香港史

香港史有文字可以追到東漢嘅李鄭屋古墓，裏面刻有『大吉蕃禺』同『大治曆』呢幾隻吉利字句。而考古發現重可以追到史前舊石器時代。不過香港地方有好多字記低，都係十九世紀中，香港開埠之後嘅事。有信史嘅考古發現，多數係由唐朝開始。

香港考古發現散布響全香港，顯示唔同時代香港都係人活躍嘅地方。

史前

石器時代香港水位時有高低，原因冰河時期水儲響冰裏面，海平面會降，令到成個香港一帶都變成地，原本嘅海變成河谷平原。離開冰河時期海平面又會升返高，海水湧返入來。

舊石器時代

地理變化

靠地質分析，75000年前，係最後一個冰河時期，其中一段最凍嘅時間，海平面比家下低成77米，企嶺下海變成平地。之後28000年前最暖嗰陣，香港有啲低地畀水浸住。之後25000年前再轉返凍，去到18000到17000年前就最凍，海平面比家下低120米到130米，成個香港同大鵬灣都變晒地。

黃地峒

香港近企嶺下海黃地峒呢個山，近海一邊發現有舊石器時代石塘，重有6000件呢個時代嘅石器。個地方係2003年無意中發現，2004年11月到12月先開始發掘。搵到嘅石器估計係39000同35000年前，不過未有定論，相信係舊石器時代晚期。呢個時間估計，企嶺下海應該係個河谷，呢個時代嘅人就住響赤門海峽同大鵬灣。家下都未有其他發現。

黃地峒個遺址，據初步考訂，係整石器工場。石器之多係中國各地少見。石器種類同東南亞發現嘅類似，初步引證到智人係由非洲一路搬過來東亞。智人由非洲經東南亞入今日中國地方，而非經中亞入來，而黃地峒就響正擴散路綫之上。個遺址可能一直用到新石器時代中期。時間來講係相當長。

新石器時代

分流石圓環

華南文化到目前都所知有限，只係知道有別於北面嘅文化。響香港一帶，新石器時代水平面初初比家下低成100米，之後慢慢上升。原本平地都浸返晒，變成家下山多平地少。呢個時期嘅人，就要面對一路咁變嘅環境。

香港新石器時代文物相當豐富，1931年起就一直有新發現。1931年史戈菲（Walter Schofield）響赤鱲角搵到呢個時代嘅石錛。1950年代，香港大學考古隊分別響大嶼山、赤鱲角同埋南丫島掘到陶器、亦都有石造同青銅造嘅捕魚架生、兵器等等。

1990年代同2000年代，香港有唔少大型工程，喺開工之前都會做搶救發掘。1997年6月到11月，響馬灣東灣仔北，搵到成廿座新石器時代晚期，到青銅時代早期嘅墓。15座有人骨，當中7座人骨重好完整。研究過之後，呢啲人係亞洲蒙古人種，有熱帶地區人種特徵。1999年蠔涌，2001年10月到2002年9月掃管笏同埋西貢沙下，都搵到新石器時代同青銅時代遺物遺蹟。

香港有八處特殊石刻，上面有一啲特別嘅圖案，相信係呢個時代嘅產物。時代大概同北方商代相若。學者估係係先民祈求風平浪靜有關。呢八處分佈響東龍島、滘西洲、蒲台島、黃竹坑、長洲、大嶼山石壁、香港島大浪灣同埋西貢龍蝦灣。另外大嶼山汾流、杯澳（貝澳）、南丫島洪聖爺灣，都有呢個時代嘅石環。

青銅時代

長洲上便嘅石刻

青銅器約響公元前1500年左近出現，呢個係史前時代最後階段。雖則嗰陣無大量咁用青銅器，不過都搵到刀，箭鏃同埋戈呢類青銅兵器，而架生就有魚鈎同空銎斧。赤鱲角過路灣，大嶼山東灣同沙螺灣，重有南丫島大灣同沙埔村，都搵到石範，即係做青銅器嘅模，證明香港係有鑄造青銅器。

除咗青銅器之後，有唔少陶器。圖案都承襲新器時代花式，有繩紋，有幾何印紋，不過孖F夔紋就係呢個時期先有。呢陣時，可以高溫燒陶，所以就有種接近結晶嘅硬陶。

1930年代香港有考古發現，同鄰近廣東地方文化有關。時期約莫公元前6世紀到公元前3世紀，即係中國北方戰國時代。喺香港以北，東江流域嘅博羅，推斷有古國，香港古文化遺蹟，亦可能同佢有好密關係。

信史

秦國同南越國

秦國嬴政公元前218年發兵打嶺南，並且響今日廣州處起蕃禺城，立南海郡。香港地近蕃禺城，應該在蕃禺之下。係香港有人管治嘅開端。

公元前203年趙陀成立南越國，香港一樣係響蕃禺之下，佢治下開始有鹽官。香港一帶可能有鹽田，不過香港境內直至今日都未有南越國考古發現。

漢

李鄭屋古墓

公元前111年，大漢元鼎六年，武帝劉徹滅咗南越國，香港就歸漢管，呢個時候係南海郡番禺縣。李鄭屋古墓就搵到【大吉蕃禺】四個字墓磚，證明香港係番禺治下。建安八年，公元二零三年，皇帝劉協時立交州，南海郡都歸佢管。

呢個時番禺鹽官亦都響呢家下香港同深圳一帶管鹽場。不過鹽場係咪響香港境內，就未有進一步證據。之不過，近年學者（ 例如饒宗頤，呂沛銘）硏究，李鄭屋古墓墓主係個鹽官。

旺角通菜街、豉油街交界亦曾經掘到呢個時代嘅釜片。竹篙灣有漢時陶片，可能就係當時聚落之一。后海灣鰲磡石因為自新石器時代以來，係海上交通要道，所以亦都掘到當時嘅青瓷器。

另外喺沙頭角谷埔、上水華山、西貢滘西洲，荃灣柴灣角街都出土過兩漢時期嘅文物。

香港1990年代到2000年代都有做搶救發掘，大嶼山白芒、西貢滘西洲、馬灣東灣仔同掃管笏都搵到完好層次嘅大漢遺物。遺物有陶器、瓷器、鐵器同大量銅錢。證明大漢有唔少人來到香港。

