石門國家森林公園

出自維基百科,自由嘅百科全書
Jump to navigation Jump to search
石門國家森林公園嘅正門

 石門國家森林公園粵拼sek6 mun4 gwok3 gaa1 sam1 lam4 gung1 jyun2 ,簡稱石門sek6 mun4),係中國廣東廣州嘅一間森林公園,亦係1995年經林業部批准而搞嘅公園兼中國第一間國際森林浴場,位置喺從化溫泉鎮桃園村,X934鄉道嘅12~25km標記位(大嶺山林場附近)。

呢間公園既係北回歸線嘅一片綠洲,又係一年四季都有靚景睇嘅景區,甚至係廣東最受歡迎嘅外景攝影基地。另外,廣州嘅最高峰——天堂頂就響呢個景區入面。

概況[編輯]

公園嘅佔地面積2636公頃。森林覆蓋率去到98.9%,其中華南地區保存得最好嘅原始生態林有1.6萬畝。山唔單止高,而且樹木都好多。而氣候方面,雖然夏天唔係好熱,但冬天好凍下。年平均氣溫21.4℃;7月平均氣溫得28.5℃,極端最高氣溫都唔過30℃;雖然冬天平均溫度得12.4℃,但山頂景區極端最低氣溫可以去到-6℃[1];而最高嘅天堂頂,極端最低氣溫可以去到-8.6℃[2][3]。佢亦係廣州地區最凍嘅地方。

呢個景區有好多個動植物。其中植物分有98個科、168個屬、409樖樹,夾埋有1300個種,其中有50種係名貴稀有及瀕危樹種。包括咗穗花杉野山荼伯樂樹桫欏樹繡球茜等幾十種植物;珍貴動物包括咗白頸長尾雉蟒蛇水獺白鷳細鴉鵑、及靈貓等廿幾種動物。

景區[編輯]

成間公園有5個森林生態遊覽區、1個生態保護區同1個綜合服務區。從景區入口開始入去無耐,分有石門同石灶兩條路,石門嗰條落去山腳,而石灶嗰條上去山頂,但天堂頂景區暫未開放[4]

石門(落去山腳)[編輯]

公園北邊一景,入門之後行左邊條路入去,屬落坡道路。嗰度可以睇到紅楓湖、芙蓉棧道、石門花田、石門香雪、石門溪流景區。雖然石門溪流亦係公園海拔最低嘅地方,但係過咗石門溪流之後繼續行落去,就係直線上山地方,可以去到三仙會天堂同天堂頂景區。

景區由於石山壁立、怪石超多、山巔古松又多又有力,好似開咗嗰兩條石門噉。重神秘嘅係兩邊各有一樖千年古榕、好似對公乸獅子睺住石門噉。所以「石門」嘅名係噉嚟。

紅楓湖
芙蓉棧道
石門溪流
石門香雪

水景紅葉——紅楓湖[編輯]

內文: 白茫潭水庫

景區西北角一景,亦係休閒踏青嘅好去處,有長達800m嘅環湖樟木棧道,周圍都有楓樹,而且湖對面有山烏桕。每年10月到第二年1月期間,有好多人嚟呢度睇紅葉,因為嗰時陽光射落啲樹葉度出現光影交錯現象,而成為一片五彩斑斕嘅童話世界噉。尤其係太陽落山時最靚,好似條火紅飄帶噉落到湖入面。

芙蓉棧道[編輯]

景區西北角一景,係600m嘅石基親水步道同木板親水棧道。條路從入口開始一直到石門中心區,附近有石門香雪、石門中心區、石門幽谷同桃花園等景點。棧道同溪流接埋一齊,兩邊都有種芙蓉花。喺每年春末夏初時節,出現一日三變嘅照水芙蓉景象。尤其喺棧道入口附近有3個水池,每年夏天最多人嚟玩水。棧道重可以去到石門幽谷同三仙會天堂等景區。

石門溪流[編輯]

景區北邊一景。啲水喺深山源頭流出,穿過山林好多嚿亂石、跟住喺兩樖千年古之間兜彎噉流,溪水清到見底。每年夏天有好多遊客嚟呢度避暑。

石門森林探險區[編輯]

