原子

英國化學家道爾吞嘅原子概念

原子（粵拼：jyun4 zi2）係一種粒子。喺保持住佢化學特性嘅條件之下，可以存在嘅最細粒子。

原子係由三種次原子粒子組成，即係質子、中子同電子。原子係化學入面幾個最基本嘅概念之一；化學作用入面原子嘅數量唔會變，係研究化學作用嗰陣嘅基本假設。

名稱

原子嘅英文名係由希臘話轉化過嚟，原本意思係「唔可以再切分嘅」。早響公元前，古希臘哲學家就講過原子嘅概念。大約喺公元前450年，德謨克利特就創造咗「原子」呢個詞語，意思就係「不可切割」。

到咗17至18世紀，英國化學家道爾吞（John Dalton）提出過：對於某啲物質，唔可能通過化學手段而將佢繼續咁分解。當時重未有質子、中子等等嘅概念。一直到19世紀尾，物理學家開始發現原子嘅內部結構，由此證明原子並唔係唔能夠進一步切分。

結構

原子概結構，核心係質子同中子，外邊嗰粒係電子

原子係由三種次原子粒子組成，而呢啲粒子每樣有幾多就控制住粒原子嘅化學特性同埋核子特性：

• 電子，每粒有一個單位嘅負電荷，係三種粒子入面最輕嘅。
• 質子，每粒有一個單位嘅正電荷，大約係1836粒電子咁重。
• 中子，冇電荷，大約有1839粒電子咁重，係三種粒子裏面最重嘅。

質子同中子都係原子核嘅成員，合稱核子。中子有好強嘅核力，將原子核入面嘅質子綁埋一齊，防止佢哋因為同性相拒而散開。而電子就喺一團好似雲咁樣嘅電子殼入面，圍住個原子核飛來飛去。

唔同原子嘅分別主要係在於佢哋有唔同數量嘅電子、質子同埋中子。原子序數，即係一粒原子入面有幾多個質子，決定佢屬於邊隻元素。喺同一隻元素入面，中子嘅數量會唔同，而呢個數量嘅分別就係所謂同位素嘅概念。透過核聚變（nuclear fusion）、核裂變（nuclear fission）同核衰變（radioactive decay），一款原子可以改變佢個原子核入面質子同埋中子嘅數量，變成另一款原子。而化學作用就會改變原子入面電子嘅數量，電子係三種粒子入面數量最易改變嘅。

如果一粒原子入面電子同質子數目一樣，咁佢就喺電荷上算係中性。如果一粒原子因為化學作用而多咗或者少咗電子，咁佢就變咗做一粒離子。通常原子送畀人嘅電子都係出自最外面嗰層電子殼；而收返來嘅電子都係多數會去最外層嘅電子殼。喺呢個基制之下，原子之間就可以傳送電子或者分享電子，造成共價鍵、離子鍵同金屬鍵。

分子係化合物入面最細而可以保留化學特性嘅粒子。大部分分子都有多過一粒原子，例如一個水分子由一粒氧原子同埋兩個氫原子組成。不過都有啲分子係得一粒原子，例如氦氣分子同埋其他惰性氣體嘅分子就得佢自己一粒原子。