完全變態

出自維基百科,自由嘅百科全書
跳去導覽 跳去搵嘢
蝴蝶會經歷完全變態-啱啱出世嗰陣係一條(同成蟲好唔同樣嘅)幼蟲,幼蟲生到咁上下會結蛹,最後變成成蟲。

完全變態粵拼jyun4 cyun4 bin3 taai3英文holometabolism / complete metamorphosis)係指某啲昆蟲當中見到嘅一種發育方式。如果話一種昆蟲行完全變態,即係指呢種昆蟲一世蟲分做四個階段:

出名行完全變態嘅昆蟲有蝴蝶飛蛾蜜蜂甲蟲呀噉。完全變態嘅相對係不完全變態

幼蟲[編輯]

內文:幼蟲毛蟲

幼蟲(larva;眾數係 larvae)通常都係一條條噉嘅樣嘅,喺外形上同成蟲好唔同,冇翼唔識飛,而且啲簡眼。喺鱗翅目蝴蝶飛蛾)當中,幼蟲又可以叫「毛蟲[1]

幼蟲最重要嘅工作係要猛咁食嘢:啲蟲生蛋嗰陣,好多時都會特登將啲蛋生喺毛蟲要食嘅嘢附近,例如蝴蝶乸同飛蛾乸生蛋嘅時候,就好興將啲蛋生喺毛蟲要食嘅植物上面,等啲幼蟲一出世就有嘢食;啲幼蟲生咗出嚟就會係噉勁食嘢,儲起養份;佢哋一路食一路脫皮(增),去到咁上下就會結蛹

[編輯]

內文:

(pupa;眾數係 pupae)係一個靜止、集中於改變身體結構嘅階段。

一隻蛹好多時腹部查實仲識郁,但喺呢個階段,隻蟲嘅絕大部份活動都會停止,冇得去覓食,所以要齋靠幼蟲階段狂食嘢儲起咗嘅養份維生。喺呢個時候,隻蛹體內會進行一連串複雜嘅生命過程,會將隻蟲嘅器官(除咗神經系統之外)分解變成液體噉嘅狀態,跟手呢個液化咗嘅身體會重組變成成蟲嘅身體。蛹嘅階段有幾長視乎物種而定,最後隻成蟲嘅器官會喺個蛹入面完成發育,跟住隻蟲就會破蛹而出。

值得注意嘅係,有部份昆蟲物種嘅蛹階段長得好交關,甚至可能會喺蛹入面過多過一次[2]

一堆蠶蛹;有幾隻已經變咗成蟲(蠶蛾)。

成蟲[編輯]

兜蟲嘅三個生命形態:幼蟲、蛹、同成蟲(由左至右)。
內文:成蟲

成蟲(adult / imago)係隻蟲生命最後一個階段。

破咗蛹之後嘅成蟲無論喺外形同結構上都同隻幼蟲極之唔同,但仲係同一隻生物。例如有昆蟲學家就做過場噉嘅實驗:佢哋搵咗一批毛蟲返去個實驗室度,俾啲毛蟲聞一啲氣味,當中某一啲嘅氣味會伴隨住一啲(唔致命嘅)痛楚;唔出乎意料嘅係,啲毛蟲話咁快就學識避開嗰啲同痛楚一齊出現嘅氣味;而更加緊要嘅係,呢啲毛蟲大個咗變咗蝴蝶之後,都仲識得避開嗰啲氣味-即係話佢哋仲記得細個嗰陣學到嘅嘢[3]

一隻成蟲最重要嘅工作就係要傳宗接代:隻成蟲啲器官冚唪唥都發育成熟嗮,有交配同埋(乸嘅話)產卵嘅能力,可以繁殖;交配同繁殖嘅具體做法唔同昆蟲可以好唔同,例如兜蟲鍬甲蟲就出嗮名啲蟲會用角打交,打贏咗嘅就有得同啲乸交配[4]

有唔少昆蟲物種啲成蟲都係唔會食嘢嘅:呢啲物種嘅成蟲好多時甚至連口器都冇-佢哋由個蛹捐出嚟之後要做嘅,就係有咁快得咁快去搵返個伴侶交配傳宗接代,生完蛋之後冇幾耐,就算佢哋冇畀獵食者食落肚,最後都會監生餓死;呢種情況喺飛蛾當中零舍常見,例子可以睇吓出名嘅北美洲大型飛蛾物種合桃仁飛蛾Citheronia regalis[5]

[編輯]

以下呢啲嘅昆蟲都係行完全變態嘅:

... 等等。

睇埋[編輯]

[編輯]

  1. Chu, H. F. (1992). How to know the immature insects. Cutkomp, L. K. (2nd ed.). Dubuque, IA: Wm. C. Brown.
  2. "Melissa Arctic 互聯網檔案館歸檔,歸檔日期2019年11月1號,.". Butterflies and Moths of North America. Retrieved 15 September 2015.
  3. BUTTERFLIES REMEMBER WHAT THEY LEARNED AS CATERPILLARS.
  4. Nafus, D. M.; Schreiner, I. H. (1988). "Parental Care in a Tropical Nymphalid Butterfly Hypolimas anomala". Animal Behaviour. 36 (5): 1425-1443.
  5. Lotts, Kelly; Naberhaus, Thomas (2017). "Royal Walnut Moth Citheronia regalis (Fabricius, 1793)". Butterflies and Moths of North America. Retrieved November 7, 2018.

[編輯]