊戲入面嘅(架空)世界一路旅行一路捉路上遇到嘅唔同品種嘅精靈,跟住透過戰鬥經驗提升手持精靈嘅等級去同更勁嘅對手戰鬥,最後稱霸成個地區。因為隻 Game 當時嘅人氣出乎意料咁高,好快寵物小精靈重出埋咭 Game、動畫、漫畫、戲、同埋各種玩具,成為風靡全世界嘅大熱系列。到咗今日,寵物小精靈嘅總值只係僅次於同屬任天堂嘅超級馬利奧系列,係歷史上第二好賣遊戲系列。個系列喺 2016 年為咗慶祝二十週年,特登喺 Super Bowl 50 度打廣告[1],出咗破格嘅 Pokémon GO 手機遊戲,同埋重新設計遊戲嘅玩法。

目前出咗嘅RPG型寵物小精靈遊戲包括:紅、藍、黃、綠(第一代,出喺 Game Boy)、金、銀、水晶(第二代,Game Boy Color)、紅寶石、藍寶石、綠寶石、火紅、葉綠(第三代,Game Boy Advance)、鑽石、珍珠、白銀、心金、魂銀(第四代,NDS)、黑、白、黑2、白2(第五代,都係NDS)、X、Y、終結之紅寶石、始源之藍寶石(第六代,3DS)、太陽、同月亮(第七代,都係 3DS)。每隻遊戲嘅名都係象徵咗做佢封面嗰隻寵物小精靈(俗稱「封面神獸」)。除咗 RPG,呢個系列重出咗其他類型嘅遊戲,例如係喺手提電話出,屬於擴張現實型嘅「Pokémon GO」。

初頭個系列入面淨係得 151個品種嘅寵物小精靈,但係每出一代新遊戲都會有新品種。直至依家(第七代)總共有802 個品種嘅寵物小精靈。

主要意念[編輯]

田尻智嘅故事
一個普通精靈球

據講寵物小精靈嘅創作意念係嚟自昆蟲採集。田尻智細個嗰陣鍾意採集昆蟲,後來佢創作嘅呢個系列同昆蟲採集有幾個相似嘅地方:

  1. 玩嗰個人嘅目標包括採集嗮全部目標生物(分別指昆蟲同寵物小精靈);
  2. 飼養同照顧自己手持嘅生物;
  3. 訓練自己手持嘅生物去同其他玩家嘅生物打交(採集昆蟲嘅人好多時會將自己有嘅公甲蟲用嚟同同好嘅公甲蟲玩摔角)。

收集、育成、戰鬥基本上就係寵物小精靈遊戲嘅全部。呢三個主題喺遊戲以外嘅寵物小精靈產品都可以見得到。例如寵物小精靈動漫就成日都強調主角訓練員用愛心養育自己嘅精靈,並透過友情嘅力量令佢哋變得更強。

精靈球同捉精靈[編輯]

喺寵物小精靈系列嘅架空世界入面,人類用佢哋嘅先進科技發明咗一種叫「精靈球」嘅儀器。精靈球一般都係得手掌咁大(喺唔同動漫系列入面,精靈球嘅大細其實唔多一致),但係就連身長五米以上嘅精靈都裝得入。一般精靈訓練員捉一隻野生精靈嗰陣都會將個精靈球掟向嗰隻精靈,個精靈球會將隻精靈吸入去。如果嗰隻精靈掙脫唔到個精靈球,咁佢就會變成屬於嗰個訓練員。一般訓練員都會將佢哋嘅手持精靈放喺精靈球入面隨身帶住,要戰鬥或者用精靈做啲咩嘢嗰陣(例如係個訓練員需要隻精靈孭住佢游水過河)就會掟個精靈球嚟放隻精靈出嚟。但係精靈就算被捉住咗都唔一定會聽主人話,喺遊戲同動漫入面就成日都有隻精靈因為某啲原因(例如對主人冇好感)而漠視主人命令嘅情況出現。

育成同進化[編輯]

隨住戰鬥經驗增加或者達到某啲條件,寵物小精靈重會學識新技能,甚至「進化」成更強嘅品種 - 雖然呢個系列入面嗰啲所謂「進化」其實比較似昆蟲嘅「變態」 - 係隻寵物小精靈嘅身體突然快速咁變做更強嘅形態。