香港一帶主要經濟產物係鹽，根據舊寶安縣範圍考古發現，制鹽可以追返去新石器時代。屯門湧浪就唔少遺蹟遺物。去到漢時鹽已經有官府發牢盆呢種架生畀鹽戶煮鹽。

不過由漢之後，唐之前一段時間，就重未有乜重大嘅考古發現。

吳國

三國時代，吳國初期香港一帶重係南海郡下，不過孫權黃武中（222年到229年之間）就開東官郡。香港同埋深圳就係東官郡下。呢一帶鹽場，亦都叫做東官場。孫皓甘露二年，即係266年，東官郡置司鹽都尉，專管呢個場。鹽官就駐當時郡治，即係響今日南頭，同香港只係后海灣一海之隔。

晉國

到之後晉國吞埋吳國，統一全地，不過留低嘅史書就無講香港一帶係點。雖然後尾晉北面因為五胡亂華搞到立立亂，無咗半壁江山，不過南方就無受影響。司馬衍咸和六年，即係331年，古書有講立東官郡，郡有寶安縣，香港一帶自然響佢之下。399年到402年，孫恩反晉，最後敗亡，呢班人就推佢妹夫盧循做阿頭。元興二年，即403年，盧循帶埋成班人由長江口坐船來番禺，重打入城，驅逐剌史吳隱，叫自己做平南將軍，晉朝廷迫住封佢做征虜將軍、廣州刺史、平越中郎將。盧循重派佢姐夫徐道覆同自己人佔據始興（家下廣東韶關南）同埋其他地方。係咁，香港一帶就響盧循手上。410年，盧循有十萬軍，成千艘十二丈高大船北上打晉，不過佢錯失機會，打輸咗，想返轉頭，不過呢個時候，番禺又畀晉軍霸返，411年打極都打唔入，最後搞到自殺。不過佢舊部就住大奚山（家下叫大嶼山）同附近嘅島海邊山窿。至到司馬德宗義熙年間，即係405年至418年，響寶安縣起東官城。

旺角通菜街豉油街交界亦曾經掘到呢個時代嘅陶罐。

宋、齊、梁、陳四國

公元420年，劉裕迫晉帝讓位畀佢，立宋國，香港一帶都係東官郡寶安縣。不過同年亦都寶安男相/國，係人哋封地。傳說元嘉五年（428年）之後，杯渡禪師就係坐杯咁樣嘅船，呢個時候來到家下嘅青山，響山上立寺，叫做杯渡寺。因為咁，青山亦都叫過做杯渡山。479年，蕭道成迫宋帝讓位畀佢，立齊國，香港一帶如舊。502年，蕭衍迫齊帝讓位畀佢，立梁國，如舊。507年東官郡變做東莞郡，香港就變成歸東莞郡寶安縣下。557年，梁帝讓位畀陳霸先，咁陳霸先就立陳國，都係一樣係東莞郡寶安縣。陳蒨天嘉元年，即係560年，陳蒨封到仲舉做寶安縣侯，食邑五百戶。

大隋

隋朝楊堅589年滅咗陳國，初頭重保留制度。開皇十年，即係590年，精簡到兩級，將東莞郡併入去廣州，香港一帶係廣州寶安縣下。仁壽元年，601年廣州避太子楊廣個名，改做番州。楊廣大業三年，即係606年，就唔要州，將寶安縣納入去南海郡。

梁

隋末羣雄並起，楊廣大業十三年，即係617年，蕭銑、董景珍、雷世猛起兵做反。佢哋推蕭銑做梁王。第二年，即係618年，改為叫梁帝。漢水到交趾都係佢之下。香港一帶都係佢領土。

大唐

大唐618年取代大隋。李淵武德四年，即係621年，就派兵滅梁。大唐置廣州總管府。寶安亦係呢個府名下。

去到太宗李世民嗰陣，南頭嗰邊變成屯門鎮，軍事上香港歸呢個鎮管。而南頭城東南海路二百里，就係屯門，而香港家下青山，就係嗰時嘅屯門山。屯門因為係入廣州海路之一，所以駐重兵，以免有海寇。李隆基天寶二年，海賊吳令光作亂，海南郡守劉巨麟就係用屯門鎮兵平亂。

去到肅宗李亨至德二年，即係757年嗰陣，寶安縣又變成東莞縣，直屬廣州都督府。

唐時因為屯門係海道重地，亦係廣州府外港，入廣州府城或出海外嘅船都會停響度先。當時柳兪就有詩講，『屯門雖云高，亦映波浪沒』。而另一個詩人劉夢得有踏潮歌，『屯門積日無廻飈，滄波不歸成踏潮』。而佢西北后海灣鰲磡石發現唐宋時期陶瓷片2479片，唔少重係各省名瓷，證明呢處古代交通繁盛。

自從1930年代開始，已經發現唐時瓷窰爐遺址差唔多60幾個。其中赤鱲角深灣村窰址有13座爐同兩萬幾片青瓷。窰係平陷式圓窰。所以唐代，香港係有燒瓷工業。旺角通菜街豉油街交界亦曾經掘到呢個時代嘅窰殘件。

大漢（南漢）

907年，朱溫篡唐，建大梁，香港一帶歸南海王劉隱管。之後佢細佬劉龑接任南海王、清海節度使。佢去到劉龑乾亨元年，即係917年，先至響廣州自立為王，先叫大越，將廣州改名興王府，918年改大越做大漢。

大漢最後一個皇帝劉鋹，響香港留低幾筆記錄。大寶元年，即係958年，佢置東莞縣屯門鎮。十二年，即969年，二月十八，將屯門山封為瑞應山，重有立碑。不過呢塊碑已經不知所蹤。瑞應山北麓有軍寨，有靖海都巡同知屯門鎮事。香港大埔海一帶係出名採珠場。劉鋹重響呢度叫做媚川都。招幾千人兵採珠，人數有記二千到八千不等，呢個場後尾畀大宋趙匡胤廢咗。媚川呢個名係來自晉人陸機《文賦》，『水懷珠而川媚』。媚川都雖然講大埔海，不過亦都包埋今日香港全境。

