朱由榔

朱由榔（1623年11月1號—1662年6月1號）係史學界公認嘅南明最後一位皇帝，1646年到1662年在位，建都肇慶，跟廟號叫明昭宗，因為年號係永曆，又叫永曆皇帝。

生平

朱由榔係明神宗嘅孫，明熹宗、明莊烈帝同弘光帝嘅堂弟，阿爸係桂王朱常瀛。隆武帝封朱由榔做桂王。

1646年，隆武帝過身，之後朱由榔喺廣東肇慶做監國。之後朱由榔由肇慶走咗去廣西，蘇觀生等人擁立喺廣州嘅朱聿𨮁做南明皇帝，年號「紹武」，就係紹武帝。

朱由榔聽到朱聿𨮁登基做皇帝之後，返番去肇慶登基做皇帝，年號「永曆」，就係永曆帝。永曆帝派人去廣州勸朱聿𨮁取消稱帝，畀對方拒絕咗，仲斬埋永曆帝派去嘅人。

廣州嗰邊派兵攻打肇慶嗰邊，永曆軍輸咗。但係呢個時候清兵突襲廣州，捉咗紹武帝，之後紹武帝死咗。之後南明剩番永曆帝嗰邊嘅勢力。

1648年（南明永曆二年、清順治五年），清朝嘅金聲桓、李成棟先後歸附南明，但係佢哋後尾都畀清兵打敗，兩個都死咗。

之後有以前張獻忠嘅部下孫可望、李定國等人歸附南明。1652年，李定國打敗清朝嘅定南王孔有德，孔有德喺桂林自焚死咗。

但係之後南明嘅形勢逐漸不利，永曆帝走入緬甸，最後畀緬甸交畀清朝嘅吳三桂，之後畀清朝處死。