昆蟲學

幾種昆蟲

昆蟲學（參見英文：entomology）係動物學嘅其中一個分支，專門用科學方法研究昆蟲綱諸物種嘅身體結構、分類、生態、演化以及同人類社會有咩關係。其學科內容橫跨野外調查、實驗、標本打理等嘅範疇。研究昆蟲嘅人叫做昆蟲學家。

概論

睇埋：動物學

昆蟲學喺現代生物學入面一般視為動物學嘅子領域，研究重點係以科學方法觀察同解釋昆蟲相關嘅現象，諸如係佢哋嘅形態結構、進化、行為模式、生態特性、同埋物種間嘅互動等等，亦會用研究所得嘅知識發展應用技術，譬如係研究點樣應對害蟲同埋保育昆蟲物種呀噉。

昆蟲學專職研究嘅係昆蟲（學名：insecta）。昆蟲日常生活常見嘅例子有蝴蝶（屬鱗翅目之下）、蜜蜂（膜翅目）、蟬（半翅目）同各式嘅甲蟲（鞘翅目）。某啲節肢動物喺生物分類上相似、但查實唔屬於昆蟲，譬如蜘蛛（蛛形綱）同蜈蚣（唇足綱）等，佢哋喺身體結構等方面都有明顯分別：最易見嘅係昆蟲通常有六隻腳，而蜘蛛就有八隻。不過呢啲動物往往同昆蟲關係密切，所以昆蟲學家好多時都會識少少關於呢啲動物嘅知識。

由生物多樣性角度睇，昆蟲廣泛被認為係地球上物種數目最多嘅分類單元：根據好多估算，動物物種入便有大約七至八成係昆蟲，整體物種數以百萬計（已知同未知加埋）。昆蟲有咁龐大嘅多樣性，令到昆蟲學成為研究生態網絡同物種形成等現象嘅重要窗口。

响理論框架方面，昆蟲學同生物學主流理論一脈相承，會使用進化論（自然選擇、性選擇、共同祖先等概念）嚟解釋昆蟲相關嘅現象。

生境

睇埋：昆蟲生態學

昆蟲嘅環境適應力出眾，幾乎喺所有生態系統都搵到佢哋嘅踪影，由光同營養都好匱乏嘅深洞，以至極端嚴寒嘅南極洲，都有原生嘅昆蟲物種。

昆蟲嘅食物來源都好多樣化：有啲係食腐嘅，會食動物嘅死屍，亦有啲係食齋，譬如係出名食農作物嘅蚜蟲噉，亦有啲係食肉嘅，會捕食其他昆蟲，當中某啲物種仲會表現出跨越獵物門類嘅捕食行為—例如某啲螳螂物種甚至有能力捕食細隻嘅鳥類同哺乳類。

應用

喺應用層面，昆蟲學亦涵蓋針對害蟲嘅研究：按常見估算，喺以百萬計嘅昆蟲物種當中，真正對人類有害嘅大約有五千種左右；呢啲害蟲可以破壞農作物或者對公共衛生造成危害。昆蟲學家亦會研究呢啲昆蟲嘅行為同其他特性，用所得嘅知識嚟建立應對害蟲嘅策略。

睇埋

• 進化論