大宋

970年，大宋皇帝趙匡胤派潘美打大漢，最後971年，大宋開寶四年，大漢大寶十四年，劉鋹投降。香港一帶變成大宋國土，係廣州都督府，東莞縣之下。開寶五年（972年），東莞縣併入增城縣。六年（973年），東莞縣又分返出來。

佛堂門

因為香港一帶海運發達，九龍灣海有唔少船來往停泊，熟水性嘅福建人來到九龍一帶開村。九龍大磡蒲岡村（1940年代畀人日本人拆走加大啟德機場，家下黃大仙警署一帶），村民個林氏族譜講，大中祥符元年成申（1008年），原藉福建莆田，以艚運為業嘅林松堅、林栢堅響佛堂門遇險，浮到去南佛堂山崖甩難。佢哋子孫有經商致富，響九龍彭蒲圍定居，之後搬到大磡窩蒲岡。考古發掘有唔少磁器響呢一帶搵到，好可能同海上貿易有關。羅香林講過佢嘅朋友喺黃大仙住宅內搵到大量宋代銅錢，全部響宋室南渡長江之前。證明嗰時九龍灣一帶幾有錢。

1125年大宋大上皇趙佶同佢個皇帝仔趙桓畀金人擄走，大宋無晒長江以北嘅領土，趙佶第九個仔趙構1127年響南京自立為宋帝，最後同金人議和。雖然北方有咁大變化，因為嶺南遠離動盪，所以唔受兵亂影響。

大宋國統治之下，北方人唔少人落來嶺南定居，到無咗北半領土，呢個趨勢就更加快。香港考古發掘到幾處宋時居所。最出名係鄧符，佢響趙佶崇寧年間（1102年—1106年）做官。後尾見錦田桂角山風景好，就定居落呢度，重開埋力瀛書齋。佢個孫鄧銑因亂時勤王有功，曾孫鄧自明娶到趙構個女。所以鄧氏子孫散布附近，鄧氏響錦田、龍躍頭、屏山、竹村、廈村都係望族。

鹽業

大宋時期香港都係產鹽之地。鹽甚至支撐住大宋經濟，官府靠鹽收入發鈔。大奚山（今日大嶼山）有海南柵，推斷係今日大澳，九龍灣有官富場。紹興年間（1131年至1162年），土著朱祐盤據大嶼山，後尾佢向官府投誠，少壯就做水軍，老弱就可以返歸。當時鹽係官府專利，鹽稅好重，官府利厚而鹽民薄，所以周圍都有鹽梟賣私鹽避稅。宋會要輯錄就有講官府會派兵鎮壓私鹽。隆興元年十一月十五日，曾經廢官富場，將佢歸入叠福場（沙頭角北）。淳熙十四年（1183年）五月廿九皇帝趙昚下詔，明令禁大奚山私鹽。之不過仍然禁之不絕。大嶼山嘅鹽梟同彈壓官高登（蘇登?/萬登?）聚眾反抗，響海度劫船，甚至攻擊廣州城。1197年，慶元三年，提舉徐安國派人打呢班鹽梟；廣州經略錢之望帶兵攻入大嶼山，盡殺島民，重響東涌駐兵三百；去到1200年，慶元六年，守軍減半，移駐官富場，後尾重撤走埋。

1247年，咸淳十年甲戌六月十五日，官富場鹽官嚴益彰響佛堂門天后廟後面寫有摩崖題記，係香港現存最古老有年份嘅石刻。

末帝

宋王臺，係炸咗聖山留低嘅一𡁫石

大宋去到1277年已經末期，正月時皇帝趙昰同佢親細佬趙昺（後尾都係皇帝），畀元軍追住來打。宋軍一路護住佢哋。由當時惠州境嘅甲子門，想經海路廣州城。當時香港屬於廣州境，亦係海路必經之路。二帝因為咁就來到香港。首先1277年丁丑年正月佢哋去梅蔚。梅蔚有學者推斷係今日大嶼山梅窩，不過亦有學唔同意，因為實在唔順路。四月，佢哋去到官富場，即係九龍東面大海灣，九龍灣。考古學家響西貢泥涌搵到宋室專用磁器，可能佢哋來到官富場之前，經過泥涌。響九龍灣亦都搵到唔少精緻宋代磁器，不過係咪同宋帝有關，就唔有實質證據。六月二帝就搬去遠少少，九龍半島嘅古墐。古墐就係今日馬頭圍，馬頭圍以前叫做古墐圍。後人響附近留有宋王臺，有聖山。臺南有二王殿村，起上帝廟。紅磡重建嘅北帝廟就係咁來。九月，二帝又搬去到淺灣，即係今日嘅荃灣。十一月，大元劉深襲淺灣，保護二帝嘅張世傑輸咗。傳說今日荃灣北面嘅城門，就係村門抵抗劉深嘅石城。十二月佢哋又迫住去到秀山，即係珠江口虎門。

元朝

大蒙古國忽必烈進滅大宋，建立元朝。1277年劉深襲淺灣，證明呢個時候香港已落入元軍手中。1278年頭大宋撤出香港。

元朝時仍舊歸廣州東莞縣管。因為有珠鹽呢啲重要產物，所以有屯門巡檢司管理民政。唔少人南遷響香港落地生根。新界五大族之一，廖氏就係響元末由福建搬過來。而響東莞鄧氏長房鄧林之曾孫鄧季琇（號松嶺）呢一房，搬到龍躍頭開田落戶，最後趕埋彭氏出龍躍頭。

官方響大埔海同后海灣有採珠，不過開下停下。鹽場亦大為減少，連官富場都停產。考古上，響赤鱲角蝦螺灣，發現到大元時期嘅鑄爐十三座，講明呢處有冶鐵工業。

政治方面，原本響至正元年（1354年）係一個東莞縣鹽官仔嘅何真，因為響纍次幫元朝打退土豪叛軍，去到至正二十三年（1363年）已經係廣東大官，手握大軍。呢個時候朱元璋勢力已經響北方好快擴展。何真亦都加強防範，收服各地土豪，重收服埋廣州，東至潮州，西至蒼悟都係佢勢力範圍。可見當時香港已經係何真勢力之下。元朝皇帝重封佢做右丞，拜為榮祿大夫。不過到咗呢個時候，元朝已經江河日下。朱元璋已經打埋廣東北面江西。

