沙頭角
呢篇文講香港地方。想搵深圳政區嘅話，請睇沙頭角街道。
沙頭角（英文Sha Tau Kok，普通話拼音Shatoujiao），香港一地，亦係海角，地處香港陸地邊境，喺邊境東北一角。沙頭角過境就係深圳，香港來往中國關卡之一。沙頭角河經呢處出海，故此個海叫做沙頭角海。
名
[編輯]相傳大清有官行過沙頭角，海皮處見沙頭角海碧波盪漾，詩興大發，即席噏句「日出沙頭，月懸海角」。從此世人就稱呢處做沙頭角。
地理
[編輯]沙頭角有山叫元墩山。有海叫沙頭角海。
歷史
[編輯]沙頭角，原係廣州府新安縣地，歸大清管。大清立海禁，迫沿岸居民，遷入內陸，結果本地人死傷無數。朝廷解禁復界，因之前死傷太多，少人遷囘。徙客人到沿海，以實人口，沙頭角亦在此內。客家人原爲山民，喺三省交界，卽廣東東北部嘉應州、江西南部、福建西部。
復界後治安不靖，客家村組約自衞，沙頭角有十約，其中兩約，喺位今下深圳，其餘八約，喺今下香港。十約以慶春約為最。沙頭角人繁衍，日後分支到新安各地，或遷石湖墟、聯和墟以至九龍半島同香港島。
由於沙頭角近海，唔少水上人灣舶居住，沙頭角亦有墟市。
一八九八年，英國向大清租新界，拓展香港。雙方簽訂以沙頭角河及深圳河爲界。當時英國尚未接收，要勘定界後，以河水水漲爲界。一八九九年，香港政府正成接收新界，沙頭角亦從此分兩處。河北爲華界，歸大清，河南爲英界，歸英國。
沙頭角喺邊界之上，變成邊界墟市，重開咗條中英街，幾多人來做生意，重越做越墟冚。
一九一一年，大清之地，轉爲中華民國。華界沙頭角，由於新安縣轉名寶安縣，變成寶安縣下，但熱鬧如舊。
一九五零年，解放軍攻入廣東，廣東成爲中華人民共和國領地，而華界沙頭角，亦在其中。其間大批難民湧入香港，香港不勝負荷，而中國亦動盪不安，去向不明，唯有封閉邊境。香港政府豎鐵絲網封境，邊境範圍劃爲邊境禁區，要有禁區紙先入得。因爲無人來，沙頭角自此式微。之不過無耐，中國就大飢荒，唔少人偷渡來香港，沙頭角係熱門地之一。有啲邊境警員，見場面慘烈，亦隻眼開，隻眼閉，畀佢哋入境。難民得到救濟後，唔少遣返中國。
一九六七年，香港親中國共產黨人士，時稱左派人士，或者土共，受澳門一二三暴動鼓舞，喺香港搞六七暴動。而寶安嗰邊，有民兵越界突襲沙頭角，殺傷香港警察，亦擄人去中國，氣氛十分緊張，後尾放人返港。香港政府唔似澳門政府，並無退讓，最後暴動因不得民心，中國總理周恩來下令停止。沙頭角因而囘復平靜。自始，沙頭角人入警隊，都變得困難。鑑於政治不安，香港政府鼓勵鄉人，連沙頭角人，遠赴英國謀生，唔少鄉村亦沒落。
二十世紀八十年代，中國開放改革，深圳連沙頭角劃做經濟特區，華界嗰邊經濟起飛，逐步變為市區。後尾行政上，深圳市取代寶安縣。於是大陸沙頭角劃入深圳市鹽田區，叫做沙頭角街道。香港嗰便幾經政制變遷，家陣屬北區。
一九九七年七月一號，香港主權由英國移交到中華人民共和國，實施自治，是爲香港特別行政區。由於港中差異太大，香港同中國邊界，實在不能放寛。但收窄邊境禁區，時有所議。到咗二零一二年二月十五號，除咗近中英街嗰一帶之外，沙頭角解禁，可以唔使禁區紙就入得。
交通
[編輯]九巴78K或小巴55K，有車往來上水。