冒險同戰鬥[編輯]

根據遊戲同動漫嘅內容,寵物小精靈嘅世界分做好多唔同「地區」。好多細路十幾歲嗰陣就會有人送一隻精靈畀佢哋,等佢哋有能力喺個地區度旅行同成為訓練員。遊戲同動漫嘅主角多數都係咁。區入面有好多野生精靈畀佢哋捉,重有好多訓練員會同佢哋比拼。多數地區都有叫做「道館首領」(日文:ジムリーダー;發音:Jimuriidaa)同「四天王」(日文:してんのう;發音:Shitennou)嘅訓練員。前者似乎係主要負責教授戰鬥技巧同提升區內訓練員水平,而後者基本上就係區內精靈訓練員嘅精英,兩者都明顯強過一般訓練員好多。遊戲同動漫嘅主角都會挑戰呢啲強手去提升自己水平(同埋過關)。通常打低咗四天王就可以挑戰區內無人能敵嘅最強訓練員 - 總冠軍(日文:リーグ優勝者;發音:Riigu yuushousha)。打嬴咗就順理成章變做新嘅總冠軍。

精靈圖鑑[編輯]

遊戲同動漫嘅主角多數都會喺旅程開始嗰陣撞到研究寵物小精靈嘅博士。呢啲博士會送一個叫「精靈圖鑑」(日文:ポケモンずかん;發音:Pokemon zukan)嘅儀器畀主角。呢個儀器會自動紀錄主角遇到同捉到嘅精靈嘅品種,重會提供呢啲品種嘅習性同出沒地點之類嘅資料,係對訓練員好重要嘅工具。

世代[編輯]

寵物小精靈系列可以清楚分做唔同「世代」。每出一個新世代都會有新品種嘅精靈推出同埋一系列嘅新機能。

第一代[編輯]

初代寵物小精靈,總共有 151 個品種嘅精靈。遊戲嘅玩法 - 能力值、招式、捕捉 - 等基本成形。但係因為早期嘅關係,遊戲嘅設計未成熟,有好多地方有錯:例如鬼魂系攻擊原本係應該剋制超能力系精靈,但程式輯寫嗰陣出錯,令到鬼魂系攻擊反而變成對超能力系精靈無效。隻遊戲亦有平衡問題,好多精靈同招式太強,例如超夢夢(#150)喺當時可以話係無敵。

後來寵物小精靈遊戲人氣好高,跟手出埋動畫(都好有人氣)。而第一代出嘅遊戲「寵物小精靈黃」主角嘅主力精靈係比卡超,係一隻為咗响應動畫主角小智同佢拍檔比卡超嘅遊戲。

第二代[編輯]

出多咗 100 個品種嘅寵物小精靈,令總數變做 251 個。新增咗惡系同鋼系兩個新屬性、新招式,同埋精靈配種等等。

第三代[編輯]

出多咗 135 個新品種,令總數提升到 386 個品種。新增咗新招式,特性,同埋寵物小精靈華麗大賽。

第四代[編輯]

出多咗 107 個新品種,總數升到 493 個。佢亦係寵物小精靈主線遊戲史上第一次有 3D 效果。

第五代[編輯]

出多咗 156 個新品種,總數升到 649 個。寵物小精靈主線遊戲史上第一次個主角冒險嘅地區唔係基於日本嘅。前四代嘅冒險地區嘅設計都係源自日本某個地方:第一代嘅「關都」地區藍本係日本嘅關東,第二代嘅「城都」地區係日本嘅關西,第三代嘅「豐緣」係九州,而第四代嘅「神奧」係北海道。反而喺第五代主角嘅冒險地區係「合眾」(日文:イッシュ地方;日語發音:Isshu chihou)地區 - 設計藍本係美國紐約市。

第六代[編輯]

又出多咗 72 個新品種,令品種總數升到 721 個。主要嘅新亮點係「百萬進化」(日文:メガ進化;日語發音:Mega shinka) - 精靈同佢哋嘅訓練員透過同彼此嘅連繫令隻精靈喺戰鬥途中暫時變成超強形態。冒險地區「卡洛斯」(日文:カロス地方;日語發音:Karosu chihou)設計藍本係法國。

第七代[編輯]

