世界史

世界史或者世界歷史，係指有人類以來地球上歷史嘅總和，雖然世界歷史本身早喺人類文明出現之前就存在，但係人類一直到近現代先真正用呢個概念來研究同講歷史，古代嘅人都係用自己所在嘅地域做中心噉睇歷史，例如東亞嘅人就當東亞係中心噉睇，歐洲嘅人就當歐洲係中心噉睇。世界歷史根據唔同嘅時間段，可以分為古代史、中世紀史、近代史、現代史等等；根據唔同嘅地區，又可以分為唔同地區嘅歷史，例如亞洲史、美洲史等等，再細分，則係中國歷史、美國歷史等等；根據唔同嘅門類，仲可以分為經濟史、城市史。

石器時代

早期人類移居路線圖，根據粒線體嘅族群遺傳學而繪成（數字以千年計算）。

舊石器時代來臨

舊石器時代係石器時代嘅第一個時期。

根據遺傳學同化石學所提供嘅證據顯示，現代人類「智人」嘅發源地應該係喺非洲。大約五百萬年前，人猿嘅始祖開始演化，由南方古猿、巧人、直立人，演化到之後嘅尼安德特人同智人。尼安德特人已經絕種，智人就成為唯一一個人屬嘅物種。人類大約喺二十萬年前左右出現，嗰陣時係舊石器時代，人類已經進化咗一段好長嘅時間。人類嘅祖先例如「直立人」曾經用過簡單嘅工具，但係隨住時代演進，工具變得更加精煉同複雜。人類亦都同時創造咗語言同下葬儀式。

中石器時代

中石器時代係舊石器時代同新石器時代之間嘅一段人類科技發展時期。更新世末期，即係大約一萬年前開始，農業出現之後完結，而呢個時間喺唔同地區都唔一樣。例如近東嘅地區，農業喺更新世末期已經開始出現，所以其中石器時代可以話係極短暫嘅。喺嗰啲冇受到太多冰河時期衝擊嘅地區，有時會較為傾向用「後舊石器時代」呢個詞。而嗰啲受到較大環境因素影響，喺後冰河時期影響帶嘅地區，就有更顯著嘅中石器時代，最少達到幾千年咁耐。例如馬格爾莫斯文化（Maglemosian）同阿齊利文化（Azilian）。但係咁樣嘅環境條件同樣令北歐嘅新石器時代遲到去公元前四千年先來臨。

新石器時代

新石器時代係石器時代原始科技同社會發展嘅最後部份。佢喺公元前一萬年開始，而主要特徵係早期部落群居、農業、畜牧業同工具嘅發展。

農業發展

根據考古學家戈登·柴爾德所形容，喺大概公元前九千年出現嘅農耕社會係一項革命性嘅大轉變。喺大約公元前九千五百年，蘇美爾人開始務農。喺大約公元前七千年，農業傳播到去印度，而喺大約公元前六千年，佢傳播到去埃及，喺大約公元前五千年，中國人亦都開始務農。

喺公元前三千年嘅歐亞大陸上面，銅製同青銅製嘅工具、裝飾品同武器開始普及。之後嘅青銅時代，喺東地中海、中東同中國等等嘅地方陸續出現鐵製工具同武器。

而河谷喺嗰陣做咗早期文明嘅搖籃，好似中國嘅黃河、埃及嘅尼羅河、印度嘅印度河流域同中東嘅兩河流域。部份過著遊牧生活嘅人，好似澳洲土著同南非嘅布須曼人就喺近代之前仍然冇農業出現。

歐亞非文明發展

農業令到人可以生產多過必須嘅糧食，有咗糧食儲備，社會變得複雜，人口開始增加，亦都因為咁出現咗文明。科技改進咗人類控制自然嘅能力，而人類亦都發展咗交通同通訊。「複雜社會」首先出現喺歐洲、亞洲同非洲嘅大陸上面，因為農業嘅發展，令到人開始一齊聚埋喺同一個地方住。而唔同嘅聚居地，人各自發展咗唔同嘅文化出嚟。

兩河流域文明

兩河流域文明喺底格里斯河同幼發拉底河兩條河嘅流域嘅新月沃土發展出嚟嘅文明。喺嗰度嘅蘇美爾發展咗楔形字嚟記錄佢哋嘅語言。