盧循（粵拼：lou4 ceon4；？—411年），別名元龍（jyun4 lung4），字於先（jyu1 sin1），范陽涿縣（而家河北涿縣）人，東晉末年農民起義領袖，亦係起義領袖孫恩嘅妹夫。
孫恩起義失敗之後，盧循繼續帶住剩低嘅部衆同晉朝對抗。元興二年（403年），盧循帶兵從水路南下到廣州，同刺史吳隱之喺南箕臺駁火，並夾生捉咗吳隱之。後尾喺番禺河南（而家海珠區）築城[1]。義熙六年（410年），劉裕北伐，徐道覆想話乘機返上去攻打晉都城建康，盧循就用咗佢條竅；於是劉裕就派將領沈田子、孫處砌佢[2][3]。收尾盧循見形勢唔妥，自己橫掂都係死，於是自殺。
據講，南方嘅蜑家係當年盧循嘅後人[1][4]。
- ↑ 1.0 1.1 乾隆《番禺縣志·藝文》四·衛昱《盧循城》：「河南洲畔眺荒城，漠漠遺蹤草樹平。刺史漫投劉氏糭，方壺已授沈郎兵。斷磚有跡薹常綠，餘燼無煙月自明。爲問盧亭舊孫子，蜑船歌唱兩三聲。」
- ↑ 《南海百詠》·方信孺《盧循故城》詩註：「循據廣州，聞劉裕北伐，從徐道覆之說北出襲建康。裕遣沈田子等乘海奄至，傾其巢穴。」
- ↑ 李吉甫《元和郡縣圖志》：「循既爲宋高祖所破，聚其餘黨還至番禺。高祖遣建威將軍孫季高、鎮武將軍沈田子力戰大破之。」
- ↑ 吳萊《南海山水人物古蹟記》：「小洲有龍戶，一曰蜑戶。舊傳循字元龍，此恐循遺種。」