景區東北角一景。兩座石山林立兼超多怪石,嗰度可以上到去三仙會天堂,路上啲風景喺春夏時期最靚。到三仙會天堂後有個12畝嘅細天池,跟住天池水渠條路可以上到去超多古樹嘅大森林,而且同石灶景區嘅森林小道連埋一齊。嗰度可以上去廣州最高峰——天堂頂。

石門香雪[編輯]

景區北邊一景。入面有千畝連片嘅梅林,大多數係青梅。喺每年冬天開花時,睇落去好似北國風光噉,從好遠睇落去好似白雪噉。每年冬天有好多遊客嚟呢度睇

三仙會天堂[編輯]

石灶(上去山頂)[編輯]

公園南邊一景,入門之後行右邊條路入去,屬上坡道路。嗰度可以睇到一年四季嘅植物景。紅葉喺秋末冬初可以望到;百雀歸巢喺春天可以望到;冰雪景要喺半佬比較凍嘅天氣先至望到。行入6.9km路程位置,可以望到廣州第一臺同蓮花湖;再行入4~5km路程,可以睇到天池花海、古樹園、水生植物園同國際森林浴場呢啲景區。

呢個景區因為有個天然石灶而改成噉嘅名。

紅葉閣
天池花海

紅葉閣[編輯]

景區西南角一景。嗰度啲楓樹以樹種統一兼色調比較靚而出名。大多數係楓香樹,從好遠地方望落去係紅一色,深秋時期有金黃色。每年秋天時,場景好似中國華北地區街頭或韓劇藍色生死戀Ⅰ》嘅外景噉。

百雀歸巢[編輯]

景區西南角一景。入面專門種咗好多禾雀花,喺每年3月中下旬到4月下旬開好多花。佢係公園乃至華南地區好少見嘅奇觀。

蓮花湖
廣州第一台

第一觀景台[編輯]

又叫廣州第一台,景區西南角一景。去到亭閣位置有海拔888m高,亦係廣州地區最高嘅觀景台,有分主副兩塔。其中主塔佔地面積400m²,高10m,喺天晴時可以望到從化大部分地區。登山步道有900m長,一共999級,行嗮大概要半個鐘頭。

天池[編輯]

景區有北天池同南天池之分。北天池喺景區南邊,X934鄉道嘅18.9km位置,有蓮花湖同雁鳴湖,附近有紅荷林,每年1~3月先有花睇;而南天池喺景區東南角,X934鄉道嘅22.8km位置,有碧雲湖同古樹園,隔籬有天池花海,嗰度有好多種色嘅花卉。面積有成百畝,跟住天池行成2km長。喺南天池對面有1.6萬畝嘅原始次生林響度。雖然每年5~6月份有好多花開,好似臺劇《薰衣草》嘅外景噉;但係每年1月係白雪一片,好似韓劇《藍色生死戀Ⅱ》嘅外景噉。

古樹園[編輯]

景區東南角一景。喺南天池對面有密密麻麻嘅原始次生林,有好多樹從出世到而家有成幾個世紀都有。入面重有條通去國際森林浴場嘅森林小道,同石門景區嘅森林探險區連埋一齊。條路全長大概1km,而且超靜,負離子含量重多過好多座公園同山,啱嗮用嚟健身同呼吸新鮮空氣。

國際森林浴場[編輯]

景區東南角一景。佢係華南地區保存的比較好嘅南亞熱帶原始次生林,面積大概1.6萬畝,森林覆盖率去到98.9%。入面保存住複雜同穩定嘅生態系統同好多珍稀野生動植物。從好遠地方望過去,啲樹高到入雲。入面重唔停噉散發出又香又濃嘅揮發性物質,可以除菌同殺毒、淨化空氣、消除噪音都得。

峽谷探險區[編輯]

天堂頂風景區[編輯]

天堂頂
內文: 天堂頂 (廣州)

景區東北角一景,要通過石門景區嘅三仙會天堂道路或石灶景區嘅森林小道條路上去先至到。佢係廣州最高海拔嘅地方,而且山高氣爽、超多樹林。氣溫比地面低7.2℃,比廣州市區低8~9℃。喺山頂重有嚿天王石,佢同附近嘅天堂二峯、馬騮額、橫坑頂形成四大雄峰。一到太陽落山時可以望到好陡嘅山崖。上到山頂可以感受到「遠山時明滅」同「高峽出平湖」嘅壯觀景象。喺山頂,天晴時可以睇到天王石、天堂二峯、馬騮額、橫坑頂、睇日出同日落、林海、雲海;甚至連流溪河從化溫泉良口鎮嘅部分景區、流溪河水庫廣州蓄能水電廠惠州南崑山等大自然風光[5]

