朱溫

朱溫

朱溫（852年12月9號—912年7月18號），又叫朱全忠、朱晃，係後梁開國皇帝，後世叫佢做後梁太祖。

生平

唐朝時期

佢本來跟黃巢反大唐，中和二年（882年）九月，朱溫睇見黃巢形勢越嚟越唔掂，就歸順大唐，之後朝廷賜佢新名「全忠」。

883年三月，朝廷封朱溫做宣武節度使。884年五月，河東節度使李克用喺追擊完黃巢之後返去汴州補給嗰陣，朱溫請李克用入城招呼佢，李克用飲醉咗之後講咗啲嘢得罪咗朱溫，於是朱溫喺宴會完咗之後就派兵偷襲李克用班人，李克用雖然走甩咗，但係同佢一齊嚟嘅人就死咗成三百幾人，之後李克用同朱溫就勢成水火。

884年九月，朝廷封朱溫做沛郡侯。光啟二年（886年）改封做沛郡王，同年又改封做吳興郡王。

龍紀元年（889年）二月，朱溫將作反多年嘅秦宗權送去京師。三月，朝廷封朱溫做東平王。

天復三年（903年）二月，唐昭宗封朱溫做梁王。

904年正月，朱溫殺咗宰相崔胤。同年八月，朱溫派人殺咗唐昭宗，之後擁立李柷繼位，就係唐哀帝。

905年，朱溫喺親信李振鼓動下，喺滑州白馬驛（今河南省滑縣境內）一日做瓜咗僕射裴樞、新除靜海軍節度使獨孤損、右僕射崔遠、吏部尚書陸扆、工部尚書王溥、守太保致仕趙崇、兵部侍郎王贊等「衣冠清流」三十幾人，投屍於河，史稱「白馬驛之禍」。

後梁時期

大唐天祐四年（907年）四月，朱溫改名做朱晃，同月廢唐哀帝篡位，起國號「大梁」，史稱「後梁」，改元開平，正式開始咗五代十國時期。

喺佢做皇帝嗰陣，幾重視農業發展，下令兩稅法之外唔准妄有科配，並曾經因為侄仔朱友諒（衡王）唔體恤災民卻進獻瑞麥一莖三穗而罷免朱友諒嘅官職；但係因為連年打仗，民不聊生，開平四年（910年）發生柏鄉之戰並戰敗，同晉王李存勗牙齒印加深。晚年宮廷內陷入權力鬥爭。

朱溫生性狼死，殺人如草芥。元貞皇后在世時尚能勸止，死後就變咗大墨魚（鹹濕佬），甚至亂倫，包括新抱都要入宮侍寢。

乾化二年（912年），朱溫畀三仔朱友珪隊冧，終年61歲，在位6年。