天堂頂 (廣州)

出自維基百科,自由嘅百科全書
Jump to navigation Jump to search
天堂頂
Tiantang Peak.jpg
海拔 1,210(3,970英尺
位置 廣州從化增城惠州龍門交界
座標 23°39′16.59″N 113°48′52.11″E / 23.6546083°N 113.8144750°E / 23.6546083; 113.8144750座標: 23°39′16.59″N 113°48′52.11″E / 23.6546083°N 113.8144750°E / 23.6546083; 113.8144750
山脈 九連山脈
天堂頂 is located in 廣東
天堂頂
天堂頂
天堂頂嘅地理位置

天堂頂粵拼tin1 tong4 deng2)係中國廣東嘅一座山,喺廣州從化增城惠州龍門縣交界,亦係石門國家森林公園南崑山國家森林公園嘅最高峰[1]。海拔1210m。呢座山既係廣州地區嘅最高峰,又係惠州地區嘅最高峰[2][3]

[編輯]

座山嘅山頂因為一年365.25日都俾雲霧籠罩住,好似喺天入面噉,所以「天堂頂」嘅名係噉嚟。

概況[編輯]

山體主要由燕山第四期黑雲母花崗岩整成,表層啲泥大多數係山地嘅紅泥。海拔1000米以下啲植被大多數係亞熱帶常綠雨林,主要有殼鬥科樟科山茶科金縷梅科木蘭科等下面嘅屬,1000米以上大多數係山地草甸。另外重有50幾種藥用植物,100幾種油料同纖維植物,卌幾種澱粉植物同70幾種鳥類動物。

山頂比地面低7.3℃,比廣州市區低8~9℃,喺冬天最凍嗰時,極端最低氣溫可以去到-8.6℃[4][5],佢亦係廣州同惠州地區最凍嘅地方。喺山頂重有嚿天王石,佢同附近嘅天堂二峯、馬騮額、橫坑頂形成四大雄峰。一到太陽落山時可以望到好陡嘅山崖。上到山頂可以感受到「遠山時明滅」同「高峽出平湖」嘅壯觀景象。喺山頂,天晴時可以睇到天王石、天堂二峯、馬騮額、橫坑頂、睇日出同日落、林海、雲海;甚至連流溪河從化溫泉良口鎮嘅部分景區、流溪河水庫廣州蓄能水電廠惠州南崑山等大自然風光[1]

路線[編輯]

目前有3條路可以上山頂上呢座山頂:

路線 路途同景色 門票
南崑山國家森林公園 近而靚 30
石門國家森林公園 一般 40
碧水峽[註 1] 遠而爛 免費

上山注意事項[編輯]

上山方面,雖然南崑山國家森林公園方允許遊客上去山頂睇靚景[5],但係石門國家森林公園方唔畀遊客上山頂[6],即使要上去都要經過園林部門批准先至得。而石門方之所以唔畀遊客上山頂,係因為嗰個景區暫未開放,加上條路超難行,半佬重有出現,相反冇其它設施響度,而且除巡山員外就冇其它人,加上有好大安全隱患兼手機冇信號,一旦出冬瓜豆腐,冇人可以幫到你。雖然係噉,但三仙會天堂附近嘅石門香雪景區隔籬有條路仔可以直接上山,去到天堂頂,而且平時冇乜人理。

另外,石門國家森林公園南崑山國家森林公園嘅門飛係唔互通嘅,穿過呢兩個景區嘅話必須要重新畀錢。

事件[編輯]

廣州14位大學生蕩失路被困[編輯]