大明

朱元璋響1368年洪武元年登基做皇帝，國號大明。佢二月派廖永忠做征南將軍，廖永忠去到福州，寫信畀何真，叫佢歸順。何真回信答應。三月廖永忠帶軍來到潮州，何真降明。就咁樣，廣東就落響大明手上。香港亦隨之歸入大明。香港仍然係廣州東莞縣地。朱元璋亦封何真做東莞伯。

大明初年，更加多人進一步南遷香港。文氏響由今深圳境入香港境，響新田落戶。文氏響大宋末年保衞宋室出名，出過文天祥呢位名臣。新田落戶嘅係三丁過繼畀文天祥嘅後人。

大明時期，香港嘅重要性都反映響海事之上。雖然香港地處邊疆，文獻有限，不過就因為海事關係，海圖第一次詳細咁畫出香港各地名。

明初

大元時，海上運輸已經關係到一國經濟命脈，太祖朱元璋同成祖朱棣就更加重視海上貿易。永樂年間，鄭和七次下西洋。海圖上面，就有寫到大奚山。香港一帶係下西洋必經之洋。香港有唔少人係靠海為生。

朱元璋、朱棣都先後加封南海神同媽祖林默娘兩位神祗。尤其係媽祖，佢加封做天妃（之後清時加封天后）。由長江到珠江沿岸都有佢嘅廟。響廣州東莞縣，就近香港嘅赤灣天妃宮（今天后宮）。赤灣天妃宮響家下南頭半島頭，蛇口西面一個海港。何真係響赤灣度接過廖永忠，重同佢入廟拜媽。而鄭和下西洋時，響珠江口南頭一帶遇險，求天妃即顯靈轉安。佢回程時就叫人重修。因為佢咁靈，香港一帶靠海為生嘅人，都會去供奉，呢個習慣去到1950年代，因大陸政治轉變，先改去佛堂門天后廟。

大明睇重海防，明初洪武廿七年（1394年），廣州左衞千戶崔皓響南頭城舊城上面起東莞守御千戶所城。軍事上面，近在咫尺嘅香港就歸佢睇。

大明時，番舶唔係道道都泊得，東莞只可以泊虎頭門（即虎門）、屯門同埋雞棲（可能係今日九龍灣），其中兩處都喺今日香港境內。

中葉

正德九年（1514年），葡萄牙（當時叫佛朗機）佔領屯門到后海灣，重棟埋石柱，刻埋國徽。佛朗機人起軍營，造火銃、設刑場。大明同佢哋多次交涉。響正德十二年七月廿八（1517年8月15號），葡萄牙人（當時叫佛朗機）就同廣東官員第一次會面。最後大家傾唔埋，正德辛巳（1521年），廣東巡海遣副使汪鋐遂親自督師驅逐。佛朗機人據險抗守，以火銃轟明軍，並想佔據埋南頭城。汪鋐親臨前線，指授方略，用爛船火燒佛朗機嘅船。爛船載住枯柴同乾荻草，灌油點火，隨風飄去佛朗機船，好快就燒到對方嘅船。重搵埋好熟水性嘅人，將佛朗機嘅船鑿沉。佛朗機請過當地唐人銅銃、火藥，汪鋐請到呢班人幫手，照辦煮碗，整火銃轟返轉頭，繳埋佢大小銃二十幾支。嘉靖壬午（1522年），佛朗機人迫住棄咗部份船，坐三艘船走佬。

嘉靖二年（1523年）因為日本大內同細川兩幫人代表日本兩個政府，都到咗浙江寧波做貢市。因為官員貪污不公，任由兩方互鬥，爆發了寧波之亂。1529年廢除了寧波市舶司大監，禁貢市，停止對外貿易。禁止貿易因為影響民生，令好多無生計。因為貿易變成非法，亦都無官方渠道，唔少大明沿海居民出海走私，同佛朗機人、日本人，荷蘭人海上交易。呢班人做生意之時，亦坐船到處搶劫，做成倭寇之亂。

香港因為位置海邊，亦都受海禁影響，亦受倭寇所擾。所以嘉靖年間開始，為咗應付倭寇，香港一帶就加強海防。香港唔少地方都加入去海防地圖裏面。廣東海防分三路巡海備倭官軍，香港就響中路，即係東莞縣南頭城起，向東經佛堂門，十字門，去到冷水角諸海澳呢個範圍。

1557年，葡萄牙人重賄官員，求得灣泊蠔鏡，即澳門。其他澳都因而作廢，包括香港境內屯門同雞棲。

去到嘉靖卌二年（1563年），福建巡撫譚綸、總兵戚繼光奏請恢復設置水師城寨（簡稱水寨）舊制。於是廣東潮州、惠州、廣州、高州、雷州、瓊州等地設置了六個水寨。廣州境內嘅南頭寨，就東防大屋，西防廣海。嘉靖卌四年（1565年）起，南頭寨阿頭就係一名參將。香港就係南頭寨防御系統之下。響嘉靖卅一年（1552年）應檟寫嘅《蒼梧總督軍門志》，九龍個名就響海防圖之上。

嘉靖年間，南頭一帶饑民搶米暴動，鄉紳吳祚就幫手平息暴動。平息之後，吳祚等就向廣東海道副使劉穩請求響當地建縣。眾多官紳都認為當地離東莞縣治百餘里，管理好唔方便，又成日畀海寇騷擾，紛紛附議。劉穩轉告粵督，奏準立縣。萬曆元年從東莞縣劃出56里、7608戶、33971人，成立新安縣，縣治設在南頭。香港自始響廣州新安縣之下，直至大清時轉為英國管治為止。

萬曆十四年到十八年（1586年到1590年），南頭水寨就搵過更高級嘅總兵擔任。南頭寨舊額大小戰船五十三載，官兵一千四百八十六人。萬曆十九年（1591年）以後，戰船重曾經去到一百一十二艘，小陸官兵及雜役曾達到二千零八人。南頭水寨另外重有六處汛地，分別係佛堂門、龍船灣、洛格、大澳、浪淘灣、浪白。每汛駐軍二百幾人。其中佛堂門同大澳就係肯定響今天香港一帶。萬曆年間海圖就更加詳細，郭棐所著《粵大記》一書，裏面《廣東沿海圖》中，就第一次寫住香港個名，赤柱、黃泥涌、尖沙嘴、葵涌、淺灣等等，重有好多香港地名都響圖上面。