出多咗 81 個新品種,總數達到 802 個。新嘅冒險地方係「阿羅拉」(日文:アローラ地方;發音:Arola chihou),設計藍本係夏威夷。呢一代最受注目嘅係佢為咗慶祝二十週年,改變咗主線遊戲嘅格局:由重複性嘅「開始旅程,挑戰八個道館首領,跟手挑戰四天王同總冠軍」變成「完成各島嘅考驗同收集 Z 石」。好多擁躉亦都覺得呢一代嘅遊戲嘅故仔比以往嘅更加有深度。

其他媒體[編輯]

一堆寵物小精靈咭

寵物小精靈系列一路都係以遊戲為重心。但係佢人氣咁高,就自然會出其他產品。呢啲產品包括動畫(好多,冇辦法喺度列嗮出尼)、戲(由 1998 年嘅「超夢夢反擊戰」起每年都會出一套)、音樂 CD 、咭 Game、同埋好多部漫畫(其中「寵物小精靈特別篇」好受歡迎,全世界都有賣),令到個系列喺好多個媒體上出現。

改名[編輯]

呢個系列喺香港本來叫寵物小精靈,喺臺灣神奇寶貝(粵音:san4 kei4 bou2 bui3),喺中國大陸口袋怪獸(粵音:hau2 doi6 gwaai3 sau3),但係 2016 年官方將大中華地區嘅譯名統一做「精靈寶可夢」,令到區內嘅寵物小精靈擁躉有好大迴響[2]

批評[編輯]

宗教批評[編輯]

有一部份基督徒批評寵物小精靈系列宣揚巫術(根據精靈圖鑑,好多精靈有超能力,甚至係由鬼魂幻化而成)、暴力(因為寵物小精靈會打鬥),同進化,全部都係有違聖經嘅原則[3]。但係都有基督徒反駁,例如意大利嘅天主教電視台 Sat2000 就話寵物小精靈充滿想像力同對道德並冇任何負面影響。

動物權益[編輯]

動物權益組織 PETA 批評「捕捉野生精靈同訓練佢哋去戰鬥」基本格局就好似鬥雞同馬戲團等迫動物做危險嘢嘅活動,所以係變相鼓吹虐待動物[4]

種族主義[編輯]

其中一個寵物小精靈品種紅唇娃(#124)第一代嗰陣喺設計上有黑色皮膚,再加上佢外形(刻意設計)醜陋,令到有人話佢個設計係針對黑人嘅種族主義[5]。後來為咗平息風波,Game Freak 由「寵物小精靈水晶」開始將紅唇娃嘅皮膚改做深紫色。

Pokémon GO[編輯]

Pokémon GO 遊戲畫面

喺 2016 年出嘅 Pokémon GO 手機遊戲玩法係玩嗰個人喺現實世界入面揾同捉寵物小精靈。精靈會出現喺現實世界嘅位置。玩嘅人可以通過自己嘅手機見到佢哋,就好似真係捉緊精靈咁。但係有啲玩家為咗捉精靈走咗入唔應該入去嘅地方,又或者係掛住玩而發生意外(尤其係揸緊車嗰陣)。亦都有一次喺一間納粹德國猶太人大屠殺嘅博物館出現咗一隻毒氣丸(#109,出名放毒氣嘅精靈),令到博物館嘅人覺得好唔舒服(註:納粹主義者喺集中營度就係用毒氣處決猶太人嘅)[6]

擁躉搞嘅嘢[編輯]

寵物小精靈一般都畀人覺得係畀細路(尤其係男仔)玩嘅遊戲,但係終結之紅寶石、始源之藍寶石呢兩隻2014 年出嘅遊戲,買嘅人就好多係二三十歲嘅男性。目前,呢個系列嘅擁躉有好多係九十年代出世,由細玩寵物小精靈玩到大嘅人。

呢個系列人氣高到有班擁躉為佢設計咗一個好似維基咁嘅百科全書網站,叫 Bulbapedia(直譯:奇異種子百科全書),收錄咗有關呢個系列嘅詳盡資料。

另外,好多大人擁躉都發現寵物小精靈戰鬥策略性其實好豐富,所以有好多網站專門分析寵物小精靈戰鬥策略,其中以 Smogon University 最出名。網上重有一個叫 Pokemon Showdown 嘅戰鬥模擬器,畀玩家模擬寵物小精靈戰鬥同網友打。

睇埋[編輯]