2012年10月5號,廣州有14位學生喺石門國家森林公園,計劃上去天堂頂玩。落山嗰時本嚟按原路返落山,但落山時遇到幾位驢友話有條近路可以落山,結果喺半佬蕩失路,加上嗰時天開始黑而被困喺山入面。警方接報之後,廣東省公安廳、廣州市委、廣州市人民政府,廣州市公安局,從化市委(今日嘅從化區委)、從化市人民政府(今日嘅從化區人民政府)、惠州市龍門縣同增城市(今日嘅增城區)等各級領導專門作出批示而馬上部署,展開救援工作,從化市公安局副局長帶咗差唔多80位民警,喺溫泉鎮、良口鎮政府,廣州市衛生局、廣州市林業局等單位配合而開始入山救人,民警重嗌埋住喺石門公園附近且識附近山況啲村民做嚮導,甚至喺10月6號中午出動埋直升機嚟協助救援。喺當年10月6號差唔多太陽落山時先至救返佢哋。直到當晚21點,全體正式坐返廣州嘅大巴返去[7]

東莞1位20歲青年蕩失路,被困兩日一夜。[編輯]

2016年7月2號,東莞有位温氏嘅20歲僆仔自己一個人喺從化良口鎮爬山上到天堂頂,到咗山頂之後由於嗰日落大雨,就順住向山下行,結果蕩失路,困咗喺山谷入面。警方接報之後迅速組織冚唪唥嘅大嶺山派出所民警同管理處護林隊成卅人到石門公園嘅天堂頂一帶救人,半佬重嗌埋從化區公安局巡警大隊同灌村派出所十幾位差佬增援,但由於報警人畀嘅信息太少同林區面積比較大,加上網絡信息唔穩定,好難判斷到僆仔喺邊度蕩失路。後嚟僆仔通過幾個手機定位都未搵到,凈可以逐個排查,搵到第二日晚黑都未搵到。7月3號深夜重嗌埋廣州藍天救援隊,重帶埋最精確嘅GPS定位嚟幫手,到咗朝早6點又再上山搵人,搵咗3個鐘頭卒之搵得返。由於温氏嘅僆仔連續超過24個鐘冇食嘢,即使救援隊員喺佢廿米近嗌佢都冇人應。救援隊搵到佢之後休息咗成2個鐘重及時補充營養之後,重及時救咗佢落山。喺事發後嘅第三日12點幾,被困喺天堂頂嘅温氏僆仔終於救返[8]

規劃上山徒步路線[編輯]

內文: 天堂頂步道

2016年7月28號,廣州市人民政府第一次針對上山啲驢友而整咗1Mm路程嘅上山路線規劃,其中一期示範段100km,最先揀咗從化60km嗰路段做試點。其中包括咗上去天堂頂嘅路線(天堂頂綫)[9]。同年11月11號,工程正式完工而對外開放[10]

兩位自己揸車嘅人失聯[編輯]

2017年9月8號上晝,有位揸車人士揸部梅州車牌嘅豐田越野車佛山開始,帶咗位分別喺越秀區同從化當地人及學生去到良口鎮良平村(碧水峽附近)上去天堂頂玩,但同日16:00開始失聯,部車亦碌咗落山[11]。警方接報之後,搜救人員馬上第一時間先問清楚嗰日嘅值班領導同村幹部等有關人員喺2017年9月8號上晝附近究竟發生咩事,重查埋閉路電視嚟追蹤失聯人員曾經喺邊度出現過。查到失聯人員之後,搜救人員馬上組織埋當地村民同村委、差人、衛生院、從化區登山協會,及越野車隊成十幾部越野車嚟參加搜救行動,直到9月10號凌晨喺碧水峽附近個山溝發現咗懷疑失聯人員揸過部越野車,重發現車頂有帶血跡嘅紙巾,喺同日11:57發現到兩位受咗傷嘅失聯人員而救落山,兩個鐘頭後亦交畀醫療部門處理[12]

有關[編輯]

睇埋[編輯]

註同攷[編輯]

  1. 位置喺105國道嘅K2470+570標記位有條分岔路,入去行到「廣州第一漂」之後跟住耕田條路行到第一漂嘅終點,之後行到第一漂嘅起點入去。