天啟三年（1623年），葡萄牙人又入侵佛堂門，畀新安縣知縣帶兵同埋鄉民擊退。

香業

大明時東莞盛產莞香呢香木，香港各地都有種，重遠銷各地。香港，香粉寮都係同呢種香木有關。香業直至大清年間先至沒落。

明末（南明）

大明去到末期，李自成響大明北面江山，自立大順國，同大明交戰。崇貞十七年（1644年）甲申年，即大順永昌元年，大清順治元年，李自成打到京師。三月十九，大明皇帝朱由檢吊頸自殺。呢個時候，雖然無皇帝，大明南面半壁江山重響度，香港一帶重響大明統治之下。去到五月初三，福王朱由崧做監國，五月十五響南京登基做皇帝，年號弘光元年。下一年，弘光二年（1645年），清軍打過長江，五月廿八捉咗朱由崧。大清軍無再向南打，香港一帶仍然係大明兩廣總督管。1645年，閏六月初六，唐王朱聿鍵響福州任監國，閏六月廿七做皇帝，是為隆武元年。不過呢個時侯各地已開始擁兵自重。朱聿鍵封兩廣總督丁新魁做大學士，廣東香港一帶就係歸於朱聿鍵旗下。而丁新魁重捉埋響廣西自立做皇帝朱亨嘉，封咗做平粵伯。隆武二年（1646年）江西失手，八月廿一，朱聿鍵響汀州遇到清軍而死。十月初十，桂王朱由榔響廣東肇興任監國，十月十四做皇帝，是為永曆元年。香港一帶又變成朱由榔旗下。無幾耐，十月二十因為江西贛州失手，佢哋驚到搬去廣西梧州，廣東民心大驚。十一月初二，蘇觀生同廣東布政使顧元鏡、侍郎王應華請唐王朱聿𨮁做監國，十一月初五登基做皇帝，是為紹武元年（1646年）。香港又轉到朱聿𨮁手。十二月十五，清軍入廣州，朱聿𨮁俾李成棟捉咗，吊頸自殺。

大清

大清順治三年（1646年），大明紹武元年年尾，大清李成棟帶軍入由福建入廣東。十二月十五陷廣州境，香港就歸大清管。1648年，大明永曆二年四月十五，李成棟轉投大明，朱由榔返肇慶，廣東連同香港又轉返歸大明管。1649年，皇帝愛新覺羅福臨封尚可喜做平南王，賜佢金冊、金印。1650年，大清尚可喜、耿繼茂南下，二月打廣州，十一月初二攻入城，香港又轉返入大清，仍舊係廣州新安縣。而成個廣東就由尚可喜鎮守。

大清順治十八年（1661年），大明永曆十五年，大清為咗對付霸住廈門同臺灣嘅鄭成功，八月就厲行遷界令，將沿海各地居民都搬入內陸，等人唔可以接濟鄭成功。全香港各條村都響要搬嘅範圍，迫往搬入內陸，亦都有部份村民匿埋入山。十二月初二，朱由榔畀人由緬甸帶返雲南，一過境就落入清軍吳三桂手。捉咗明帝之後，大清更加集中對付鄭成功。十二月十八，清廷又頒佈嚴禁通海敕諭，乜人都好，過界一律要斬死。成個香港都荒廢晒，田無人耕，鹽場無人理。而響康熙元年（1662年）打後幾年，村民重要迫住要搬幾次，越搬越遠，而且三日內要搬走，三日後官兵連屋都燒晒，連樹都斬埋。康熙五年（1666年），新安縣因為乜無人，亦都併埋入東莞縣。香港亦都一齊併入。

大清遷海影響好大，影響到之後香港嘅命運。沿海田地無產，沿海省份糧食不足。鹽田荒廢，亦令到周圍缺鹽。遷民無以為生，死好多人，唔少都轉做賊。海民連海邊搵食都斬，亦都迫住變做賊。官府亦都收唔夠稅，要遞度攤分。無同外國通商，影響經濟發展，科技落後。海禁唔單止無影響鄭氏，鄭氏重可獨攬貿易，響廈門設市。因為影響實在太大，大清唔少官員好多次請求復界。

康熙十二年（1673年），平西王吳三桂叛清。守廣東嘅尚可喜一心向清廷，無加入到叛亂。但係台灣鄭經入廣東東面潮州，馬雄入廣東西面高州、雷州同廉州，廣東十郡有四郡失守。尚可喜頂唔順，疏請告老還遼東，重請朝廷派人幫手，而佢個仔尚之信響廣東。皇帝愛新覺羅玄燁就派舒恕同莽依圖來。康熙十五年（1676年）二月廿一，尚之信加入吳三桂反清，吳三桂封佢做招討大將軍，輔德公之類，趕走清軍，好多廣東廣西大官都跟住佢叛清，廣東成尚之信之下，香港自然落入佢手中。而尚之信老竇尚可喜響十月鬱病而死。不過吳三桂向尚之信索大量軍餉，尚之信唔想畀吳三桂控制，又響十二月初九去江西同向和碩簡親王乞降，皇帝就赦佢罪，要佢立功。廣東部份地方又歸返大清，不過就響尚之信之下。雖然臺灣劉國軒佔惠州，迫廣州，香港應該重響大清之下。康熙十九年（1680年），繼吳三桂位嘅吳世璠敗局已定，清廷就轉頭解決尚之信。八月廿八尚之信畀人因叛謀而被補，閏八月賜死自殺，了結咗尚之信坐擁廣東，香港一帶完全控制響清廷手。

