龍穴島

出自維基百科,自由嘅百科全書
(由龍吉跳轉過來)
Jump to navigation Jump to search

座標: 22°41′35″N 113°38′38″E / 22.693°N 113.644°E / 22.693; 113.644

海中島仔Lankit I.即係龍穴島

龍穴島粵拼lung4 jyut6 dou2英文Lankeet IslandLankit IslandLung-uet),又叫龍穴洲,係廣東廣州南沙區,喺虎門對出,零丁洋北面。家下係鷄抱沙一部份[1]。呢度係廣州最南邊嘅地方。

歷史[編輯]

早喺宋代,龍穴洲近海成日大霧,又有海市蜃樓。據話文學家、書法家蘇東坡被貶到惠州陣,聽到話龍穴洲有海市蜃樓,試過坐船去觀賞,不過唔好彩冇撞到。到明代陣每逢年初三到初五,好多人逼埋去虎門靖康、歸德,等著睇島度有海市蜃樓。屈大均廣東新語記載:

海市多見靖康場,當晦夜,海光忽生,水面盡赤。有無數燈火往來,螺女鮫人之屬,喧喧笑語。聞賣珠鬻錦數錢糧米聲,至曉方止。

民國時代歸屬東莞縣,龍穴島係定為縣嘅八景之一,名靖康海市[2],仲建立埋「東莞縣明倫堂示範農場」。依家呢度有八成居民原籍都係東莞,都係1930年代走日本陣由東莞厚街遷入[3]。1950年代前後島度都係雲集百條漁船,有唔少由中山、珠海過來嘅。1960年代後島周邊海水變淺,海水污染多咗,啲漁民陸續遷去珠海、香港,似珠海香洲仲有個龍穴隊就係呢度過去嘅[4]

地理[編輯]

地圖上,島呈三角,上指西北,東西爲一橫。龍穴喺伶仃洋最北一帶,近珠江口,即係虎門。島向東北望,係虎門東側穿鼻,正中間有兩島仔,有沙相連,叫三板洲。向西北望,係虎門西側大角山。龍穴向西望有萬頃沙

自然環境[編輯]

龍穴、銅鼓、爻杯三小島組成。銅鼓山係原始龍穴島嘅三個山頭之一,舊底東臨伶仃洋張保仔洞就喺山腳。島嶼地處鹹淡水交匯處,盛產香大蕉、荔枝西瓜海鮮,常見海鮮有:金古魚(當地俗話:上山怕老虎,下海怕金古)、黃腳鯉、鱸魚、龍利、黃魚(獅子魚)、白鴿魚、花魚、大澳魚、奄哥魚、黃蟹、肉蟹、圍蝦同麻蝦等[5]

環島海灘,有天然泳場,間有石春、貝殼。島四圍畀海潮沖刷,形成眾多海蝕洞,有唔少花名:鯉魚宮、蝦宮、蟹宮、龍宮、藏寶洞等等。有唔少古榕樹生喺海濱岩隙,雖畀颱風侵襲,仍穩健婆娑[6]

人文[編輯]

相傳龍穴島正南有幾個深而開闊嘅山窿,係南海龍王嘅居所。而島中央嘅居民區就起有三聖宮,據傳始建於明代,經過幾次重建,最新一次係光緒戊口乙亥年,而保留清代形制風格,坐西北向東南,三間兩進,綠瓷瓦筒黃脊屋頂,仿描古瓷磚[4]。每年農曆十一月初八、初九、初十島上民間組織仲有舉行三聖公誕,四周漁民包括香港漁民每逢三聖公誕,都到龍穴島朝拜,人數多達幾千人,幾十年香火唔斷[3]

觀光[編輯]

離島約200米嘅巨礁度,有道光年間英國建造嘅燈塔,潮退陣可間水過去。海島中部銅鼓山上原建有旅遊設施,1980年代初,由時龍穴島所屬嘅珠江華僑農場同一港商聯手開發。1985年,廣州客輪公司開通埋龍穴島嘅遊船專線,每禮拜有幾班船來回,由廣州市區接駁遊客。到2004年前後,中船龍穴基地選址旅遊區海岸一帶建設,沙灘浴場由此消失。後旅遊區慢慢廢棄[4]。但仍可自行前往[7]

  • 三聖宮廟
  • 觀日亭
  • 望江亭
  • 張保仔洞
  • 蟹洞
  • 一線天
  • 小海灣
  • 防空洞等

發展[編輯]

龍穴邊有度假村。但將來呢處會成為南沙港包圍,佢東面鷄抱沙地會變成龍穴島造船基地

產業[編輯]

據老居民回憶,最早期島上居民係種水草,又種過香蕉。後尾就多咗人落海捉魚。1960年代後海水污染多咗而島周邊海水又變淺,啲漁民就開始填海圍墾、開挖魚塘、養殖魚蝦。當年新鮮嘅魚獲送去東莞、深圳、番禺等地。漁民養殖嘅有金鼓(金古魚)、黃鰭鯛(黃腳鯉)、海鱸、麻蝦等,其中主產嘅黃鰭鯛(黃腳鯉)甘甜鮮嫩,仲註冊成咗廣東省「綠色食品」品牌。

龍穴島東部宜家好大部分畀造船廠、港口、物流園區佔據著,填海而成嘅中船龍穴造船基地就佔咗約7.6公里嘅海岸線,2004年左近開建,2008年上半年開工造船,畀視作華南最大、全國三大造船基地之一。南端係南沙港碼頭,係廣州港第四大港區,最後生嘅一個。2009年當局同龍穴島制定咗個用海規劃,規劃到2020年,龍穴島面積將達到76平方公里,增加臨港產業用地或儲備用地[2]

交通[編輯]

南北兩端,鳧洲大橋、新龍大橋分別通去南沙街、萬頃沙鎮

  • 地鐵:4號綫金洲站,換乘1a至龍城商業中心站[8]
  • 客車:長途客車到番禺汽車站,轉新墾汽車站,接駁碼頭班船到島上[9]
  • 港口:四個50000噸級南沙港區集裝箱一期碼頭。
  • 高速公路南沙港快速路

參考[編輯]

  1. 王世俊、李春初、田向平 (2003-06-18). "蕉门口发育演变及其对南沙港的影响". 
  2. 2.0 2.1 龙穴岛,一直在“长大” 互聯網檔案館歸檔,歸檔日期2018年2月3號,.,广州农业信息网 2013-12-25
  3. 3.0 3.1 昔日“孤岛”填海造地 临港工业璀璨“明珠” 南方都市報 2019-08-30
  4. 4.0 4.1 4.2 龙穴岛,一直在“长大” 互聯網檔案館歸檔,歸檔日期2019-08-30. 新浪 轉南都 2013年11月12號
  5. 龍穴島上觀日出,南方網旅遊 2003-03-19
  6. 番禺縣志(1840-1990)·旅遊業
  7. "龙穴岛旅游区". 广州市南沙区人民政府. 2015-04-16. (原先內容喺2018-02-03歸檔). 
  8. "廣州的11個絕美小島,有的你坐船都去不了!". 搜狐. 2017-04-02. 
  9. 李存修 (2003-03-19). "龙穴岛上观日出". 广州日报.