另外,呢個景區東邊有條路可以通去南崑山國家森林公園景區同健身步道,雖然入去健身步道唔使錢,但入去南崑山要另外畀錢。

唔同季節嘅花同果[編輯]

公園入面喺一年四季都有嘢睇,而且每個季節都唔一樣。主要出名時節如下:

睇花 食果
油菜花桃花春節3月8號前後
杜鵑花:3~4月
禾雀花:3月中~4月中
五月花海:5月~6月中
早李:3~4月
五月花海:5月~6月中 三華李:5月底~6月底
荔枝:7月~8月
龍眼:8月~9月
七彩天池:9月底~11月初
石門紅葉:11月~1月中
:9月~11月
板栗:9月~10月
:10月~11月
石門香雪:12月~1月底
雪景同冰掛:12月底~1月
紅花荷:1~3月
油菜花桃花春節3月8號前後
砂糖桔:12月~2月

由於呢間公園喺一年四季都有景睇,所以用詩句形容:

  • 春天百花競艷,滿山錦繡。
  • 夏天飛瀑飄飄,銀光四射。
  • 秋天滿山紅葉,如詩如畫。
  • 冬天石門香雪,北國風光。

交通[編輯]

呢個景區嘅交通好唔方便,冇巴士、地鐵或其它公共交通直達,一定要去各地旅行社報名參加旅行團先至去到。自駕車方面:

  1. 行高速:到從莞深高速嘅桃園站落,轉左行10km嘅路程先至到。
  2. 行國道:到105國道嘅以下標記路段入去(兩個事但一個):
    K2492+160標記入去從樟一路,之後入去桃園西路一直行落去先至到。
    K2484+318標記入去龍泉路,落到龍崗村後轉左入桃園東路,之後一直行落去先至到。

門票同開放時間[編輯]

開放時間
  • 平時:09:00~17:00
  • 節假日:08:00~17:00
  • 雖然17:00之後重可以喺山上逗留參觀,但天黑嗮之後要全部清場。
門票
  • 成人票每位40。
  • 6<歲數≤18/全日制大學本科或以下學歷啲人:半票
  • 身高≤1.2m嘅細路/歲數≥65嘅老坑(要有廣州嘅老人證或中國大陸嘅身份證)/導遊(要有導遊證)/記者(要有記者證)/現役軍人(要有軍官證)/殘疾人(要有殘疾證):免費
  • 青少年入場一定要帶居民身份證或學生證。
  • 入境遊客一定要帶《港澳居民來往內地通行證》。
  • 臺灣入境遊客一定要帶《臺灣居民來往大陸通行證》。
  • 公園遊客唔可以同時享有入場優惠同網站訂票優惠。

凡係有機動車啲遊客入場時,車費另外計:

  • 大車入場20/次。
  • 細車、三腳雞入場10/次。
  • 摩托車、單車(計埋三個轆啲車)入場5/次。

注意:長度超過9m啲車唔畀入場;而石灶景區喺每年冬天有積雪期間,除搶險車同特種車、軍車之外,其他車都唔畀上去。

[編輯]

  1. 石门公园昨日最低零下6℃ 春天可到从化看冰挂[失咗效嘅鏈] 大洋网 (2014-02-12)
  2. 南昆山天堂顶录得-8°C 惠州下起“米粒雪” 互聯網檔案館歸檔,歸檔日期2016年1月25號,. 廣州日報大洋網 (2016-01-24)
  3. 南昆山天堂顶雾凇冰挂雨夹雪 雕琢冰雪世界 南方网 (2016-01-24)
  4. 网文推荐上天堂顶看云海[失咗效嘅鏈] 信息时报 (2015-10-20)
  5. 石门国家森林公园--天堂顶风景区 互聯網檔案館歸檔,歸檔日期2015年9月24號,. 中国林业网

出面網頁[編輯]