臺灣平定之後，廣東巡撫王來任、廣東總督周有德請求復界。去到康熙八年（1669年）終於應承取消遷海，畀人返去海邊。而新安縣亦重新設返。後尾香港感謝王周二人功績，新界五大族響上水立報德祠，用來恭奉二公。而鄧氏亦都響錦田立周王二公祠，裏面重開周王二公書院，重十年打醮一次報答二公。香港雖然有人返來，不過已經無法回復舊觀。因為搬嗰陣，死嘅人太多，好多都返唔到來。原本響香港嘅漁農工商，亦都無乜人做得返。曾經係香港大業嘅鹽業，亦都衰落。連香業都一同末落。清廷最後鼓勵客家人搬來香港定居，開田散業，去到英國接管九龍時都重有客家人搬來開村。康熙八年，大橋墩市場亦到搬到元朗，即係家下元朗舊墟。

香港雖然有返人住，但係海盜盛行。九龍灣幾條村嘅人都曾經差唔多畀海盜殺晒。香港各村都要加強防衞自保，起晒牆，甚至有大炮。大清亦加強防守，香港各地起墪台，一來防鄭氏，二來防海賊。

康熙年間，屈大均喺佢名作《廣東新語》裏面，講到海門，新安出海有小三門，屯門，急水門，中門（今尖沙嘴海面），鯉魚門，雙筯門，南佛堂門，同北佛堂門。廣東有六水寨，廣州府就設喺南頭，之下有兩信地，叫屯門同佛堂。而香港山有官富山，即今日九龍後一大片山脈。

大清乾隆五十五年個嗰，即係1790年，香港重係廣東省廣州府新安縣治下。

嘉慶十五年（1810年），為禍香港同新安一帶海域嘅最大嘅海賊張保仔投降。雖然張保仔投降，唔少佢嘅手足都接受招安，但張保仔仍然好多部下唔受呢套，海賊仍然橫行，到香港殖民地時期都重有。張保仔以佢經驗，幫清廷打其他海賊。

嘉慶廿四年（1819年），舒懋等編好重修《新安縣志》。裏面亦都提及香港等地嘅史料。

大清與英國交接

内文：香港殖民地史

英人喺去省城途中，會經過香港補給，成為佢睇中香港做殖民地原因。而1839年嘅鴉片戰爭，就係大清割香港畀大英嘅序幕。1841年到1997年係香港嘅殖民地時代，香港三大區分批由大清嘅新安縣九龍司，轉做英國嘅香港殖民地。

英人來香港

英人來省城做生意，無批准係唔可以上岸，所以佢哋都會住喺船上面，或者去澳門。今日香港仔一帶，有唔少水上人，亦有本地同客家村，好似香港圍（香港村），係英人補給之處。唔少唐人都會同英人打交道。香港名人周壽臣嘅阿爺就係村民之一。所以香港呢個名就係由呢度來。

1810年代中，英使想去北河進見皇帝，總共坐四隻船去。其中兩隻船，亞嘑士地號同孻也號載住譚夏士公爵同欽差人員，另外兩隻英國東印度公司緝私船，地士加佛里號同硯威士地機度號，載住頭等寶星士丹頓同書寫通事。大清嘉慶廿一年（1816年）7月10號到13號，四隻船到咗香港補給。佢哋班人當中，有個叫亞卑路嘅人，同埋啲欽差人員，喺香港島行咗個圈。亞卑路話呢香港好荒涼，得漁翁撒網同曬魚。

二律（義律）

1833年，因為英國畀東印度公司嘅200年對華貿易專利屆滿，英國打算畀各商人自由來中國做生意。1835年1月22號，英國帆船亞機利號船主馬當路去澳門途中遇強盗擄人勒索銀五百，左副商務大臣二律求救督憲，幾經波折，唐官知道事關人命，2月26號救返啲人，喺交畀羅便臣。經過擄人呢件事，1835年11月，羅便臣同英商就決定搬去伶仃島。一來商船入黃埔，都要領牌照先可以入，伶仃係必經之路，近啲方便啲。二來伶仃島喺虎門以外，唐官理唔到。三來唔似喺澳門咁多掣肘，可以自己保護自己。所以之後，有英船都停船喺伶仃島，或者靈濤（即係大嶼山），或者香港。不過伶仃島有個唔好處，就係夏天成日打大風，好唔方便。所以，西商會議就決定春令就泊香港，商務大臣就由得佢哋。

道光十五年，1835年12月14號，理藩院彭夏士頓公爵撤咗商務大臣之缺，之後所有商務都交畀二律搞，做咗英廷駐省欽差。二律喺呢日呈上鄧撫憲，另加唐文千字，請求留喺省城辦公。撫憲叫佢留喺澳門，佢上奏畀皇帝愛新覺羅旻寧。道光十七年，1837年3月18號，皇帝批畀佢駐省城辦商務，但一切如舊，唔可隨便入城。因為呢時有好多海賊，二律求英廷派多兩架戰船畀佢差遺，保護英商。

大清道光十七年（1837年），英國船羣集香港同九龍尖沙嘴一帶洋面，未得清延批准，私自上岸辟地起屋來住。

禁鴉片

1837年，大清皇帝下禁洋藥（即鴉片），凡係賣洋藥嘅商人都要走。9月29號，省憲督撫要二律凡洋船載洋藥都禁入口，二律答話佢呢個唔係欽差搞得掂。1837年11月，二律接到理藩院彭夏士頓文書，以後寫畀撫憲嘅信，都唔會有稟字。佢話呢件事畀撫憲知，撫憲唔開心，唔畀佢留喺省城，要佢去返去澳門。

1838年7月13號，英國水師提督蔑連，搭第七十四號坐駕船和立士利號，帶埋戰船亞利稼連去澳門。蔑連見二律之後，一齊去銅鑼環（銅鑼灣）。二律命賣洋藥嘅船去晒銅鑼環。二律邀撫憲去睇戰船，撫憲話以後文書永絕，往來一定要寫稟字先收。咁啱帆船科路近號船主差度蔑士，轉搭第二隻船逢卑號，由港去省，經過虎門，虎門炮臺炮擊隻船。跟手官兵上船查，問有無蔑連戰船嘅英兵，問過無先畀過。

紥係銅鑼灣嘅蔑連，聽到之後即刻坐戰船上虎門龍吉。龍吉度有水師提督關天培，派人話二律不恭，戰船無故灣泊龍吉有違和約。龍吉就話佢來質問做乜查英船，藐視英廷，辱佢。重話東印度公司約滿，今後英船由英國皇家保護。

