氣候

出自維基百科,自由嘅百科全書
地球,表面氣候

氣候hei3 hau6係指長時期嘅平均天氣,一般來講呢段時間有30年咁長。氣候亦都可以定義做天氣統計,預計日復日、年復年嘅變化。

基本概念[編輯]

美國太空總署(NASA)嘅中解像度成像光譜儀影嘅衛星雲圖
啱啱落落嚟嘅雪花;雪係降水嘅一種。
內文:地球科學
睇埋:天氣

地球大氣圈唔係靜止嘅,而佢嘅郁動支配咗天氣同氣候。嚟自太陽嘅能量將地表同上面嘅對流層入面嘅氣體加熱空氣一受熱就會膨脹,跟手就因為密度下降而向上升,四周圍凍啲、密度高啲嘅氣體會過嚟填補,於是乎啲空氣就係噉郁嚟郁去-就係所謂嘅大氣環流(Atmospheric circulation)。主要嘅大氣環流帶有緯度 30° 以下赤道地區嘅信風(Trade winds)同緯度 30° 至 60° 之間嘅中緯度西風帶(Westerlies)。呢啲環流令到地球嘅熱能重新分佈,仲產生咗各種嘅天氣現象同氣候條件[1]

大氣圈同水循環好有啦掕,而佢哋之間嘅互動亦都影響到天氣同氣候。由地表嗰度蒸發走嘅水蒸氣跟手就會俾大氣環流吹嚟吹去。如果大氣環境啱嘅話,又暖又濕立立嘅空氣會上升,跟住佢入面嘅水汽會凝結,形成降水(包括咗落雨落雪等嘅現象)跌返落地面。降水大部分都會通過河流系統流去啲低海拔嘅地區,通常會返去海或者聚集喺湖嗰度。呢種水循環係地球有得維持生命嘅主要原因之一。佢仲會侵蝕地表,令到地表喺長遠嚟睇會慢慢噉走樣[2]

地球各地嘅降水量因為大氣環流、地貌特徵、同埋氣溫差異等嘅因素所以好唔一致,由年年幾千毫米到一年唔夠一毫米嘅都有。

大氣圈喺各個緯度嘅分佈同厚度都唔同。噉都會左右到天氣同氣候。愈係喺高緯度(近兩極)嘅地區,太陽照落地面嘅角度就會愈細,於是喺嗰啲地區陽光要通過嘅大氣層就會厚啲,所以嗰啲地區冇噉好日頭,平均氣溫都會低啲。緯度每高 1 度,海平面嘅年平均氣溫就降低大約 0.4°C (0.7°F)[3]。地球表面有得分做氣候大致相似嘅好多個緯度帶,由赤道到兩極跟次序係熱帶(Tropical)、亞熱帶(Subtropical)、溫帶(Temperate)、同極地(Arctic)氣候。氣候分區亦都可以跟氣溫同降水量嘅異同嚟整,喺呢度常用嘅柯本氣候分類法(Köppen climate classification)將全球嘅氣候分做五大類:A類熱帶氣候、B類乾旱氣候、C類溫帶氣候、D類冷溫帶氣候、E類極地氣候、同高山氣候[4]

1913 年喺美國加利福尼亞州死亡谷國家公園嘅爐溪谷地測到嘅 56.7°C (134.1°F)係地球上目前測到嘅最高氣溫[5];1983 年喺南極洲沃斯托克站測到嘅 −89.2°C (−128.6°F)係地球上有紀錄嘅最低氣溫之一[6],而遙感衛星曾經喺南極洲東部測到低到 −94.7°C (−138.5°F)嘅溫度,係有紀錄而嚟嘅地球最低温[7]。呢啲氣溫只不過係由廿世紀以嚟用現代儀器度到嘅,可能未完整體現到地球氣溫嘅範圍。

睇埋[編輯]

[編輯]

  1. Moran, J. M. Weather. World Book Online Reference Center. NASA/World Book, Inc. 2005 [2007-03-17]. (原始內容存檔於 2013-03-10).
  2. "The Hydrologic Cycle". 原著喺2020年4月27號歸檔. 喺2017年11月12號搵到.
  3. Sadava, D. E.; Heller, H. C.; Orians, G. H. Life, the Science of Biology. 8th. MacMillan. 2006: 1114.
  4. Climate Zones
  5. Highest recorded temperature
  6. Lyons, W. A. The Handy Weather Answer Book. 2nd. Detroit, Michigan: Visible Ink Press. 1997.
  7. Coldest temperature ever recorded on Earth in Antarctica: -94.7C (-135.8F)