趙昺

宋帝昺像

宋少帝陵

趙昺（粵拼：ziu6 bing2，1271年—1279年），亦叫宋帝昺（sung3 dai3 bing2）或者宋少帝（sung3 siu3 dai3），係南宋末代皇帝，死嗰時得九歲。

生平

趙昺做皇帝之前封過永國公、信王、廣王同衛王等等。當時蒙古人攻打南宋，兵荒馬亂，南宋皇室同朝臣將軍都搏命向南邊走難，嚟到廣東建立行朝。1278年，重係細路嘅趙昺喺碙州梅蔚畀班大臣扶上皇位，改年號祥興（coeng4 hing1），改碙州做祥龍縣。後來蒙古人一路追落嚟，同宋朝軍隊喺崖山駁火，史稱「崖門戰役」。結果南宋輸咗。1279年，形勢無得挽，趙昺畀宰相陸秀夫孭住跳海，享年九歲。趙昺嘅死象徵住宋朝至此正式滅亡。

陵墓

而家深圳蛇口嘅赤灣有宋少帝陵。據講係趙昺條屍漂到赤灣，畀人見到，知道係宋帝昺，將佢就地安葬。1984年，喺香港趙氏宗親會聯同蛇口旅遊公司出錢修葺陵墓。而家係國家重點文物之一。