1839年3月，中國欽差林則徐通告行商洋商，賣洋藥者死，一定要交晒洋藥出來。3月21號，在省洋人唔可以去澳門，唔准書信。又由黃埔派兵去十三行。二律正去營救，交晒啲洋藥出來，立約不賣洋藥，最先畀英商去澳門，但係英商唔放心，去晒香港。有成百隻船喺香港，成為禍端。

九龍衝突

道光十九年，1839年7月7號，英國船卡拿敵號同埋孟稼羅號嘅水手喺尖沙嘴上岸，因故打死鄉民林維喜。事緣水手強行同鄉民索酒鹽（另一說醉酒鬧事，另一說上岸遊行），呢件事亦都叫林維喜事件。呢件引起在港英人議論紛紛。當時欽差林則徐要求英國商務欽差義律交出兇手，重即刻來香港。但係8月23號，義律堅持用大英刑法，喺科威利林號，查明其中兩人有上岸搞事，判佢哋返英國做苦工三個月，罰銀十五磅，另六人搞事兼殺人，罰佢哋返英國做苦工六個月，罰銀廿五磅。喺中國界內，用英國刑法，林則徐好嬲，即刻喺香山嚴示，任何人連澳門都唔畀人供糧畀英人。澳門供食畀英人嘅話，就連澳門都無得食。英船都離開澳門。

9月4號，英軍喺九龍山炮台附近海面突襲大清水師，大鵬營參將賴恩爵，指揮水師同官涌同尖沙嘴炮台官兵御敵，打退英人。九月嗰陣英兵船和利智號船主士蔑同省督，想喺全璧上落貨。11月3號，因為要傾呢件事，廿九艘船喺全璧下，炮臺之間。雙方喺度敵視咁，唐船亦唔可以來往，英船由和利智同夏仙父兩架炮船維持住。唐人想截英船退路，用火船迫近英船。二律要所有船退到銅鑼環，商船灣舶香港。省城貿易封閉。

鴉片戰爭

1840年1月14號，中國皇帝下命唔准保護英商，唔准幫佢轉貨入來。之後，英國皇家同東印度公司傾好派船打省城。6月有兵船15艘，輪船4艘，渡河小船25艘，同埋4000步兵。由頭等寶星伯麥睇住。義律要開賠償，否則開戰。而大清皇家唔肯，鴉片戰爭就咁開始。

因為珠江口封咗，佢哋轉去打廈門，再打焦山、汀海，封寧波。因戰書無唐官送到北京。於是7月底義律發大隊北上，8月5號去到北河口，好近北京，先有人處理。祈善拖延叫佢哋去返廣東解決，林則徐因禍延他省免職，而祈善就做咗兩廣總督，諗計拖住。

英兵船發炮打清帆船

1841年，中朝皇帝命各省見洋船入口就炮打。1月9號，英國進軍虎門，大清各軍頂唔住英兵發炮同進攻，虎門失手。關天培請暫緩兵三日同祈善商議。立約穿鼻。1841年1月19號，立約四款：

1. 香港地讓畀英國；
2. 軍餉六百萬補返畀英國；
3. 文書往來平等；
4. 省城貿易唐正月開返。

呢四款就係後人叫嘅穿鼻草約。

1月25號，頭等寶星畢拉同英國官員坐英國兵船修路化號抵港，喺摩星嶺昇旗。畢拉做陸路提督，而卑林馬做水師提督。商務大臣二律做總督兼全權欽差，重燃炮致賀。1月30號發文通知居民，以後香港歸英國，居民受英國保護，亦可以保留自己習俗。有乜糾紛都可以搵巡理府。

另一方面，中朝皇帝1月27號重未肯覆。祈善想設法補鑊，但係畀皇帝召返京問話。條約始終無着落。2月26號，英兵又再進攻虎門，攻向省城。大清數埠既失，皇帝震怒，祈善正法。楊欽差接手，但一樣搞唔掂，省城陷。5月31號，省城用50萬贖返，但割香港重未落實。

後尾道光卄二年九月卄四，即係1842年10月27號喺南京立和約，中朝由耆英、伊乍浦代表，英延由欽差璞世爵（砵甸乍）代表，先至正式將香港讓畀英國。重有准英商喺省城、厦門、福州、寧波、上海等埠貿易。燒洋藥就再賠銀六百萬，賠累英商倒盤銀三百萬，英軍伙食費一千二百萬。呢個就係後尾叫嘅南京條約。

所以，英欽差頭等寶星璞世爵，就做咗港督，兼且係北京全權大臣，駐喺北京。而二律就做副，代佢喺香港做嘢。不過二律無幾耐就要返鄉下，由尊士頓頂上。佢即刻喺香港喊冷賣地，但理藩院話全璧和約未妥，唔可咁做。叫二律去省城。最後璞世爵搞掂和約，由京回港，宣佈香港係唔抽稅嘅埠， 開始有洋行幾間。

英國殖民地

香港開埠時期

大清道光廿一年辛丑歲，即係1841年，因為響第一次鴉片戰爭裏面，大清打輸畀英國，英國人就喺當年1月26將號將香港島屬領，後世稱為「香港開埠日」。而之後嗰年，大清就迫住簽《南京條約》，將香港島割咗畀英國。英國得到個島之後，即刻響北岸大興土木，好快就初見規模。呢個時候，大清體會到英國軍事威脅。重係響新安縣嘅九龍同新界，都加強防守。

香港島

香港島喺英人接收時有好多條村。大村有香港（香港仔）、黃泥涌。細村有鶴嘴、柴灣、土地灣、大潭（喺家下赤柱）、田灣、灣仔、大潭叾、裙帶路、黃麻角、掃捍埔、石澳同薄扶林。港口市集村有赤柱、筲箕灣同石排灣。多數都係本地人村，亦都有少數客家人村，總共有田地400英畝。咁多條村，以姓周本地人嘅香港村最正，有田100英畝，7到8間屋，人口200人，當中9個係敎細路讀書。黃泥涌係姓葉嘅本地人村。赤柱有本地、客家、同鶴佬組成，有八百到一千人到。

英國人得香港，就諗住大興土木。諗過政府所在地，有赤柱同黃坭涌，住最後揀咗，近九龍嘅裙帶路，建立香港城。城後亦得名域多利城。

九龍

九龍仍喺新安縣境。因爲香港城越來越繁盛，連帶九龍亦多咗人。來自五華等地嘅客家人，搬到九龍開村。當時香港城同省城等地，需要大批石材建城，九龍諸多石山，客家人開成爲石塘，供諸四方。當中以九龍四山最出名。四山卽係牛頭角、茜草灣、茶果嶺同鯉魚門。

擴展至九龍半島時期

北京條約

1879年，香港島同九龍半島割咗畀英國，用紅色表示。新界重喺新安縣境內。

大清響第二次又輸畀英法聯軍，1860年又簽埋《北京條約》，將香港島對面海嘅九龍半島連埋昂船洲一齊割讓畀英國。九龍半島個邊界只係用竹籬分隔，位置就係喺今日嘅界限街。

擴展新界到主權移交前

喺1898年，英國同大清簽《展拓香港界址專條》，大清租埋深圳河以南同附近嘅兩百幾個離島畀英國，租期係99年。之後呢塊地就叫新界，大清響協議之下，可以保留九龍寨城，可以有官駐守。

新界六日戰

香港總督接收新界公告

内文：新界六日戰

一八九九年，當時香港總督係卜公，打算喺一八九九年四月十七號，喺大埔正式接收新界。在此之前，香港政府就同新界鄉民見面，以便接收。鄉民唔清楚接收後政策，從而憂慮，而香港政府未及時息疑，令鄉民不安。加上警察喺屏山高處度起警局，屏山鄉大族鄧氏，甚不滿此舉破鄉風水。屏山鄧族就組織武力反抗，後得廈村鄧族同錦田鄧族加入。佢哋亦請新界各約其他大族加入，其他人質疑有無必要反抗，不表支持。況且佢哋之間有猜忌，各鄉亦怕大族會乘機攻村，有啲只肯捐錢，有啲會派部份人，有啲就唔肯參加。十八鄉因爲鄰近屏山廈村，畀兩鄉迫住加入，唔係搵人洗劫佢。大埔南部嘅翕和約，縱然受威脅，堅拒參與，因此日後不能阻止警察入大埔。屏山同廈村，亦搵埋喺東莞雁田同懷德嘅近族幫手。一九九八年四月十號，喺元朗太平公局做司令部。

英國當時無諗到有武力反抗，大埔只駐有少量軍警，以作接收儀式。駐守軍隊並不足够。

四月三號，大埔太坑（今泰亨）文族，率先火燒場地。之不過，大埔鄉民亦向政府道歉補數。四月五號，廈村派咗六十人去大埔，不過四月六號見道咗歉，返返廈村。查實當時鄉民軍未備好晒，東莞嘅人未齊。

總督遲到一八九九年四月九號，先至發出告示，宣佈政策，經已太遲，反抗如箭在弦。

新界六日戰，由四月十四號打到四月十九號。主要戰場喺太埔、林村、八鄉。英國多次戰事失誤，人數遠少於鄉勇。相反，鄉勇戰術運用得宜，數陷英軍於險境。若非英軍武器精良，火力威猛，兼且鄉勇武器落後，否則傷員會大增。不過英軍只有少量傷員，無人陣亡，相反，有唔少鄉勇陣亡。

戰事之後，各方亦速速和解。香港政府亦無追究。四月廿一號撤軍一半，月尾完全撤走。雖然當時輔政司駱克有反對咁做，呢個係卜公決定，快啲將事丟淡。而香港政府同鄉民，亦當無件事發生過咁，好快就囘復平靜。按傳統，香港政府起用各族士紳，間接統治鄉民，就算原本東莞鄧族話要搞事，都畀本地鄉民拒絕。

因爲六日戰中，鄉勇訓練有素，香港政府懷疑係兩廣總督同新安縣大清官員搞鬼。結果五月十六號佔領深圳（當時係墟），同時亦趕走九龍寨城嘅大清官員。直至英國政府敦促，軍隊十一月十三號撤返境內，但寨城從此無官駐守。

日治時期

一九四一年十二月八號，日軍由寶安攻入香港，英軍退至醉酒灣防綫。喺城門，日軍突襲成功。英軍退守香港島。日軍分三路攻港，英軍唔夠打。

十二月廿五號聖誕日，香港總督楊慕琦向日軍投降。英軍同西人，鎖入戰俘營。

日本以軍法統治。物資奇缺，日本人遺唐人囘鄉。

戰後英國殖民地

香港重光

一九四五年，日本無條件投降。香港由英軍接管。之後楊慕琦接手。

難民

一九四九年，中國共產黨成立中華人民共和國。一九五零年，打敗中華民國軍隊，攻入廣東。無數難民，擁入香港。香港政府亦隨卽封閉邊境，立邊境禁區。

一九五一年，石硤尾大火。香港政府建徙置區，安置居民。

一九六七年，中國共產黨在港支部，發動暴亂，是爲六七暴動。當時交通停頓，而商業電臺播音員林彬，遭暴徒燒死。香港人普遍反對暴亂，望香港政府恢復秩序。因不得民心，中國共產黨下令終止。

香港前途談判

因新界租約，會於一九九七年終止。一九八二年，英國與中國談判，解決香港前途。一九八四年簽署《中英聯合聲明》。

玫瑰園計劃

一九八九年六月四號，解放軍喺中國北京，屠殺示威者，引致香港人心不安。唔少人移民避禍。

香港政府實行玫瑰園計劃，大興土木去穏定人心。

中國主權及香港自治

按一九八四年，中國同英國簽訂嘅《中英聯合聲明》，一九九七年七月一日香港主權會交予中國。

一九九七年七月一號，香港主權移交，香港成為中國一特別行政區，除外交與國防，全面自治。香港保有參與國際組織之權利。

參考

• 饒宗頤嘅九龍與宋季史料，1959年11月，萬有圖書公司出版。
• 重修新安縣志

睇埋

• 廣州史
• 珠江文明
• 香港地產發展史
• 香港貨幣史

出面網頁

• 《香港古地圖》 第一
• 《香港古地圖》 第二
• 《香港古地圖》 第三
• 香港歷史帶路人 - 香港歷史人物圖鑑，用粵文講香港歷史人物。